Hâi lơ 4/7, Kăn pơkuâ Vi ƀan hnê ngăn tơring Čư̆ Pưh, kong pơlê Gia Lai hiăng hnê mơhno mâu kơvâ cheăng mơnhên tối, séa ngăn mâu tơdroăng pơkâ thế dêi ngế ki ‘no liăn cheăng bro Hngêi kơmăi On tơhrik khía Ia Le 1 (cheăm Ia Le) ‘na tơdroăng ki tŏng kum kuăn pơlê tung tíu ki ai trăng tourƀin mơ’no on tơhrik.

Tiô pôa Huỳnh Quang Thái – Kăn hnê ngăn Vi ƀan tơring Čư̆ Pưh, ngế ki ‘no bro dêi tơdroăng tơkêa hngêi kơmăi on tơhrik khía Ia Le 1, Kŏng ti Tơlo liăn ƀă ‘no liăn Bro On tơhrik khía Cao Nguyên 1, hiăng pêi cheăng ƀă hiăng châ rơhéa tiô tơkêa ƀă 3 tung tâi tâng 4 rơpŏng ki ai hngêi ối, kế tơmeăm ki tro tơdjâk  sap ing mâu trăng tourƀin khía. Tơdroăng ki tơkêa cho khu mơdró kâ kô kum mâu rơpŏng bro hngêi tiô pơkâ tro ‘na hngêi ối a thôn pơlê, tíu bro a chê kơpong kuăn pơlê rêh ối; bro troăng, ok hmốu tơ’lêi hlâu ăm tơdroăng ki prôk lăm; pêi pro tiô tơdroăng ki rơhêng vâ ‘na on tơhrik, têa ôu.

Pôa Huỳnh Quang Thái ăm ‘nâi, nôkố kăn pơkuâ Vi ƀan hnê ngăn tơring hiăng pơcháu ăm mâu khu râ kơvâ cheăng dêi tơring mơnhên tối, vâ tơbleăng. Mâu rơpŏng ki ối tơnêi pêi chiâk, tro tơdjâk kô pơtối châ séa ngăn, tŏng kum tro tiô pơkâ.