Mâu hlá mơ-éa chêh tơbleăng tơdroăng a roh hôp tơpui tơno mơnhên hiâm mơno ‘’Mô đô̆i Pôa Hồ’’ mơnhên hiâm mơno yai câ̆p, hiâm mơno môi tuăn ôh tá kâi tâi ƀă Đảng, Tơnêi dêi Khu mô đô̆i pin, cho ki kơía ki xiâm dêi khu mô đô̆i Việt Nam. Hiâm mơno ‘’Mô đô̆i Pôa Hồ’’ cho môi tơdroăng ki pơkâ tro, ki kơnâ ‘na hiâm mơno dêi mơngế mô đô̆i kăch măng, mê cho mơhé drêng lâi, Mô đô̆i xuân tá hiâm mơno ƀă Đảng, tá hiâm mơno ƀă kuăn pơlê, hbrâ tơplâ pleăng dêi châ chăn mơheăm chhá xua rak tơniăn krê dêi Tơnêi têa, xua chuh nghiah xah hô̆i.

Mâu ki kơnâ mê châ mơjiâng ƀă mơnhông mơdêk tung tơdroăng mơjiâng, tơplâ ƀă xông kân dêi Mô đô̆i kuăn pơlê Việt Nam. Tiô yăo sư, tiê̆n sih Hoàng Chí Bảo, kăn cheăng tung Hô̆i đong Lĭ luâ̆n Tơnêi têa mơnhên cho tơxâng ‘’Mô đô̆i Pôa Hồ’’. 

‘’Mô đô̆i Pôa Hồ hiăng chiâng khu ôh tá xê to hriăn plĕng khoa hok, mê cho ối khu chêh pro, mơđah tơbleăng, tíu ki hâk vâ ôh tá kâi tâi dêi văn hok, ngê̆ thuât rơtâ tá tơdroăng pơxá kơnía a tíu ki lâi ai. Mô đô̆i Pôa Hồ tơkŭm môi tíu a tâi tâng mê cho hiâm mơno, tơdroăng khên tơnôu dêi khu mô đô̆i pin. Tối tơdroăng ki má môi ‘na khôi túa lĕm tro Việt Nam rơxông Pôa Hồ Chí Minh, mê tung mê ai khôi túa lĕm tơdroăng cheăng lêng, khôi túa lĕm Mô đô̆i pin’’.

Xông tơpui a hneăng hôp tơpui tơno, Trung tươ̆ng Trịnh Văn Quyết, Kăn phŏ pơkuâ Kơ koan xiâm kal kí, Mô đô̆i Việt Nam mơnhên: inâi ki kơnía krih tơviah ‘’Mô đô̆i Pôa Hồ’’ châ kuăn pơlê loi tơngah, hâk vâ diâp ăm mô đô̆i pin ing roh tơplâ xâ tơtrâ khu lêng kong têa Pơhlăng. Mơhé drêng lâi, mơhé pá puât tơkéa lâi, mơhé thế pleăng châ chăn mơheăm chhá dêi tơná, laga kăn ƀô̆ mô đô̆i tâi tâng khu mô đô̆i tung pơla kố nah xuân pro lĕm tơ’nôm um méa Mô đô̆i Pôa Hồ, thăm ối tung pá puât, thăm rế eăng. Hdrối mâu pơloăng mơnúa nôkố hiâm mơno kố thăm châ mơnhông mơdêk:

‘’Tung tơdroăng nếo nôkố, hnoăng cheăng mơjiâng Mô đô̆i, krá tơniăn cheăng lêng, gak kring krá tơniăn Tơnêi têa ƀă mâu pơkâ rế hía rế kân. Tơdrêng amê, mâu khu hêng hôu tơnêi têa pơtối thăm pêi pro rơdêi ‘’ ‘Nhê tơdroăng hơniâp lĕm’’, pro rơdêi ‘’ pro chiâng tơ-ê’’, ‘’tơmiât ôh tá tro’’ tung khu, ‘’ôh tá prôk tiô troăng kal kí ki lâi’’ Khu mô đô̆i, tối ôh tá tro troăng pơkâ pêi, troăng hơlâ dêi Đảng, troăng hơlâ luât dêi Tơnêi têa ƀă khôi túa lĕm tro dêi Mô đô̆i kuăn pơlê Việt Nam khên tơnôu, hiêm mơno ki lĕm ‘’Mô đô̆i Pôa Hồ’’.

Thăm nếo, ki kơnâ kân kĭn dêi hiâm mơno ‘’Mô đô̆i Pôa Hồ’’ thế đi đo châ rak ƀă mơnhông mơdêk ó rơdêi tâ, vâ tơxâng pơkâ, hnoăng cheăng tung rơxông nếo’’.

Hdrối mâu pơloăng mơnúa ‘’ ‘Nhê tơdroăng hơniâp lĕm’’ nôkố, hên rơkong pơkâ thế mâu troăng vâ mơdriu tơdroăng vâ pleăng, pơtâp, mơnhông mơdêk hiâm mơno ki lĕm ‘’Mô đô̆i Pôa Hồ’’ tung tơdroăng nếo. Tung mê, ai thăm pơkuâ kơtăng, tơdrêng tŭm rêm tơdroăng dêi Đảng; thăm pêi pro rơdêi mơjiâng tơdroăng khôi túa lĕm tung khu mô đô̆i; rak krá tơniăn hiâm mơno ki kơnía Mô đô̆i Pôa Hồ, khŏm tơplâ mơdât chuh ngiah krê.

Hneăng hôp tơpui tơno ƀă hên rơkong tơpui tối nhên mâu tơdroăng xiâm ki phá tơ-ê dêi hiâm mơno ‘’Mô đô̆i Pôa Hồ’’ cho xiâm kối vâ Khu xiâm pơkuâ cheăng Đảng kơvâ Mô đô̆i, Khu xiâm pơkuâ lêng, Kơ koan xiâm kal kí ƀă khu râ kăn pơkuâ hnê ngăn cheăng Đảng, khu râ kăn pơkuâ mâu râ mơnhên troăng hơlâ, troăng pơkuâ, hnê mơhno tâi tâng khu mô đô̆i rak, mơnhông mơdêk ki kơnâ khôi túa lĕm ‘’Mô đô̆i Pôa Hồ’’ tung rơxông nếo; pêi pro ƀlêi trâng hnoăng cheăng mơjiâng Khu mô đô̆i, thăm cheăng lêng, gâk kring Tơnêi têa, tơdrêng amê, cho ki tro ‘na hiâm mơno kăch măng vâ kăn ƀô̆, đảng viên tung Mô đô̆i séa ngăn dêi tơná, pât dêi tơná, mơ-eăm pơtâp, mơdêk hiâm mơno kăch măng, troh lâp lu ki kơnâ khôi túa lĕm tro ‘’Mô đô̆i Pôa Hồ’’ rơxông nếo.

Ki kơnâ khôi túa lĕm tro ‘’Mô đô̆i Pôa Hồ’’ cho tơdroăng ki chiâng mâu ki kơnâ má môi dêi khôi túa lĕm cheăng lêng Việt Nam, châ mâu rơxông kăn ƀô̆, mâu lêng dêi Khu mô đô̆i Việt Nam tơmâng xo, pơtối pêi tiô, tâi ivá mơjiâng ing pơkuâ, tơkŭm po, hnê hriâm, pơtâp dêi Đảng pin ƀă Pôa Hồ Chí Minh, Kăn xiâm hnê ngăn tơnêi têa hneăng apoăng.

Mơnhông mơdêk ƀă pro ăm ki kơnâ khôi túa lĕm tro ‘’Mô đô̆i Pôa Hồ’’ châ rak krá tơniăn ƀă đi đo eăng, kum mơjiâng mô đô̆i Việt Nam krá tơniăn ó rơdêi ‘na kal kí, pro xiâm kối mơdêk ki dâi lĕm tâi tâng, ivá tơplâ, pêi kêi đeăng lĕm tro hnoăng cheăng ki Đảng, Tơnêi têa ƀă kuăn pơlê pơcháu.