Tơdroăng a Đông mố đô̆i gâk tơkăng kong Huổi Luông, bro a cheăm Huổi Luông, tơring Phong Thổ, kong pơlê Lai Châu cho mơhno ki kơhnâ ăm tơdroăng hriâm tâp ƀă pêi tiô tuăn tơmiât, túa rêh ối Hồ Chí Minh dế po hơniâp lĕm tung tâi tâng khu lêng, ai pơxúa ƀă pêi pro nhên.

Giàng Mý Só cho môi tung 5 ngế hok tro ai tơdroăng rêh ối pá puât, châ Đông mô đô̆i gâk tơkăng kong Huổi Luông, tơring Phong Thổ, kong pơlê Lai Châu tơdah pro kuăn păn ƀă tŏng kum rêm khế 500 rơpâu liăn. Rơrêk tung hiâm mơno tơpui tối o Só tối ăm ‘nâi: Hơnăm kố o hriâm to lâm 5, tâng ôh tá ai mâu tăm mô đô̆i gâk tơkăng kong tơdah păn o kô ôh tá ai roh tơ’lêi troh hngêi trung, troh lâm hriâm chư:

‘’Tơdroăng rêh ối rơpŏng muăn á puât, ôh tá ai phái kâ; châ mâu tăm mô đô̆i kum troh hngêi trung, tŏng kum rêm khế 500 rơpâu, muăn hiăng rôe dêi kơxop hlá mơ-éa hriâm chêh, tơmeăm hriâm tâp ƀă kơdĭng vâ rôe phái. Mâu tăm mô đô̆i tŏng kum, o kô mơ-eăm hriâm tâp, lăm hriâm tŭm’’.

Thiê̆u tă Nguyễn Hữu Kiểm, Cheăng kal kí Đông Mô đô̆i gâk tơkăng kong Huổi Luông tối ăm ‘nâi: Mơnhên Tơdroăng ‘’Kum o troh hngêi trung’’ ƀă ‘’Kuăn păn đông mô đô̆i gâk tơkăng kong’’ cho môi tung mâu tơdroăng hên tơdroăng ki lĕm. Xua mê, sap ing pêi pro đông lêng hiăng pơtâng tối, mơhnhôk kăn ƀô̆ mô đô̆i veăng tơlo liăn ƀă krếo thế tŏng kum ing mâu khu pú hên, ngế krê vâ tơdah păn ƀă tŏng kum mâu muăn.

Rơtế ƀă tơdroăng tŏng kum ƀă liăn, đông lêng ối đi đo pơtroh kăn ƀô̆ kum rơpŏng xo tơmeăm pêi lo ing chiâk deăng, pêt mơjiâng tơmeăm rơnó rơxăm. Tơdrêng amê hbrâ tơrŭm ƀă khu râ kăn pơkuâ cheăm chêh inâi mâu rơpŏng hok tro tung cheăm ai tơdroăng rêh ối pá puât, rơpŏng kơtiê laga ôh tá châ tơdah păn, tŏng kum vâ kơbông krếo tŏng kum ing mâu ngế tŏng kum mơngế pá puât mê cho diâp ăm tơmeăm kâ, hnoăng liăn hriâm rơkê klăng leh pơxiâm po hơnăm hriâm, hâi Lâp plâi tơnêi vâi hdrêng lơ 1/6, lơ a hâi trung thu ƀă hía hé.

Kố xuân cho môi tung mâu tơdroăng ki kal ki Đông mô đô̆i gâk tơkăng kong Huổi Luông dế pêi pro mơgêi kơxô̆ 01 dêu Khu xiâm kal kí ‘na pơtối pêi pro Pơkâ 05 ‘na thăm pêi pro rơdêi hriâm tâp ƀă pêi tiô troăng tơdjâ Hồ Chí Minh. Thiê̆u tă Nguyễn Hữu Kiểm tối:

“Achê kố Đông lêng hiăng pêi pro troăng pêi xiâm pơlái kơpong tơkăng kong ƀă hiăng ai 82 rơpŏng châ pêi pro dêi Hồ Thầu ƀă lối 3 km troăng tơkăng ƀă mâu tơdroăng pêi cheăng ki nhên cho ngin hiăng pơcháu ăm mâu tôh ƀă rêm đảng viên rêm hâi, rêm măng tĭng troh rêm rơpŏng vâ pơtâng tối, mơhnhôk ƀă ‘nâi tơdroăng pói vâ dêi vâi krâ kuăn pơlê, tơdrêng amê hnê mơhno vâi krâ kuăn pơlê pêi pro troăng pêt hdrê loăng plâi, mơnăn păn nếo mơnhông mơdêk cheăng kâ rơpŏng’’.

Ƀă hnoăng cheăng pơkuâ, gâk kring lối 13 km troăng tơkăng kong ƀă 15 tơneăn, ai 21 pơlê, vâ tơdroăng hriâm tâp ƀă pêi tiô Pôa Hồ prôk trâu hơhngế, châ tơƀrê, đảng viên, Khu pơkuâ Đông mô đô̆i gâk tơkăng kong Huổi Luông hiăng pêi pro nhên tơdroăng pêi tiô tơdjâ Pôa Hồ ƀă mâu tơdroăng cheăng ki kal păng ‘nâng ƀă pêi pro troh tâi tâng kăn ƀô̆, đảng viên, mô đô̆i vâ kĭ sap ing 1 troh 2 tơdroăng xiâm tơdroăng cheăng.

Đăi ŭy Tẩn Lở Tông, Đông mô đô̆i gak tơkăng kong Huổi Luông, tơring Phong Thổ, kong pơlê Lai Châu tối:

“Á klêi kơ’nâi hlê plĕng pêi pro tŭm, hriâm tâp, pêi tiô troăng tơdjâ Hồ Chí Minh, tung tơdroăng pơkuâ, gak ngăn tơkăng kong á hiăng tơbleăng ăm Đảng ủy, Khu pơkuâ đông pêi tơtro tơdroăng séa ngăn, pơkuâ troăng tơkăng kong. Á hiăng pơtâng tối, mơhnhôk vâi krâ kuăn pơlê ‘na tơdroăng gak ngăn tơkăng kong. Ing mê vâi krâ kuăn pơlê hiăng mơdêk hlê plĕng ƀă pêi tiô khât’’.

Mâu hơnăm hiăng hluâ, Đông mô đô̆i gâk tơkăng kong Huổi Luông xuân hbrâ tơrŭm ƀă khu râ kăn pơkuâ cheăm tung pơtâng tối ăm kuăn pơlê mơdêk hlê plĕng mơjiâng ƀă gâk kring tơkăng kong; tŏng kum hên rơpŏng pá puât mơnhông mơdêk cheăng kâ, tŏng kum hok tro ai tơdroăng pá puât châ troh hngêi trung.

Ing tơdroăng hriâm tâp ƀă pêi tiô Pôa Hồ a Đông mô đô̆i gâk tơkăng kong Huổi Luông hiăng djâ troh tơdroăng loi tơngah pâ nhuô̆m dêi mâu ngế lêng kơlŏng ngiêt, veăng kum mơjiâng đông chính quy, krá tơniăn tâi tâng, kêi đeăng hnoăng cheăng rak hnoăng pơkuâ, gâk kring tơkăng kong dêi Tơnêi têa.