Tiô tối tơbleăng dêi Khu xiâm ngăn pơkeăng pơlât hơnăm 2023 dêi Việt Nam dâng 100,3 rơtuh pơ’leăng mâ mơngế, ki tâk pơ’leăng mâ mơngế 0,84%. Kơxô̆  ƀă ki hên gá a kơlo hơnăm dế pêi cheăng vâ chê 70 % pơ’leăng mâ, tung pơla dế ‘mâi hơ’lêh pơ’lêh mâ. Laga, kơxô̆ kuăn pơlê ki hên xuân pá ‘na tơdroăng mơjiâng tơmeăm khoăng ‘na cheăng kâ, kih thuât, rêh ối pơlê pơla, ‘na hyôh kong prâi kơphô̆, thôn pơlê.

Việt Nam cho kong têa ai kơxô̆ mơngế rĕng krâ hên (tiô tối hdrối a pơla mâu hơnăm kơxô̆ kuăn mơngế rĕng krâ hên a hơnăm 2038) kô tơdjâk kân troh hên tơdroăng rêh ối môi tiah khăm pơlât ivá, rêh ối pơlê pơla, ‘na cheăng pêi. Tối mơngêi a hneăng hôp, pôa Trần Hồng Hà Ngế pro xiâm phŏ hnê ngăn tơnêi têa pơkâ thế mơdêk hnê tối, rak ngăn nhên, pêi pro tro, tŭm tơdroăng ki kal dêi luât ‘na pơ’leăng mâ mơngế ƀă mơnhông cheăng kâ; thâ mơjiâng, pê klêi ‘na luât tơdroăng pơ’leăng mâ mơngế tơdâng tơ’mô, môi tuăn, hlối pêi pro tro tiô troăng rơhlâ mơhno kơxô̆ liăn pêi, mơngế ki pêi cheăng, mơjiâng tíu chêh ‘măn tơdroăng kal, tơmeăm tí tăng ‘nâi plĕng, riân mâu tơdroăng pơkâ ‘na kơxô̆.