*** Kơxo hâi lơ 26/7, trung tươ̆ng Thái Đại Ngọc, Ngế pơkuâ lêng Kuân khu 5 rơtế ƀă mâu Kăn ki pêi hnoăng cheăng dêi Kuân khu 5 hiăng lăm pôu, hbru tơmeăm ăm Jâ Nôu Việt Nam khên tơnôu, rơpŏng mâu ai hnoăng ki kơtiê, mâu mố đô̆i rong râ, châi tamo tung pơlê krâm Cẩm Lệ ƀă tơring Hòa Vang, pơlê kong kân Đà Nẵng.

Teăng mâ  kăn ƀô̆, mâu lêng Kuân Khu 5, Trung tươ̆ng Thái Đại Ngọc tối mơnê khât kơ mâu Jâ Nôu Việt Nam khên tơnôu, mâu lêng ki rong râ, châi tamo, rơpŏng ai hnoăng kơtiê, ai hnoăng tơnêi têa hiăng ôh tá mơjo mơheăm chhá ‘na tơdroăng tơplâ kăch măng, vâ  dêi tơnêi têa tơrŭm môi. Tung kơpong Kuân khu 5, lối 180.000 ngế hlâ ai hnoăng, 176 rơpâu ngế tro rong, mâu mố đô̆i hiăng hlâ tơplâ lo mơheăm chhá tung péa rôh tơplâ xâ Pơhlăng ƀă xâ Mih.

Nôkố, Kuân khu 5 pơtối rah 3 khu tơkŭm kơxêng kiâ mố đô̆i ki hlâ ki hnoăng pêi pro hnoăng cheăng ti tăng kơxêng kiâ mố đô̆i hlâ xua tơplâ a 2 kong têa Lếo ƀă Kul.

*** Tíu xiâm hnê mơhnhôk pêi chiâk Tơnêi têa nếo troh pôu, diâp tơmeăm ăm mâu rơpŏng hdroâng kuăn ngo ai hnoăng ƀă kăch măng a cheăm Quảng Nhân, tơring A Lưới, kong pơlê Thừa Thiên Huế. A thôn Pi Ân 2, khu kố hiăng troh pôu ƀă hbru tơmeăm ăm jâ krâ Kăn Nghiah (94 hơnăm) ngế Pa Cô. Jâ krâ Kăn Ngiah hiăng ai hên ivá veăng kum tung péa rôh tơplâ xâ tŏng xo tơnêi têa.

Xuân a thôn Pa Ân 2, Khu kố hiăng troh pôu ƀă hbru tơmeăm ăm jâ krâ Kăn Cần (92 hơnăm). Jâ Cần mơngế Pa Cô tung khu ngế ki ai hnoăng tơnêi têa, ai hnoăng ƀă kăch măng tơdrêng amê hlối păn rak rơpŏng kơtiê dêi cheăm Quảng Nhân, tơring A Lưới.

***A kơpong Tây Nguyên, xuân hiăng ai hên tơdroăng pêi pro  vâ “mơnê mâu ai hnoăng’’, mơhno tơdroăng ki “Ai tơdroăng niân tiah hâi kố kơnôm ai hnoăng vâi krâ nah”. A tơring Đăk Glei, kong pơlê Kon Tum, Kŏng ti ngăn on tơhrik Kon Tum tơkŭm po Leh to hngêi nếo ƀă hlối pơcháu 6 toăng hngêi tuăn pâ rơtế ƀă hên tơmeăm hbru ăm mâu rơpŏng kơtiê, rơpŏng kuăn ngo ki kơtiê xơpá, rơpŏng kơtiê ki ai hnoăng, mơngế ai hnoăng ƀă kăch măng a 2 to cheăm Mường Hoong ƀă Ngọc Linh. 

A cheăm tơkăng kong Ia Rvê, tơring Ea Súp, Khu xiâm pơkuâ ngăn Mố đô̆i gak tơkăng kong dêi kong pơlê Dak Lak xuân nếo tơrŭm ƀă mâu tíu pêi cheăng tơkŭm leh hiăng pro klêi ƀă pơcháu “Hngêi tuăn pâ dêi mâu lêng ƀă kuăn pơlê” ăm rơpŏng hngêi pôa Phan Thanh Sang. Hngêi ki kố kơnâ 210 rơtuh liăn, tung mê, 100 rơtuh liăn xua kăn ƀô̆, mâu lêng a mâu đông veăng tơlo, kơxô̆ liăn ki u ối xua rơpŏng hngêi, ƀă nhŏng o xiâm veăng tơlo; mâu kăn ƀô̆, mâu lêng đông tơkăng kong Ia Rvê veăng kum hâi mơjiâng pro.