Tơbâ 77 hơnăm Hâi mố đô̆i rong Rong châ - Hlâ hía (27/7), Kăn xiâm hnê ngăn tơnêi têa hiăng diâp tơmeăm ăm vâ chê 1,4 rơtuh ngế ai hnoăng ƀă Kăch măng, nhŏng o dêi mâu ngế ki ai hnoăng ƀă Kăch măng ƀă tâi tâng kơxô̆ liăn vâ chê 420 rơtal liăn. Chin phuh xuân hiăng mơ’no Pơkâ kơxô̆ 77, hâi 01/7/2024 pơkâ rơnêu kơlo liăn tŏng gum ăm mâu ngế ki ai hnoăng ƀă Kăch măng ƀă kơlo tâk 35,7%.

Kố cho kơlo tâk hên má môi ing mâu rôh rơnêu, châ kuăn pơlê tung pơlê pơla ƀă ngế ki ai hnoăng, nhŏng o vâi hâk ro, môi tuăn. Khu xiâm mố đô̆i tro rong ƀă rêh ối pơlê pơla hiăng pro pơhlêh tơdroăng bro um meăn mâu mố đô̆i ki hiăng hlâ. Tơdroăng ki tơmâng ngăn, rak ngăn ivá, pêi pro tro hnoăng cheăng pâ mơnê mâu ngế ai hnoăng ôh ti xê to mơhno tuăn mơno tơrŭm, tơdroăng mơnê ó khât ƀă mâu mố đô̆i tro rong, mố đô̆i châi tamo, rơpŏng mố đô̆i hlâ ƀă ngế ki ai hnoăng ƀă kăch măng, bro kơdroh iâ mâu tơdroăng ki châi heăng, hlâ rêh dêi mâu ngế ki u ối mê ối cho hnoăng cheăng pôu râng dêi mâu rơxông hâi kố ƀă xo ah hmôi ƀă mâu ngế ki hiăng hlâ xua tơdroăng ki tơniăn krê dêi kuăn pơlê, tơniăn krê dêi Tơnêi têa.