Pơlê  Kret Krot, cheăm  Hra, tơring ‘Mang Yang hdrối nah ai luâ tơdế kơxô̆ rơpŏng kuăn pơlê hyông troăng tiô khôp Hmong, pro ôh tá tơniăn tung pơlê. Mâu hơnăm hdrối, tơdrêng ƀă tơdroăng tơplâ mơdât tah tơdroăng khôp ki mê, mâu kăn pơlê, cheăm choâng lâng mơnhông tơ’mot mơngế mot đảng viên nếo, ‘mâi mơnhông tơdroăng cheăng kal kí. Ing tíu ki ôh tá ai đảng viên nah, nôkố, tung pơlê hiăng ai 9 ngế đảng viên.

Đảng ủy cheăm Hra xing xoăng  ăm rêm ngế đảng viên a pơlê pơkuâ môi khu rơpŏng. Ing mê, đảng viên pro troăng lĕm a hdrối tung mơnhông cheăng kâ, mơjiâng tơdroăng rêh ối nếo a kơpong kuăn pơlê ối, pêi tro troăng rơhlâ, dêi Đảng ƀă Tơnêi têa, kơhnâ mơhnhôk hnê tối, hnê ăm mâu rơpŏng kuăn pơlê pêi ƀối. Ing mê, châ hlo châ ‘nâi, kum hnê ngế ki mê, ăm hriâm tơ’nôm, tơ’mot ăm mot đảng viên nếo. Ngoh Sin - đảng viên pơlê Kret Krot, cheăm Hra ăm ‘nâi:

“Đảng viên rak vế pêi pro tro tiô troăng rơhlâ dêi Đảng, Tơnêi têa. Cho môi ngế đảng viên thế rak vế pêi troăng lĕm ahdrối tung pơlê, pêi cheăng klâi pin xuân thế pêi tro, vâ kuăn pơlê tung pơlê ngăn ah pêi ƀối’’.

Lâp tung cheăm Hra, tơring ‘Mang Yang nôkố ai lối 2.000 rơpŏng kuăn pơlê, 63% kơxô̆ pơ’leăng mâ mơngế kuăn ngo. Lâp tung cheăm ai 15 chi ƀô̆,177 đảng viên. Tung mê, pái pơlê ki xiâm ‘na kring tơniăn kal kí xuân hiăng pê klêi ‘na tơrŭm cheăng, ‘mâi mơnhông râ ủy. Lối tơdế kơxô̆ mơngế pêi cheăng ôh tá pêi to môi tơdroăng cheăng a mâu thôn, pơlê hiăng cho đảng viên. Cheăm mơ-eăm troh hơnăm 2025 kơxô̆ ki mê châ 80%. Khu tơrŭm cheăng Đảng, đảng viên châ ‘mâi mơnhông, mơdêk cho xiâm ki tơngah a tơdroăng tơniăn, krá a tơrêm tíu kuăn pơlê ối. Jâ Nguyễn Thị Huệ - Kăn phŏ hnê ngăn Hô̆i đong cheăm Hra, ăm ‘nâi:

“Kơ’nâi xoăng hnoăng cheăng pêi dêi Đảng ủy mê a Đảng ủy viên lăm pêi cheăng a pơlê mê xuân ‘mâi mơnhông, mơ-eăm tâi ivá tơná. Má môi cho vêh a pơlê hnê ăm mâu chi ƀô̆ tơkŭm hôp tro tiô troăng hnê mơhno 12 dêi Khu Tơrŭm cheăng Xiâm ƀă hnê 03 dêi Khu Tơrŭm cheăng Đảng dêi tơring ‘Mang Yang; xuân veăng kum ăm chi ƀô̆ tung pơla pơkuâ, hnê mơhno ăm chi ƀô̆ pêi hnoăng cheăng a pơlê cheăm; kum ăm đảng viên tung chi ƀô̆ hlê plĕng tơná kô ‘no hnoăng pêi ki kân ƀă pơlê cheăm’’.

Tơniăn kal kí, tơdroăng rêh ối dêi kuăn pơlê đi đo monhông tơƀrê. Hơnăm 2023, kơxô̆ liăn pê lo tâng riân rêm ko mơngế a cheăm châ lối 40 rơtuh liăn, kơxô̆ rơpŏng kơtiê xăm ối 13,6%, riân rêm hơnăm xăm sap 5- 7%. Pôa Đinh Văn Tâm - Kăn phŏ hnê ngăn Đảng ủy cheăm Hra, tơring ‘Mang Yang ăm ‘nâi:

“Tung pơla achê kố, mê ngin xuân hiăng pro tíu xiâm ƀă pơtối hnê thế hôp chi ƀô̆ mâu tơdroăng vâ tơniăn, mê ngin xing xoăng tơdroăng cheăng ăm môi ngế kăn lăm xo pêi hnoăng cheăng pro Phŏ hnê ngăn chi ƀô̆, tơdrêng ƀă chi ƀô̆ mơjiâng tơdroăng ki kal. Pơtih cho tơ’mot mơngế mot đảng klêi mê kơdroh kơklêa xăm kơtiê, tơdroăng cheăng tơplâ mơdât khu khôp Hmong’’.

Khu cheăng kal kí chôa lâng mơdêk ‘na ki tơƀrê, ai pơxúa, veăng pro tơniăn kal kí, pơ’lêh tŭm tơdroăng tung rêh ối dêi kuăn pơlê mâu hdroâng kuăn ngo Hra.