Tiô tơbleăng dêi Khu pơkâ túa cheăng ƀă Mơ’no liăn cheăng kong pơlê Dak Nông, riân troh nôkố, lâp kong pơlê nếo mơ’no châ 1.350 rơtal liăn kơxô̆ liăn mơ’no cheăng tơnêi têa, châ 34,5% pơkâ pêi, iâ tâ lối 7% tâng pơchông ƀă roh kố hơnăm nah. Trâm pá tung tơdroăng tăng tơnêi, trâm pá ‘na tăng tíu vâ chiâ kơđu, gu tơbăng, ƀă tơvâ tơvân krêa pơkâ bauxite cho mâu xiâm kối chiâng pro mơ’no liăn cheăng tơnêi têa a Dak Nông châ tơƀrê iâ.

Tung mê, tơdjâk râ ó má môi xua trâm pá pơkâ bauxite. Pôa Trần Đình Ninh, Kăn pơkuâ ‘na pơkâ túa cheăng ƀă mơ’no liăn cheăng Dak Nông tối ăm ‘nâi, ai hên tơvâ tơvân ‘na pơkâ pêi ƀă mâu pơkâ ki tơdjâk pro hên tơmeăm tro kreăng. Kong pơlê hiăng hên xôh pâ thế tơnêi têa tah lôi mâu tơdroăng pá puât, tơvâ tơvân tơdjâk troh pơkâ bauxite laga troh nôkố xuân tá hâi chiâng tơleăng, tơdroăng mơ’no liăn cheăng tơnêi têa hơnăm kố dêi kong pơlê cho pá vâ kêi đeăng.