Hdrối nah, rơpŏng nâ Đinh Thị Trạm a pơlê Groi, cheăm Ya Hội, tơring Đăk Pơ cho rơpŏng kơtiê. Hơnăm 2018, rơpŏng nâ Trạm châ mung liăn tiô rơpŏng kơtiê ƀă kơxô̆ liăn cho 47 rơtuh liăn ing Hngêi rak liăn tŏng kum rêh ối pơlê pơla tơring Đak Pơ vâ pêt 2 ha loăng keo. Ing kơxô̆ liăn ‘măn kơdĭng ƀă mơ-eăm ing dêi tơná, troh nôkố, rơpŏng nâ ai 4 ha loăng nhĕn, 5 sào pôm loăng ƀă păn tơ’nôm chu, ro. Apoăng hơnăm 2023, klêi hên hơnăm kơhnâ pêi cheăng kâ, on veăng nâ Trạm hiăng châ bro hngêi ki nếo ƀă hiăng xut lo ing rơpŏng kơtiê dêi pơlê Groi.

“Kơnốu á pêi cheăng hơngế, á ối a hngêi kơdĭng châ môi iâ liăn, ‘nâi pơchoh hmân ếo, pơchoh ếo pơtâk hdroâng kuăn ngo rơtế ƀă to lâi ngế mâu nâ o vâ hluăn ing kơtiê”.

Tơring Đăk Pơ nôkố ối vâ chê 2 rơpâu rơpŏng kơtiê ƀă vâ chê kơtiê, châ dâng 15% kơxô̆ rơpŏng. Vâ pro tơ’lêi hlâu ăm rpơŏng kơtiê, vâ chê kơtiê mơdêk pêi lo liăn, tơring Đăk Pơ hiăng tơbleăng hên troăng tŏng kum tiô troăng tơmiât “diâp ăm tơdroăng vâ pêi cheăng tơƀrê’ vâ kuăn pơlê ai tơdroăng, kế tơmeăm pêi cheăng kâ, mơ-eăm hluăn ing kơtiê krá ton. Troh nôkố, 7/8 to cheăm, pơlê kân dêi tơring hiăng tơkŭm po lâm hnê cheăng a thôn pơlê ăm dâng 1.500 ngế, hbru lối 21 rơpâu theh ƀaoh hiêm khăm pơlât ăm mâu ngế ki ối tung rơpŏng kơtiê, vâ chê kơtiê ai kơlo rêh ối ôh tá chía niân, kuăn pơlê hdroâng kuăn ngo kơpong II, III ƀă mơngế Xuăn ki rêh ối a kơpong malối xơpá.

Pôa Huỳnh Văn Hơn – Kăn phŏ hnê ngăn Vi ƀan tơring Đăk Pơ ăm ‘nâi, rơtế ƀă ki rơdêi ‘na kơtếo pôm nôkố tơring ai tơ’nôm ki rơdêi pêt kơchâi tro ƀă kế tơmeăm, mơjiâng mâu kế tơmeăm OCOP vâ mơdêk pêi lo liăn ăm kuăn pơlê, xut tah hrâ mơnguâ kơtiê xơpá krá ton.

“Tơdroăng tơnêi têa pơkâ kơdroh kơtiê krá ton a kong pơlê tung tơdroăng ki mơhnhôk mâu kơxô̆ liăn veăng tơlo vâ pro mâu kế tơmeăm khoăng vâ hơ’lêh tơdroăng rêh ối dêi vâi krâ nhŏng o. Ing mâu tơdroăng pơkâ tŏng kum rêh ối pơlê pơla vâ tŏng kum ăm vâi krâ nhŏng o tung kơvâ pêt, păn kế tơmeăm, hnê vâi krâ nhŏng o pôi tá tơkôm to a tơdroăng ki tŏng kum, ‘nâi pêt mơjiâng kế tơmeăm vâ hơ’lêh tơdroăng rêh ối”.

Čư̆ Păh xuân cho tơring ki ai hên cheăm kơtiê xơpá ƀă kơxô̆ rơpŏng kơtiê hên. Ƀă hên troăng hơlâ, ing hnê tối, hnê hriâm troh thăm mơdêk tơdroăng pêi mâu tơdroăng tơkêa ‘no liăn cheăng, hơnăm 2023, tâi tâng kơxô̆ rơpŏng kơtiê tung lâp tơring kơdroh 3,82% tâng pơchông ƀă hơnăm 2021.

Pôa Nay Kiên – Kăn hnê ngăn Vi ƀan tơring Čư̆ Păh ăm ‘nâi:

“Ing mâu kơxô̆ liăn dêi mâu tơdroăng pơkâ, ing mâu túa pơkâ ki pêi tơƀrê vâ pơkâ tung kơpong hdroâng kuăn ngo mê tơdroăng kơdroh kơtiê châ mơhno nhên môi tiah hdrối nah mâu tơdroăng ‘mâi pêt kơphế, plâi kơtóu lĕm dêi hdrê ki nếo, kih thuât, tơdroăng ki pơhlêh troăng tro tơdroăng pơkâ pêt hdrê loăng dêi tơring, tơkŭm tung mâu hdrê loăng pêt ki ton hơnăm, loăng plâi kâ ki tê liăn kơnâ hiăng tơdjâk tơdrêng troh tơdroăng kơdroh kơtiê”.

Tung pơla hơnăm 2021-2023, kong pơlê Gia Lai hiăng xing xoăng tơ’nôm lối 400 rơtal liăn vâ pêi pro mâu tơdroăng tơnêi têa pơkâ. Pakĭng kơxô̆ liăn ki kum tơdrêng ing Hngêi rak liăn Tơnêi têa, Gia Lai xuân pêi pro tŏng kum ‘no liăn ing mâu tơdroăng tơkêa; Hên cheăm, tơring hiăng ai túa pêi ki tro ‘ló, troăng hơlâ ki pơxúa tơtro ƀă ki khât, pro tơ’lêi vâ mâu kơtiê po rơdâ mơnhông cheăng kâ, păn mơnăn, mơdêk pêi lo liăn, hluăn kơtiê krá ton.

Kơxô̆ rơpŏng kơtiê dêi kong pơlê ing 12,09% hơnăm 2021 hiăng kơdroh ối 8,11% a mơ’nui hơnăm 2023. Tung mê, kơxô̆ rơpŏng kơtiê cho hdroâng kuăn ngo kơdroh ing 25,58% hơnăm 2021 chu ối 17,05% a mơ’nui hơnăm 2023, châ ƀă tơkâ luâ tơdroăng pơkâ kơdroh kơxô̆ rơpŏng kơtiê tung hdroâng kuăn ngo lối 3% tung môi hơnăm tiô pơkâ kơtiê hên troăng pơla hơnăm 2022 – 2025.

Pôa Trường Trung Tuyến - Kăn phŏ ngăn Hdroâng kuăn ngo kong pơlê Gia Lai ăm ‘nâi, tung hơnăm 2024, kong pơlê Gia Lai pơtối mơ-eăm ăm kơxô̆ rơpŏng kơtiê kơdroh a kơlo 2%, kơxô̆ rơpŏng kơtiê hdroâng kuăn ngo kơdroh 3%, rế hía rế hơ’lêh ƀă mơdêk tơdroăng rêh ối kuăn pơlê.

“Hô̆i đong hnê ngăn kong pơlê hiăng hôp ƀă tơbleăng tơdroăng pơkâ ƀă pơcháu tơdroăng pơkâ ăm mâu tơring, mâu kơvâ cheăng tung tơbleăng tơdroăng pơkâ tơnêi têa kơdroh kơtiê krá ton mê tơdroăng tơbleăng tro ƀă tơƀrê tơdroăng kố kô veăng kum hên khât ăm tơdroăng kơdroh kơtiê tung kơpong hdroâng kuăn ngo. Nôkố ngin dế kơhnâ veăng tí tăng ‘nâi plĕng ăm Vi ƀan hnê ngăn kong pơlê pơkâ nhên tơdroăng tơbleăng pêi pro tơdroăng. Tung mê tơkŭm mâu kơxô̆ liăn ki kơjo ăm tơbleăng ăm tơdroăng ki kal tung hơnăm pơla kố nah tơbleăng gá tro, mâu kơxô̆ liăn kố kô kum ăm kơpong hdroâng kuăn ngo hơ’lêh, kum ăm kơxô̆ rơpŏng kơtiê tung kơpong hdroâng kuăn ngo tung la ngiâ kơdroh”.