Ối a chê pơlê kong kơdrâm Gia Nghĩa, cheăm Dak Nia châ kong pơlê Dak Nông mơjiâng pro tíu ôm hyô tung kuăn pơlê dêi hdroâng kuăn ngo M’Nông Mạ; Pơtối rak túa lĕm tro ton nah môi tiah tŏn chêng, pơtối tơbâ mâu hâi po mơdĭng tiô khôi ton nah. Cheăm hiăng châ mơjiâng pơlê teăn hmôu, jiâ, teăn mâu tơmeăm ƀă phêa, pơ-ốu, kơlá, rái, tơkŭm pế drôu xiâm..., vâ ai mâu tơmeăm tê ăm tơmối ki troh ôm hyô.

Veăng ‘no hnoăng châ tơƀrê mê ai hnoăng veăng ‘no dêi đoân viên droh rơtăm ƀă mâu tơdroăng mơhnhôk pêi xua tơdroăng rêh ối tung kuăn pơlê, veăng pêi pro rak vế khôi túa lĕm tro, rak krúa lĕm hyôh kong prâi, rak ăm pơlê pơla ngiât - krúa - lĕm. Ing mâu tơdroăng cheăng pêi dêi Đoân Droh rơtăm, hên mâu droh rơtăm hdroâng kuăn ngo hiăng hâk tơngăm tơná châ mot Đảng.

Đảng viên hơnăm ối nếo inâi cho H’Yon, cho Kăn phŏ hnê ngăn Đoân Droh rơtăm cheăm Dak Nia tối ăm ‘nâi:

 “Ƀă hnoăng cheăng pêi cho phŏ hnê ngăn Đoân dêi cheăm mê á  đi đo mơdêk hnoăng cheăng kơhnâ vâ hriâm ƀă pêi pro tiô tuăn mơno túa pêi cheăng Hồ Chí Minh tung tơdroăng cheăng. Á  xuân pơtối hnê ăm mâu đoân viên droh rơtăm ki ê kơdo mơ-eăm vâ chiâng mơngế đảng viên môi tiah á’’.

‘Na đảng viên hơnăm ối nếo Đỗ Thị Hạnh, kăn ƀô̆ cheăng tung Ƀơrô pro hlá mơ-éa tơ ‘lêi hlâu cheăm Dak Nia, tối:

 “Pơtối rak vế pêi pro tiô tuăn tơmiât “đảng viên prôk hdrối, kuăn pơlê prôk tiô kơ’nâi’’, á xuân đi đo mơ-eăm mơdêk hnoăng cheăng, rak vế pêi pro tro tiô luât pơkâ dêi kơ koan, pơkâ dêi luât ƀă tung rêh ối rêm hâi. Pakĭng mê, tung mâu hâi tơkŭm hôp chi ƀô̆,  a xuân đi đo pơkâ thế, veăng hnê tối mâu tơdroăng tung hlá mơ-éa  chêh pơkâ vâ tơbleăng pêi troăng rơhlâ, tơdroăng cheăng, troăng mơjiâng tơdroăng cheăng pêi tung khế la ngiâ ăm tơtro tâ”.

Pôa Lê Đình Cường, Kăn hnê ngăn Đảng ủy cheăm Dak Nia, ăm ‘nâi, Đảng ƀô̆ cheăm nôkố ai 217 ngế đảng viên rêh ối a 20 chi bô̆. ‘Nâi nhên hnoăng cheăng pêi ki a hdrối dêi đảng viên tung mâu tơdroăng cheăng kâ rêh ối, cheăm đi đo tơmâng pêi tơdroăng tơ’mot mơngế mot Đảng, malối cho tung kơpong hdroâng kuăn ngo. Tơdế hơnăm kố, Đảng ƀô̆ cheăm hiăng ’mot châ 3 ngế mot đảng viên ki nếo, tung mê, ai 2 ngế cho kuăn ngo.

Nôkố Đảng ủy dế bro hlá mơ-éa vâ ’mot tơ’nôm 1 ngế đảng viên kuăn ngo Mạ. Pôa Lê Đình Cường, Kanw pơkuâ hnê ngăn Đảng cheăm Dak Nia ai tối:

“Mâu đảng viên hơnăm ối nếo châ hriâm tŭm tơdroăng ing mâu hngêi trung đăi hok, nôkố Đảng ủy xuân kum, ai troăng hơlâ pro tơ’lêi hlâu ăm lăm hriâm lâm lý luận chính trị, ing mê vâi châ pơtối rak vế hnoăng pêi pro ki lĕm tro mâu tơdroăng châ pơcháu. Mê Đảng ủy xuân thế tơmâng khât ‘na tơdroăng mơdêk tơ’mot mơngế mot Đảng, malối ’mot hên ngế kuăn ngo châ mot Đảng. Tung la ngiâ ngin xuân hiăng pơkâ mâu tơdroăng cheăng pêi, pơcháu kơxô̆ pơkâ vâ tơ’mot mâu ngế mot Đảng ƀă mâu chi ƀô̆ hlối rơtế ƀă hnoăng cheăng dêi tơrêm ngế Kăn pơkuâ hnê ngăn chi ƀô̆ xuân môi tiah ƀă mâu đảng viên ki pơkuâ tung pơlê, cheăm ‘’.

Pơtối rak vế pêi hnoăng cheăng pro kăn hnê ngăn Đảng, tơmâng khât troh tơdroăng tơ’mot mơngế mot đảng viên tung kơpong hdroâng kuăn ngo, hiăng veăng ‘no hnoăng kum cheăm Dak Nia pê klêi tơdroăng mơjiâng thôn pơlê nếo sap hơnăm 2018. Đảng ƀô̆, mâu kăn pơkuâ hnê ngăn cheăm ƀă kuăn pơlê dế mơ-eăm mơnhông cheăng kâ rêh ối vâ mơdêk kơlo liăn pê lo tâng riân rêm ko mơngế môi hơnăm châ lối 60 rơtuh liăn, ƀă hơnăm 2025 cheăm kô ôh pá ai xếo rơpŏng vâ chê kơtiê.