Đăi ŭy Lê Hữu Nhân- Đô̆i phŏ Đô̆i Kăn sát gak troăng prôk - Tơniăn tơring   Bắc Yên  ăm ‘nâi, tung khế  9/2023, cho khế hok tro pơxiâm lăm hngêi hriâm a hngêi trung pơxiâm mot hơnăm nếo. Vâ mơdêk hlê plĕng, ‘nâi  rak tơniăn ƀăi pêi pro tro luât prôk  drô troăng  ƀă mâu ngế prôk troăng cho mâu hok tro, malối hok tro kuăn ngo ki rêh ối a mâu pơlê hơngế ing hngêi trung, rơxế hon đa ki to vâ lăm hriâm, mâu kăn sát gak troăng prôk kŏng an tơring Bắc Yên hiăng xoăng mâu tôh gak ngăn nhên tung tơring cheăm plâ hâi măng. Đại ŭy Lê Hữu Nhân ăm ‘nâi tơ’nôm: 

 ‘’ Mâu kăn sát gak troăng prôk xing xoăng dêi rơpó, xoăng mâu  tôh lăm gak ngăn plâ hâi măng. Malối ngin tơkŭm ngăn a mâu hok tro ki lâi lơ pro xôi luât môi tiah: tơkŭm dêi rơpó to pơkrip bro dêi pá kố pá tá, pro ăm dêi lo ngôi, ôh tá xâu muâk rak ko drêng kơto rơxế, hlối tơrŭm ƀă kăn pơkuâ hngêi trung tơkŭm po hnê ‘na luât ăm hok tro mơdêk hlê plĕng xuân môi tiah tơkŭm ƀă nôu pâ thế hnê pơchân dêi kuăn ‘nĕng ki pro xôi luât prôk troăng, hlối tơbleăng ăm hngêi trung vâ hngêi trung hôu hnê tro tiô luâtpơkâ.

Hơnăm hriâm 2023-2024, lâp tung tơring Bắc Yên ai 45 to hngêi trung ƀă ai lối 20 rơpâu ngế hok troâ sap râ mầm, râ má môi, má péa, má pái. Vâ mâu vâi o tơmâng hlê mâu tơdroăng hnê, Kăn sát gak troăng prôk Kŏng an tơring Bắc Yên rah xo tơdroăng hnê ăm tơ tro ƀă hơnăm mâu hok tro.  O Lèo Thị Nga Diệu, lâm 11 A, hriâm Hngêi trung yăo yuk thường xuyên tơring Bắc Yên tối:

 ‘’Klêi hmâng hnê tối hâi kô kum a ƀă rêm ngế hlê ‘na Luât prôk drô troăng kân, kum rêm ngế drêng kơto rơxế prôk drô troăng thế xâu muâk râk ko, pôi tá to têi, to pá kố pá tá, pro dêi chiăng iăng pá kố pá tá’’.

O Lèo Thị Nga Diệu tối tơ’nôm: “tơdroăng mê a tơring Bắc Yên ngin hên mâu vâi pú hok tro hâi teăm tro hơnăm kơto rơxê ôh la vâi  hiăng châ nôu pâ ăm kơto, mâu nôu ăm vaia kơto rơxế lăm hriâm. Hên drêng ‘nâ hiăng lo hriâm a hngêi trung, mâu vâi pú ki mê  chơ dêi rơpó kơtâu têi lê, mơhé vâ a troăng kân chô ki mê krâm vâi pú hok tro lo ing hriâm  dế prôk chêng vêh a hngêi.  A hlo xâu rơ iô ‘nâng. Hiăng ai rôh ki ‘nâ a hiăng vâ tro mâu vâi pú ki mê to rơxế têi vâ klâm a. Xâu ‘nâng”.

Tung 9 khế apoăng hơnăm 2023  Đô̆ kăn sát gak troăng prôk, Kŏng an tơring Bắc Yên hiăng tơrŭm ƀă  mâu hngêi trung râ má pái Bắc Yên, Hngêi trung phôh thông hnê kuăn ngo ai tíu kâ koi ối pơtê râ má péa ƀă má pái Bắc Yên, Hngêi trung yăo yuk thường xuyên - hngêi trung hnê tơdroăng cheăng pêi tơkŭm hnê ‘na Luât pro tơniăn drô troăng prôk châ hnê 3 pôe hâi ăm 1 rơpâu 130 ngế hok tro, ăm rơpâu kơtâ hlá mơhéa chêh hnê thế rak tơniăn drô troăng prôk. Ƀơrô ngăn hnê hriâm ƀă hnê mơjiâng tuăn ngôa rơkê  dêi tơring tơrŭm po hnê ăm 42 hdrôh hnê ăm 9 rơpâu 700 ngế kăn ƀô̆ rak ngăn, thái cô ƀă hok tro. Thái Bạc Văn Ân, Ngế phŏ pơkuâ hngêi trung Phôh thông hnê kuăn ngo ai tíu kâ koi ối pơtê râ má péa ƀă râ má pái Bắc Yên ăm ‘nâi:

 “Hngêi trung Phôh thông hnê kuăn ngo ai tíu kâ koi ối pơtê râ má péa ƀă râ má pái Bắc Yên hiăng hnê ăm mâu hok tro ‘na luât ƀă hene tơdroăng pêi pro môi tiah hnê tung rôh koh hlá cờ a hâi môi rêm măng tĭng, tơkŭm po hnê pa gong pakĭng chôu hriâm a lâm tung mê ai mâu đô̆i kăn sát gak troăng prôk  dei kong an tơring Bắc Yên tơrŭm rơtế ƀă hngêi trung vâ tơbleăng hnê ăm vâi o hlê luât prôk drô troăng, ing mê kum hlê hlối xúa luât tung rêh ối ƀă âi o kô hlê tâ tung tơdroăng rak vế pêi pro tro tiô mâu pơkâ dêi Luât’’.

Ƀă hên troăng rơhlâ pêi pro tơdrêng, ai pơxúa châ mơjiâng ƀă mâu tơdroăng pơkâ ki nhên, mê cho, ki hlê plĕng dêi hok tro a tơring kong ngo Bắc Yên dêi kong pơlê Sơn La rế châ mơdêk, mơhé tơdroăng rak tơniăn troăng prôk đi đo cho tơdroăng thế pêi pro, pakĭng tơdroăng veăng tơmâng khât dêi mâu khu râ pơkuâ cheăng hlối rơtế ƀă tâi tâng rêm ngế, vâ túa lem tro prôk rak tơniăn a troăng prôk kô châ pơ eăng troh lâp lu.