Tung hơnăm 2023, hiăng ai lối 13 rơpâu rơpŏng hdroâng kuăn ngo a Gia Lai châ mung liăn tŏng kum rêh ối pơlê pơla. Kơxô̆ liăn kố hiăng kum bro tơƀrê tung cheăng kâ rêh ối, mơdêk tơdroăng rêh ối ăm kuăn pơlê hdroâng kuăn ngo a mâu kơpong ki ối hên xơpá. Kong pơlê Gia Lai nôkố ai lối 38.500 rơpŏng kơtiê, châ 90% tung kơxô̆ ki kố cho hdroâng kuăn ngo.

Vâ kum hdroâng kuăn ngo kơtiê tơniăn tung rêh ối, Gia Lai hiăng tơbleăng hên tơdroăng ki ăm mung liăn tŏng kum. Tung 6 khế hơnăm 2023, Tíu pêi cheăng Hngêi rak liăn tŏng kum rêh ối pơlê pơla kong pơlê Gia Lai hiăng ăm mung 964 rơtal liăn ƀă lối 25 rơpâu rơpŏng mung, tung mê, rơpŏng hdroâng kuăn ngo ai lối 13 rơpâu rơpŏng, kơxô̆ liăn mung vâ chê 500 rơtal liăn, châ vâ chê 52% tung tâi tâng kơxô̆ liăn mung.

Vâ chê 1 rơpâu rơpŏng châ kum vâ chê 50 rơtal liăn vâ hơ’lêh cheăng, tơnêi ối, tơnêi pêi kâ ƀă bro hngêi ối. Kơxô̆ liăn mung kố hiăng kum mâu rơpŏng kơtiê, rơpŏng vâ chê kơtiê ƀă rơpŏng kuăn pơlê hdroâng kuăn ngo a Gia Lai pơkâ tơleăng mâu tơdroăng xơpá tung rêh ối, mơnhông cheăng kâ, mơdêk tơdroăng rêh ối ƀă hluăn ing kơtiê krá ton.