Pơla hdrối kố nah, jâ Trương Thị Mai, Ngế cheăng tung Khu xiâm kal kí, Ngế pơkuâ hnê cheăng Đảng, Ngế pơkuâ Khu tơrŭm cheăng xiâm ƀă khu kăn hiăng lăm pôu, hbru tơmeăm Têt ăm kŏng nhân, mơngế pêi cheăng a kơpong hngêi kơmăi Phú Hội, tơring Đức Trọng, kong pơlê Lâm Đồng. A rôh lăm pôu, jâ Trương Thị Mai hiăng khĕn kơdeăn hnoăng cheăng ki mơ-eăm tơkâ luâ xơpá dêi khu pú hên kăn ƀô̆, kŏng nhân, mơngế pêi cheăng a kơpong hngêi kơmăi Phú Hội tung tơdroăng pêi chiâk deăng, têa pro tơmeăm pê lo ing chiâk deăng.

Veăng ‘no hnoăng mơnhông tơƀrê kơvâ pê lo kế tơmeăm ing chiâk deăng dêi kong pơlê tối krê, lâp tơnêi têa tối tơdjuôm châ hên má môi tung 10 hơnăm hdrối. Tơmeăm pê lo kơchâi, plâi pôm dêi Lâm Đồng nokố hiăng châ tê ăm hên kong têa tung lâp plâi tơnêi. Pakĭng mê, jâ Trương Thị Mai xuân hiăng pơkâ thế mâu kơpong hngêi kơmăi, mâu kăn kong pơlê Lâm Đồng pơtối tơmâng tŏng kum, tơmâng khât tŏng kum ‘na tơdroăng rêh ối ăm mơngế pêi cheăng a mâu kơpong hngêi kơmăi, malối thâ pê klêi mâu tơdroăng tơkêa bro hngêi ối ăm kuăn pơlê.

Rôh kố, jâ Trương Thị Mai hiăng hbru tơmeăm Têt ăm kơpong hngêi kơmăi Phú Hội; diâp 200 kơxu tơmeăm ăm kŏng nhân, mơngế pêi cheăng dêi kơpong hngêi kơmăi, rêm kơxu tơmeăm kơnâ 1,3 rơtuh liăn.

A pơlê kong kơdrâm Kon Tum, Ngế pro xiâm phŏ hnê ngăn Chin phuh Trần Hồng Hà ƀă mâu kăn cheăng dêi Tíu xiâm hiăng troh veăng pêi pro tơdroăng “Têt tơrŭm dêi rơpó - Kum dêi rơpó Rơnó hơngui ’’ xua Liên đoân ngăn mơngế Pêi cheăng ƀă Vi ƀan Măt trâ̆n tơnêi têa Việt Nam kong pơlê Kon Tum tơkŭm po. Tối tơbleăng a Tơdroăng “Têt tơrŭm dêi rơpó - Kum dêi rơpó Rơnó hơngui’’  ăm mâu kŏng nhân ki pêi cheăng ƀă mâu rơpŏng kuăn pơlê ki kơtiê xơpá dêi kong pơlê Kon Tum, Ngế pro xiâm phŏ hnê ngăn Chin phuh Trần Hồng Hà pơtroh rơkong kơ-êng hơlêm dêi Kăn xiâm pơkuâ hnê ngăn Đảng Nguyễn Phú Trọng; mâu kăn xiâm Đảng, Tơnêi têa ƀă tơdroăng hơ-ui pâ dêi mâu ngế kăn, mâu kuăn pơlê ƀă rơkong rơkâu hơnăm nếo trâm tơdroăng ki lĕm má môi. Rơkâu rêm ngế, rêm hngêi ai môi tơdroăng kâ Têt tơtô, hơniâp ro, môi hơnăm nếo trâm tơdroăng ki lĕm ro ƀă kro mơdrŏng.

Ngế pro xiâm phŏ hnê ngăn tơnêi têa Khĕn kơdeăn kong pơlê Kon Tum hiăng tơmâng tŏng kum mâu kŏng nhân ƀă mâu rơpŏng kơtiê xơpá drêng troh Têt Rơnó hơngui, pakĭng mê pâ thế kong pơlê pơtối tơmâng khât vâ mâu ngế kơtiê xơpá mơ-eăm vâ hluăn  kơtiê krá tơniăn:

“Mâu râ Đảng, mâu kăn kong pơlê Kon Tum pơtối tơmâng khât, ai mâu luât pơkâ tŏng kum rơpŏng kơtiê, rơpŏng vâ chê kơtiê ƀă tơniăn vâ châ hluăn kơtiê krá tơniăn ton. Mơdêk hlê plĕng, hriâm tơdroăng pêi cheăng kâ, kum kuăn pơlê ai cheăng pêi, tăng tơ’nôm tơdroăng cheăng kâ ăm mâu ngế kơtiê, vâ chê kơtiê kơdôu mơ-eăm mơnhông tung rêh ối. Tơmâng ‘na tơnêi pro hngêi ối ăm pơlê pơla, hngêi pơtâp ivá, mâu tơmeăm pêi cheăng ăm mâu kŏng nhân a mâu kơpong hngêi kơmăi. Tơkŭm po, mơdêk tơƀrê tơdroăng cheăng dêi Liên đân lao động’’.

Tối ‘na tơdroăng cheăng kâ - rêh ối dêi tơnêi têa, Ngế pro xiâm phŏ hnê ngăn Chin phuh Trần Hồng Hà tối tơnêi têa hiăng tơkâ luâ hơnăm 2023 ki hên tơdroăng pá puât ƀă kơlo cheăng kâ tâk lối 5,05%, cho tung khu mơdêk hên tung kơpong ƀă lâp plâi tơnêi. Pơtối rak vế pêi pro tơdroăng ki lĕm, hơ-ui kum dêi rơpó mâu kuăn ngo ƀă tơdroăng ki lĕm dêi rơxông pin, Đảng ƀă tơnêi têa đi đo tơmâng khât troh tơdroăng rêh ối dêi kuăn pơlê, troh tơdroăng kơdroh kơklêa xăm kơtiê, ngăn mê cho pơkâ pêi ki kal, cho tơdroăng cheăng ki xiâm, tung mơnhông mơdêk rĕng, krá tơniăn tơnêi têa.  

Rôh kố Ngế pro xiâm phŏ hnê ngăn Chin phuh Trần Hồng Hà rơtế ƀă mâu kăn kong pơlê Kon Tum hiăng hbru tơmeăm Têt ăm 200 ngế kŏng nhân pêi cheăng ƀă 50 rơpŏng kuăn pơlê ki kơtiê xơpá ƀă rêm kơxu tơmeăm kơnâ 1 rơtuh 300 rơpâu liăn.

Hdrối mê, Kăn xiâm phŏ hnê ngăn tơnêi têa Võ Thị Ánh Xuân rơtế ƀă mâu kăn dêi Tíu xiâm hiăng lăm pôu, hbru tơmeăm ăm mâu ngế kơtiê, mâu kŏng nhân kơtiê xơpá a tơring Vũ Thư, kong pơlê Thái Bình. Troh lăm pôu, hơlêm, hbru tơmeăm ăm mâu kŏng nhân ki kơtiê xơpá a Kŏng ti veăng tơlo liăn Lâp plâi tơnêi Bảo Hưng, Kăn xiâm phŏ hnê ngăn tơnêi têa Võ Thị Ánh Xuân tối, hơnăm 2023 xua ai Đảng pơkuâ, ing tơdroăng mơ-eăm dêi khu cheăng ‘na kal kí rơtế ƀă hnoăng veăng ‘no dêi rêm râ kuăn pơlê, khu mơdró tơnêi têa hiăng châ pêi  tơƀrê tung tâi tâng mâu tơdroăng cheăng.

Tối nhên, Đảng, Tơnêi têa đi đo tơmâng, mơdêk tơdroăng rêh ối  tơmeăm khoăng, tuăn ngôa ăm kuăn pơlê, tung mê ai kŏng nhân pêi cheăng. Kăn xiâm phŏ hnê ngăn tơnêi têa khĕn kơdeăn kong pơlê Thái Bình hơnăm nah hiăng châ pêi tơƀrê mâu tơdroăng mơnhông cheăng kâ-rêh ối; tối nhên tung mâu hnoăng cheăng hiăng châ pêi pro ai hnoăng veăng ‘no hên dêi mâu kong nhân tung mâu khu mơdró tung kong pơlê tối tơdjuôm, kŏng ti veăng tơlo liăn lâp plâi tơnêi Bảo Hưng tối krê. Kăn xiâm phŏ hnê ngăn tơnêi têa pơkâ thế kong pơlê Thái Bình  tơmâng tŏng kum tơmeăm Têt ăm mâu kuăn pơlê, malối tí tăng ngăn hôm ối mâu rơpŏng kơtiê, kŏng nhân pêi cheăng ki kơtiê xơpá vâ hbrâ tŏng kum, pôi tá lôi ngế ki lâi pá rŏng.