Klêi kơ’nâi hên hơnăm ối tung rơpŏng kơtiê, rơpŏng nâ Rahlan Siu Hằng, a pơlê Tu 1, cheăm Ia Ga, tơring Čư̆ Prông hiăng hluăn ing kơtiê. Nâ H’Hằng ăm ‘nâi, rơpŏng nâ ai 3 ha loăng băt đâng, nâ xuân ai hên tơdroăng tơmiât pêi tơ’nôm chiâk deăng. La xua ôh tá ai liăn, mê tung plâ hên hơnăm athế tơbrêi tơbrêh la tơdroăng rêh ối xuân ôh tá hlo chía niân. Kơtăn kố 3 hơnăm, rơpŏng nâ châ kum ăm mung 50 rơtuh liăn ing kơxô̆ liăn mung ăm mâu rơpŏng kơtiê, nâ hiăng pêi mâu tơdroăng ki nâ tơmiât vâ pêi. Kơnôm ing tơdroăng ki rơkê tơmiât pêi cheăng kâ, nôkố, nâ hiăng pêi lo liăn ing 40 troh 50 rơtuh liăn tung môi hơnăm ing tơdroăng ki kơhnâ pêi chiâk deăng:

“Hdrối nah ,rơpŏng á trâm hên xơpá, rơhêng vâ mung liăn roê mơnăn păn ƀă roê mâu hdrê loăng pêt la ôh tá ai liăn. Klêi kơ’nâi châ mung liăn liăn dêi hngêi rak liăn tŏng kum mâu ki xơpá, mê á mung 50 rơtuh, roê 1 to ro, pêt tơ’nôm kơphế, ƀă rak ngăn kơdrum loăng ƀăt đâng. Nôkố, pêi lo liăn ing 40 – 50 rơtuh liăn tung môi hơnăm’’.

Xuân môi tiah mê, hơnăm kố, rơpŏng ngoh Ksor Tứ a ƀuôn Choanh, cheăm Uar, tơring Krông Pa hơniâp ro xua hiăng ai hngêi ối ki lĕm nếo bro klêi. Ngoh ăm ‘nâi, kơtăn kố 3 hơnăm, kơnôm châ tŏng kum mung xo 40 rơtuh liăn ing kơxô liăn tŏng kum mâu kơtiê, ngoh pêt kơtếo, roê tơ’nôm ro, vâ mơdêk tơ’nôm pêi cheăng kâ. Klêi kơ’nâi 3 hơnăm, ngoh hiăng mơdrếo klêi kơxô̆ liăn chĕn, châ bro hngêi ối ro ki păn troh nôkố hiăng châ 5  to. Ngoh phiu ro:

“Hdrối nah, á ối tung hngêi ki kong mê xi kơchoh. Tơnêi têa kum liăn vâ pêi cheăng kâ, mê á pro hngêi ối. Nôkố hngêi ối hiăng tơniăn, ôh tá tơmiât klâi xếo bu tơmiât tơkŭm pêi cheăng kâ xo’’.

Nôkố, tâi tâng kơxô̆ liăn chĕn dêi Hngêi rak liăn Tŏng kum rêh ối pơlê pơla Tíu pêi cheăng a Gia Lai cho lối 6.700 rơtal liăn, ƀă 153.925 rơpŏng mung. Krê hơnăm 2023, Hngêi rak liăn Tŏng kum rêh ối pơlê pơla Tíu pêi cheăng a Gia Lai ai kơxô̆ liăn chĕn ăm mung châ 1.700 rơtal liăn, ƀă lối 41.500 ngế kuăn pơlê. Tung mê, kuăn pơlê cho rơpŏng kơtiê, rơpŏng vâ chê kơtiê châ mung mâu kơxô liăn tiô Pơkâ 11/NQ-CP dêi Chin phuh môi tiah ăm mung roê hngêi ối ki rơpâ liăn, mung pêi cheăng kâ ăm rơpŏng hdroâng kuăn ngo, cho lối 13 rơpâu rơpŏng. Pôa Đinh Văn Nghĩa – Kăn phŏ pơkuâ Hngêi rak liăn Tŏng kum rêh ối pơlê pơla kong pơlê Gia Lai ăm ‘nâi:

“Hngêi rak liăn tŏng kum rêh ối pơlê pơla kong pơlê đi đo ngăn nhuô̆m tơdroăng ki tơbleăng mâu tơdroăng ăm mung liăn tiô troăng hơlâ tŏng kum kuăn pơlê hdroâng kuăn ngo ki iâ  mơngế a mâu cheăm tơring. Ngin hiăng tơrŭm krá tơniăn ƀă rêm râ pơkuâ cheăng ƀă cheăm, tơring vâ tăng ‘nâi tơdroăng ki rơhêng vâ mung ƀă rêh ối dêi mâu rơpŏng kơtiê, rơpŏng vâ chê kơtiê, hdroâng kuăn ngo ƀă rơpŏng ki châ tơnêi têa tŏng kum ki ê, vâ mơ’no tối mâu túa pơkâ, tơdroăng vâ pêi ƀă tơdroăng ki xing xoăng liăn mung ăm mâu tơring cheăm tiô kơlo ki xơpá ƀă tơdroăng ki rơhêng vâ dêi kuăn pơlê tro ƀă tơƀrê’’.

Kơxô̆ liăn mung dêi Hngêi rak liăn tŏng kum rêh ối pơlê pơla hiăng kum mâu rơpŏng kơtiê, rơpŏng vâ chê kơtiê ƀă rơpŏng hdroâng kuăn ngo a Gia Lai pơkâ tơleăng mâu tơdroăng ki xơpá tung rêh ối, mơnhông cheăng kâ, mơeăm hluăn ing kơtiê krá ton.