Mâu râ mâu kơvâ cheăng a kong pơlê Gia Lai dế thăm pơtâng tối ‘na troăng hơlâ ƀaoh hiêm khăm pơlât, mơ-eăm troh mơ’nui hơnăm 2023 kơxô̆ mơngế rôe ƀaoh hiêm khăm pơlât châ 90% pơ’leăng mâ mơngế. Tiô Ƀaoh hêm pơlê pơla kong pơlê Gia Lai, riân troh khế 7/2023, lâp kong pơlê Gia Lai ai dâng 1 rơtuh 290 rơpâu ngế (90% pơ’leăng mâ kuăn pơlê) veăng rôe ƀaoh hiâm khăm pơlât, tâk lối 5% tâng pơchông ƀă roh kố hơnăm hdrối.

Tung mê, kơxô̆ mơngế hdroâng kuăn ngo veăng rôe ƀaoh hiêm khăm pơlât châ lối 75%. Vâ pơtối mơdêk kơxô̆ kuăn pơlê châ rak ngăn ivá, Hô̆i đong kong pơlê Gia Lai hiăng tơbleăng Pơkâ kơxô̆ ‘na tŏng kum kơlo liăn nâp ƀaoh hiêm khăm pơlât mâu khu ngế tung kong pơlê hneăng hơnăm 2023 – 2025. Pơtối mê, sap apoăng hơnăm troh nôkố, kong pơlê Gia Lai ai lối 170 rơpâu ngế ƀă hok tro hdroâng kuăn ngo châ tŏng kum kơxô̆ liăn nâp ƀaoh hiêm khăm pơlât.

Tơdrêng amê, mâu khu râ, mâu kơvâ cheăng thăm pơtâng tối troh mâu tíu kơpong hơngế hơngo, kơpong hdroâng kuăn ngo vâ kuăn pơlê hlê plĕng nhên tâ ‘na hnoăng ki pơxúa drêng veăng rôe ƀaoh hiêm khăm pơlât.