Vâ chê môi măng tĭng ahdrối mot pro lêng, păng ‘nâng chiâng lêng tung khu lêng, Tống Duy Nam, bêng Phúc Thành, pơlê kong kơdrâm Ninh Bình hiăng hâk tơngăm châ pro leh mot Đảng, châ tâng tơkêa a ngiâ hlá cơ Đảng, hlá cơ Tơnêi têa. Nam bu cho môi tung mâu kơxô̆ 177 ngế droh rơtăm ai ivá rơkê ƀă hiâm mơno lĕm hbrâ lăm pro mô đô̆i châ khu râ kăn pơkuâ hnê ngăn cheăng Đảng, khu râ kăn pơkuâ kong pơlê Ninh Bình hnê tơ’nôm ƀă tơ’mot Đảng.

Ối tung khu Đảng cho môi tơdroăng ki mơhnhôk kân vâ Nam veăng tơlo ivá hơnăm ối nếo ăm tơnêi têa:

“Á mot Đảng tâ phiu ro, hâk tơngăm ‘nâng xua á cho môi tung mâu ngế châ mot Đảng. Mot pro lêng á kô mơ-eăm hên tâ mê nếo pơtâp châ chăn, pơtâp rêh ối tiô pơkâ vâ chiâng ngế lêng djâ troăng ahdrối’’.

            Xuân tung tơdroăng phiu ro mê, péa ngế lêng nếo dêi Pơlê kong xiâm cho rơtăm La Đức Thắng bêng Hoàng Văn Thụ, pơlê kân Hoàng Mai ƀă Phạm Thế Anh, bêng Đông Ngạc, pơlê kân Bắc Từ Liêm hiăng mơnhên nhên tâ hnoăng dêi châ tơná tung pơla pro lêng ƀă tơdroăng pleăng la ngiâ ah. La Đức Thắng tối:

“Drêng châ mot Đảng môi tiah kố, hnoăng cheăng tiô kơ’nâi mê pro á vâ châ pleăng ƀă xuân pói vâ kô chiâng môi đảng viên djâ troăng ahdrối’’.

            Phạm Thế Anh, bêng Đông Ngạc, pơlê kân Bắc Từ Liêm mê mơnhên:

            ‘’Á hâk tơngăm châ mot đảng viên ahdrối a vâ lăm pro lêng, á hlo á thế mơ-eăm hên ‘nâng, mơ-eăm ƀă klêi kơ’nâi 12 khế mơnúa kô chiâng môi đảng viên lĕm ăm tơnêi têa. Drêng mot tung khu lêng á pơtâp lĕm tro, pêi kêi đeăng mâu hnoăng cheăng châ pơcháu’’.

            Mâu droh rơtăm châ mot Đảng ahdrối mot pro lêng cho mâu kuăn pơlê ki ai ivá rơkê hiâm mơno lĕm, hbrâ vâ lăm pro lêng, ai troăng tơmiât, tá hiêm mơno ƀă tơdroăng pêi cheăng a pơlê, ai tơdroăng pói vâ ối tung khu lêng dêi Đảng hiăng châ khu râ kăn pơkuâ cheăng Đảng mâu pơlê tơmâng hnê tơ’nôm, tơ’mot Đảng. Kố cho tơdroăng ki pêi pro tơtro dêi kăn ƀô̆ râ pơlê, cheăm, môi tiah tối dêi pôa Trần Duy Nhất, Kăn hnê ngăn Vi ƀan cheăm Gia Thịnh, tơring Gia Viễn, kong pơlê Ninh Bình:

“Sap ing apoăng, ngin hiăng trâm mâ ƀă mâu droh rơtăm pleăng hnoăng ƀă droh rơtăm ai troăng tơmiât lĕm ƀă hiăng pơtroh mâu droh rơtăm lăm hriâm, xuân phiu ro hơnăm kố cheăm hiăng tơ’mot châ 2 droh rơtăm ahdrối vâ lăm pro lêng. Vâ tơniăn mâu pơkâ ƀă pơkâ mê, rơpŏng, chi ƀô̆ xuân hiăng tơmâng, tŏng kum, pro tơ’lêi hlâu’’.

            Hên cheăm xuân hiăng mơnhên mơjiâng đảng viên tung droh rơtăm lăm pro lêng cho môi tơdroăng ki mơnhông, laga kơxô̆ droh rơtăm mot pro lêng châ mot đảng a rêm cheăm cho phá dêi pó. Pơlê kong kân Hà Nội tung roh rah xo lêng hơnăm 2024 hiăng tơ’mot Đảng ăm 15 ngế droh rơtăm lăm pro lêng, châ kơxô̆ iâ 0,4% tâi tâng droh rơtăm pro lêng, laga tâi tâng ngế droh rơtăm mot pro lêng châ hriâm tơdroăng ki lĕm Đảng.

Đăi tă Đào Văn Nhận, Kăn phŏ pơkuâ lêng hlối pro Kăn pơkuâ tơbleăng cheăng lêng Khu xiâm pơkuâ lêng pơlê kong xiâm Hà Nội tối ăm ‘nâi:

“Hơnăm kố pơlê kong kân xuân tơkŭm pơkuâ, hnê mơhno ƀă châ tơdroăng ki tơƀrê hôm, tung mê 30 pơlê kân, tơring pơrá tơkŭm po mâu lâm hriâm tâ lĕm Đảng ăm kuăn pơlê klêi kơ’nâi khăm rah xo, chiâng vâ pro lêng, hbrâ mot pro lêng veăng hriâm lâm tâ ki lĕm Đảng. Nôkố tung lâp pơlê kong kân ai dâng 15 ngế kuăn pơlê châ tơ’mot tung Đảng ahdrối vâ mot pro lêng’’.

            Hnê tơ’nôm, tơ’mot Đảng ăm droh rơtăm mot pro lêng cho môi troăng hơlâ kân a hên kong pơlê. Tiô riân tá hâi tŭm, mâu kong pơlê, pơlê kong kơdrâm tung lâp tơnêi têa hiăng tơ’mot châ hrĭng ngế đảng viên cho droh rơtăm ki ai ivá rơkê, hiâm mơno lĕm pro lêng. Kố châ ngăn cho tơdroăng pêi ki kơnâ, hbrâ tŭm tơdroăng ki kal, mơdêk ki hôm kal kí tung droh rơtăm pro lêng ƀă ối pro xiâm kối vâ hnê tơ’nôm, mơjiâng khu kăn ƀô̆ ăm mâu đông lêng xuân môi tiah kăn ƀô̆ ki xiâm dêi khu lêng kuăn pơlê, lêng ki hbrâ a pơlê cheăm klêi kơ’nâi droh rơtăm kêi đeăng hnoăng cheăng pro lêng vêh a hngêi.