Tơpui a rôh po tơdroăng, pôa Vương Đình Huệ, Kăn xiâm hnê ngăn Kuô̆k hô̆i tối ƀriê khât hlo mâu hnoăng cheăng pleăng, veăng kum, hlâ rêh, khéa hơ’nêng dêi kuăn pơlê, kăn ƀô̆, lêng tung rôh hbrâ ví ƀă kong mê khía mơhot têa kân lân lu, on chếo, kong tô mơdrăng ƀă hnoăng cheăng ki rơkê má môi, mâu ngế ki djâ troăng ahdrối rơkê tung tơdroăng tơ’noăng tâi tâng kuăn pơlê veăng hbrâ tơpâ mơdât on chếo ƀă tŏng xo mâu ngế hliăng tiâ.

Pôa Vương Đình Huệ, Kăn xiâm hnê ngăn Kuô̆k hô̆i tối tiah kố, rơtế tơdjuôm ivá, tơdjuôm hiâm mơno ƀă khu lêng ki ai tơdjâk troh tung hnoăng cheăng hbrâ tơpâ mơdât on chếo ƀă tŏng xo mâu ngế hliăng tiâ cho tơdroăng ki veăng hên hĭn dêi mâu rơxông Kuăn pơlê. Ki kơhnâ cho môi tiah, Đô̆i ki hbrâ tơpâ mơdât on chếo ƀă tŏng xo mâu ngế hliăng tiâ ki pơkuâ ngăn xêh pơlê kân Lạc Dương, kong pơlê Lâm Đồng ƀă hiâm mơno ki mơhnŏng pleăng xêh, ivá mơ-eăm tâi tơná tung tơdroăng hbrâ tơpâ mơdât on chếo, tŏng xo mâu ngế hliăng tiâ; môi tiah ngoh Nguyễn Hữu Đốn hiăng khên tơnôu, hlâ drêng tŏng xo mơngế tung môi rôh on chếo a pơlê kong kơdrâm Phan Thiết, kong pơlê Bình Thuận pơla hdrối kố nah; Khu Tŏng kum pơlât ki apoăng FAS Ănglê ƀă túa pơkâ “pơlât mơngế cho tơdroăng ki kal” hiăng kum lối rơpâu ngế ki trâm xía vâ, tơdroăng ki ôh tá tơniăn tung pơla a chê kố hiăng kum pơlât ăm hên ngế tung rôh on chếo ki ó a bêng Khương Đình, pơlê krâm Thanh Xuân, Pơlê kong kân Hà Nội.

Kố cho mâu tơdroăng pêi pro ki lĕm khât, tơdjâk ki rơdêi ‘na hiâm mơno kơhnâ, tiô khôi hmâ “hơ-ui ngế ki ê môi tiah châ chăn dêi tơná” dêi hdroâng mơngế pin.

A rôh po tơdroăng kố, khĕn kơdeăn, ô eăng mâu tơdroăng pêi pro ki lĕm tro, mâu tơdroăng ki khên tơnôu, mâu tơdroăng ki kơhnâ rơkê dêi mâu khu lêng ƀă kuăn pơlê tung hnoăng cheăng hbrâ mơdât on chếo, tŏng xo mâu ngế hliăng tiâ ƀă tơbâ troh mâu kuăn pơlê ki trâm xâu xía mơnê mâu kăn ƀô̆, lêng ƀă kuăn pơlê hiăng khên tơnôu, hlâ rêh piu dêi tơná tŏng xo mâu ngế hliăng tiâ tung rôh on chếo tung pơla hdrối kố nah.

Tung la ngiâ ah, tơdroăng on chếo, trếo pơtôu, tơdroăng xâu xía mơni kô ối ôh tá tơniăn, xơpá vâ ‘nâi hdrối, malối cho a mâu tíu kuăn pơlê rêh ối, hngêi ối ki hên râ, hngêi kuăn pơlê rế vâ ối rế vâ mơjiâng bro, tê mơdró kế tơmeăm, kơchơ, tíu ki tơkŭm ối hên kuăn pơlê. Tiô Kăn xiâm hnê ngăn Kuô̆k hô̆i, tơdroăng kố pâ thế khu Kăn sat tơpâ mơdât on chếo ƀă tŏng xo mâu ngế hliăng tiâ rơtế ƀă rêm râ, mâu kơvâ cheăng athế thăm mơdêk tơdroăng ki hbrâ rơnáu, hbrâ nhên, tro ƀă rơkê ‘na hnoăng cheăng kố.

Pôa Vương Đình Huệ, Kăn xiâm hnê ngăn Kuô̆k hô̆i tối:

“Athế ngăn nhuô̆m hnoăng cheăng hbrâ mơdât, xo tơdroăng ki hbrâ cho tơdroăng ki xiâm, ing mê vâ kơdroh iâ mâu rôh on chếo ƀă tro tơ’nhiê kế tơmeăm xua on chếo, malối cho ‘na kuăn mơngế, rak vế châ chăn dêi kuăn pơlê cho tơdroăng ki rak vế gâk kring kuăn mơngế, cho tơdroăng ki xiâm má môi dêi tơdroăng rak vế gak kring tơniăn, mơnhông tơnêi têa; rak vế ƀă rak vế mâu tơdroăng tơniăn tung hbrâ mơdât on chếo ăm rêm tíu cheăng, rêm kơpong kuăn pơlê rêh ối, rêm rơpŏng hngêi; mơdêk hnoăng cheăng hnê mơhno ƀă tối tơbleăng tơdroăng kal, hnê tối troh lâp lu, tơbleăng nhên, tơbleăng đi đo mâu tơdroăng luât, hnê hriâm ‘na tơdroăng ki hbrâ mơdât on chếo, malối cho tơdroăng ki hbrâ ví ƀă on chếo ăm Kuăn pơlê, mơdêk tơƀrê túa pơkâ “4 tơdrêng” (hnê mơhno tơdrêng, mâu rơxế xúa tơdrêng, kế tơmeăm ƀă mâu ngế ki tŏng kum tơdrêng); mơjiâng ƀă po rơdâ mâu túa pơkâ, tơdroăng môi tiah: Tôh tơrŭm tơniăn hbrâ mơdât on chếo, tíu ki tơpâ on tung pơlê pơla; mơhnhôk kuăn pơlê mơdêk tơdroăng ki hbrâ kơchăng, pêi pro kơtăng mâu troăng hơlâ hbrâ mơdât, hbrâ ví teăm tơdrêng, tơpâ on chếo, trếo pơtôu tiô túa ki tơƀrê má môi”.

Pakĭng mê, tơkŭm po séa ngăn tơniăn tơpâ mơdât on chếo tung lâp tơnêi têa, malối cho a mâu kong pơlê, tíu ki mơni tơ’lêi tro on chếo; pơtối séa ngăn mâu tơdroăng pơkâ ‘na luât mơjiâng, ‘mâi rơnêu, ‘mot tơ’nôm teăm tơdrêng, tơtro, ƀă mâu tơdroăng pơkâ, túa pơkâ hbrâ mơdât on chếo.

Kăn xiâm hnê ngăn Kuô̆k hô̆i pơchân, kal rĕng khĕn kơdeăn, mơhnhôk, po rơdâ mâu ngế ki djâ troăng ahdrối, mâu ngế ki kơhnâ rơkê; tơdrêng amê hlối mơdêk hnoăng cheăng séa ngăn,vâ teăm châ hlo, ‘mâi rơnêu, pơxâu phâk kơtăng mâu ngế ki pro xôi tung hnoăng cheăng hbrâ tơpâ mơdât on chếo ƀă tŏng xo mâu ngế hliăng tiâ.

Drêng kố, pôa Vương Đình Huệ, Kăn xiâm hnê ngăn Kuô̆k hô̆i krếo thế mâu khu râ, pơkuâ cheăng ƀă tâi tâng kuăn pơlê mơdêk tâ nếo ki hlê plĕng, pôu râng hnoăng cheăng ‘na hnoăng cheăng hbrâ tơpâ mơdât on chếo, pôi tá tơngôu, ôh tá vâ hmâng; rêm ngế kuăn pơlê, rêm rơpŏng hngêi athế pêi pro kơtăng mâu tơdroăng pơkâ dêi luât ‘na hbrâ tơpâ mơdât on chếo.