A rôh hôp tơbleăng hnoăng cheăng hơnăm 2023 dêi Hô̆i đong tơrŭm tối tơbleăng hnê hriâm luât Tơnêi têa po a kơxê lơ 16/3, a Tíu pêi cheăng Chin phuh, mâu kăn cheăng tung Hô̆i đong hiăng tơpui ‘na troăng hơlâ pêi pro pơkâ: Troh hơnăm 2030, ki hlê plĕng nhuô̆m kơxop hlá mơ-éa luât, luât pơkâ athế chiâng tơdroăng ki rơkê tung tơpui tơno dêi rêm khu tung pơlê pơla.

Pôa Trần Lưu Quang, Ngế pro xiâm phŏ hnê ngăn tơnêi têa, Kăn hnê ngăn Hô̆i đong tơrŭm tối tơbleăng hnê hriâm luât Tơnêi têa pơkuâ po rôh hôp. Rơtế ƀă tơdroăng pơkâ mơ’no pơtối mơdêk hnoăng cheăng dêi kơ koan um tơvi, rơ’jíu, mơdêk séa ngăn, mâu kăn cheăng tung Hô̆i đong Tơnêi têa xuân pâ thế Chin phuh xing xoăng liăn vâ tơbleăng hnoăng cheăng tối tơbleăng hnê hriâm luât, malối cho ƀă mâu hdroang kuăn ngo, mâu kong pơlê, tơring, cheăm peăng kong ngo, kơpong hngế hngo, kơpong ai tơdroăng cheăng kâ xơpá ƀă tơring cheăm ki kal ‘na tơdroăng gâk kring.