Pêi pro tiô tơdroăng “Nôu hơđâng râng ko” xua Khu xiâm pơkuâ ngăn vâi kơdrâi dêi tơnêi têa pơkâ mơ’no, tung 2 hơnăm hdrối mê hía nah, Khu pơkuâ ngăn vâi kơdrâi kong pơlê Dak Lak hiăng tơrŭm ƀă mâu khu râ, kơvâ cheăng, mâu ngế krê, mâu ngế ki ai tuăn hơ-ui kum ƀă rêm râ Khu ngăn vâi kơdrâi hiăng păn roăng, rak ngăn 685 ngế vâi ‘nĕng kuăn tê tung lâp kong pơlê, tâi tâng kơxô̆ liăn tŏng kum lối 7 rơtal 800 rơtuh liăn.

Ƀă tơdroăng ki tŏng veăng tung păn roăng, rak ngăn dêi mâu vâi Nôu hơđâng râng ko mê, mâu vâi o, vâi muăn, vâi cháu châ kum mơnhông ‘na tơdroăng hloh hlê rơkê plĕng ƀă kế tơmeăm vâ xúa, vâ dâi, tơdroăng ki mơjo pâ, hơ-ui kum ăm mâu vâi muăn, vâi o, chía kơdroh iâ tơdroăng ki kheá hơ’nêng xua ôh tá ai nôu pâ ôí rêh vâ rak ngăn, hơ-ui phĕng.

Drêng kố, Khu xiâm pơkuâ ngăn vâi kơdrâi hiăng diâp liăn hriâm ăm 15 ngế hok tro kuăn tê la kơdo mơ-eăm tơkâ luâ tơdroăng xahpá, hriâm rơkê, diâp 120 kơxu tơmeăm ăm mâu vâi kuăn ‘nĕng ki kuăn tê kơtiê xahpá; hâk kơdeăn 312 ngế ƀă khu pơkuâ ki hiăng pêi rơkê kơhnâ tơdroăng râng ko, păn roăng rak ngăn, pêi pro mâu tơdroăng cheăng tŏng kum vâi ‘nĕng kuăn tê, xahpá tung plâ 2 hơnăm hiăng luâ.