Klăng 20 hơnăm hdrối, jâ Đặng Thị Dẩn cho môi tung mâu rơpŏng ki djâ troăng ahdrối pâ lăm ối a tơnêi Nậm Sò tiô troăng pơkâ xĕn kuăn pơlê lăm ối a tíu tơkăng kong. Drêng mê nah, tíu kố cho môi tơnêi a kố êa, ôi to kong, troăng prôk tá ai, pá puât, tơnêi pê kâ xuân tá ai. Xuân ối rak túa cheăng kâ rêh ối ton nah ki ôh pá tro, ôh tá hlê tung pêi chiâk mơngế Mông, mơngế Dao ki lâi xuân ối kơtiê xơpá đi đo.

Ôh tá xâu pá puât, hliăng tiâ, ƀă hnoăng cheăng pêi dêi kăn thôn jâ Dẩn khŏm mơ-eăm pơ’lêh tuăn tơchĕng tơmiât túa pêi cheăng dêi rêm kuăn pơlê. Jâ Dẩn ối chôu pâ tối:

“Rôh apoăng kuăn pơlê akố ngế ki lâi xuân ai kuăn hên, kuăn pơlê tối ai kuăn hên  tro, la drêng châ hnê tối  ƀă hlo tơnêi rế pá ai. drêng châ tơnêi têa xoăng tơnêi, hiăng tơniăn tung rêh ối kuăn pơlê xuân bú ai 1 troh 2 ngế kuăn tê. ’Na xo dêi rơpó kuăn pơlê ôh tá pâ hên tơmeăm, tăng dôh tăng mế ăm kuăn ‘nĕng thế ăm vâi châ 18 hơnăm tơngi klêng ‘nôi mê nếo tăng ăm vâi droh vâi mế ƀă hlối pêi pro tro tiô luât Tơnêi têa’’.

Drêng kuăn pơlê chôa ‘lâng tah lôi túa tơlá ôh pá tro, pơxiâm lăm pro pơlê nếo’’,  jâ Dẩn hiăng prôk lâp tíu hnê kuăn pơlê mâu túa pêi cheăng kâ ki tro ki ‘ló, pêt hdrê loăng ki ai pơxúa ƀă Nậm Sò. Đảng viên kơdrâi mê hiăng mơhnhôk kuăn pơlê pêt xik, pêt loăng hâng, pêt priât ƀă kơ’nâi mê po rơdâ  păn mơnăn mơnôa, păn ká xi xŏng. tối ‘na tơdroăng cheăng pêi tơbrê  kơ’nâi 10 hơnăm mơ-eăm pêi cheăng a tíu tơkăng kong mơnhông mơdêk  cheăng kâ ƀă hlối veăng kum khât dêi đảng viên, ngế kơdrâi kăn thôn - jâ Đặng Thị Dẩn, jâ Tẩn Thị Tích kuăn pơlê thôn Nậm Sò, cheăm Bản Phiệt, tơring Bảo Thắng, kong pơlê Lào Cai tối”:

“Xơpá nâ Dẩn hnê ăm pin pêi cheăng kâ. Hnê pêt loăng plâi, pêt loăng hâng, pêt xik tê châ iâ liăn klêi mê rơpŏng hngêi rế xông tơƀrê iâ.  Nah pơxiâm troh a kố xơpá ó khât ôh tá ai ki klâi’’.

Kơ’nâi 20 hơnăm po pông tơnêi, Nậm Sò nôkố hiăng pơ’lêh tơ ê, pơ’lêh tơrêm hâi. Mâu hngêi xŏn hên râ pá rŏng mâu loăng kân drêng ngiât; mâu troăng ƀê tong krúa, môi túa rêh ối nếo dế hlo a mâu thôn pơlê tíu tokăng kong kố, veăng ai hên hnoăng dêi mâu đảng viên djâ troăng ahdrối môi tiah jâ Dẩn.

64 hơnăm rêh ối, 23 hơnăm cheăng tung Đảng, mâu hnoăng veăng ‘no dêi ngế kơdrâi đảng viên mơngế Dao, Đặng Thị Dẩn hiăng tơ’nôm ivá, tuăn loi ăm kuăn pơlê dêi pơlê thôn kơpong tíu tơkăng kong. Loi ƀă pêi pro tiô Đảng, Pôa Hồ, rêm ngế kuăn pơlê Nậm Sò hiăng ƀă dế mơ-eăm mơjiâng troăng tơkăng kong hơniâp lĕm, tơniăn ƀă mơnhông mơdêk. Đảng viên Đặng Thị Dẩng tối:

“Ki lâi pin djâ troăng pêi hdrối, mê tơpui tối hlối pêi. Ôh tá chiâng pêi ốh ti tối. Tối tro nếo hmâng. Kuăn pơlê rak vế pêi pro tro cho tơdroăng ki mơhnhôk ăm pin pêi cheăng ôh tá ‘nâi tơbrê tơbrê. Tâng ối a ‘ngêi ngăn ki ‘nâi nếo hlo kơphô̆ kŭn tung kong mê. Kuăn pơlê môi tuăn dêi rơpó, á mơ-eăm tâ nếo”.

Tơdroăng ki tơná mơ-eăm cho ngế ki djâ troăng ahdrối tung mơnhông cheăng kâ rêh ối dêi Nậm Sò hâi kố cho tơdroăng ki mơ-eăm ôh tá la lâi pơtê, ôh tá rơlâi rơlo, tâi tâng xua kuăn pơlê dêi đảng viên kơdrâi mơngế Dao  - Đặng Thị Dẩn.