Tơbleăng mơgêi hneăng hôp, pôa Vương Đình Huệ  Kăn xiâm hnê ngăn Kuô̆k hô̆i ăm ‘nâi, kơ’nâi 1 hâi pêi cheăng kơtăng khât, thâ pê rĕng klêi, Hneăng hôp hiăng tơpui klêi tâi tâng mâu tơdroăng ki pơkâ ƀă 18 tơdroăng veăng hnê tối tơbleăng tung mâu tơdroăng ki chêh.

Kăn xiâm hnê ngăn Kuô̆k hô̆i  khê̆n kơdeăn, Hô̆i đong hnê ngăn kuăn pơlê mâu kong pơlê hiăng veăng hnê tối hên tung tơdroăng cheăng tơdjuôm dêi tơnêi têa, a tơdroăng mơnhông cheăng kâ, rêh ối dêi kong pơlê; tối nhên, tâng hơnăm 2022 hiăng ai tơdroăng ki nếo tung tơdroăng cheăng dêi Hô̆i đong hnê ngăn kuăn pơlê rêm râ mê  troh hơnăm kố thăm mơhno, tơdroăng ki nếo mê  nếo ai hên tâ, troh lâp lu tâ, ăm hlo tơƀrê tâ ƀă tơ’mô tâ.

Tơdroăng cheăng dêi Hô̆i đong hnê ngăn kuăn pơlê thăm rế tơƀrê, achê trơ tro, veăng ‘no hnoăng kal khât tung pêi pro tơdroăng mơnhông cheăng kâ - rêh ối. Mâu kong pơlê ai tơdroăng cheăng pêi dêi  Hô̆i đong ki tro cho xo liăn ngân ăm tơnêi têa ƀă pêi cheăng tâk tơƀrê hên. Hô̆i đong hnê ngăn kuăn pơlê mâu kong pơlê hiăng tơmâng pêi pro tro tiô luât, tơbleăng mâu tơdroăng cheăng pêi ‘na luât, mơjiâng luât, séa ngăn ƀă pơkâ  mâu tơdroăng ki kal, tâ phĭu vâ rah xo; pêi pro tro tơdroăng cheăng ‘na pơ’lêh kơxô̆, ‘na tơpui kâ; ai hên ki pơ’lêh nếo, tơƀrê tâ tung tơdroăng cheăng, malối cho rôh hôp dêi Hô̆i đŏng hnê ngăn kuăn pơlê  rế châ nhoăm; tơdroăng tơdah kuăn pơlê pêi tro tâ ƀă mâu pơkâ, tơdroăng ki nếo vâ mơnhông ƀă tơdroăng xua vâ mơnhông tơƀrê dêi kong pơlê; tơdroăng hnê tơbleăng tung hlá mơ-éa rơ’jiu châ tơmâng. 

Vâ ai tiô tơdroăng mê, tiô pôa Vương Đình Huệ, Kăn xiâm hnê ngăn Kuô̆k hô̆i, Hô̆i đong hnê ngăn kuăn pơlê rêm râ  hiăng tơmâng pêi pro hnê mơhno dêi râ ủy, tơdroăng pơkâ dêi tíu xiâm, Kuô̆k hô̆i, Chin phuh; tơmâng hnê mơhno dêi tíu xiâm tơnêi têa, Chin phuh. Malối, Kuô̆k hô̆i hiăng pơkâ mâu tơdroăng  pơkâ ki xiâm tro luât, kơxâp hlá mơ-éa vâ hơ’lêh ki nếo tung tơdroăng cheăng séa ngăn dêi Hô̆i đong hnê ngăn kuăn pơlê, mâu tơdroăng tơvâ tơvân dêi Hô̆i đong hnê ngăn kuăn pơlê dêi  mâu kong pơlê kuăn pơlê hiăng châ Khu kăn pơkuâ cheăng Kuô̆k hô̆i tiâ ƀă hlá mơ-éa chêh tŭm tung mê. Pakĭng mê cho tơdroăng hriĕn tăng ngăn, pơ’lêh nếo dêi mâu ngế tung khu kăn Hô̆i đong hnê ngăn kuăn pơlê; tơdroăng tơrŭm krá pơla mâu kăn ƀă Hô̆i đong hnê ngăn kuăn pơlê, tơrŭm ƀă mâu kơvâ cheăng tung kong pơlê, mâu kơ koan dêi Kuô̆k hô̆i ...

Tung la ngiâ, pôa Vương Đình Huệ Kăn xiâm hnê ngăn Kuô̆k hô̆i pơkâ thế, Hô̆i đong hnê ngăn kuăn pơlê tơmâng pêi pro nhên tro hnoăng pơkuâ dêi rêm râ ủy, mâu kăn râ ủy ƀă mâu khu tơrŭm cheăng dêi Hô̆i đong hnê ngăn kuăn pơlê, Kố  cho mâu ngế ki pơkâ  troh tơdroăng pêi pro tro ivá cheăng, tơdroăng cheăng pêi ki châ pơcháu.

“ Ngin pơkâ thế pơtối mơdêk hnoăng cheăng pêi dêi kơ koan ki kuăn pơlê rah xo dêi kong pơlê tiô pơkâ dêi luât vâ pê klêi mâu tơdroăng cheăng hơnăm 2024. Tung mê, pơtối séa ngăn, pê klêi mâu hlá mơ-éa  chêh mơjiâng luât dêi kong pơlê. Klêi pêi cheăng tro hnoăng tơná, Hô̆i đong hnê ngăn kuăn pơlê, pơtối veăng ‘no hên hnoăng tâ nếo, tơmâng pêi pro kơhnâ khât a hnoăng cheăng tâ nếo ‘na mơjiâng luât ƀă mâu pơkâ, malối  cho mâu luât ai tơdjâk troh tơdroăng  cheăng kâ, rêh ối dêi kong pơlê. Tung hơnăm kố ai hên tơdroăng pơkâ ki krê dêi kong pơlê kố châ séa ngăn ƀă pơkâ thế pêi pro.  Ngin pơkâ thế Hô̆i đong hnê ngăn kuăn pơlê mâu kong pơlê, ngăn a mâu luât, tơdroăng Pơkâ ki hiăng tơbleăng pêi vâ ai tơdroăng pơkâ tơbleăng pêi ăm tơtro  ƀă mâu tơdroăng tơkêa luât, malối cho tơdroăng tơkêa Luât tơnêi tơníu hơnăm 2024, Luât tê mơdró tơnêi, hngêi trăng, Luât hngêi ối, Luât Tơmeăm khoăng tung kơdâm tơnêi têa, Luât Căn cước, Luât mâu lêng ki kring gak pro tơniăn a pơlê cheăm bêng... Tung mâu luât ki mê ai hên mâu tơdroăng chêh nhên vâ pơcháu ăm mâu kong pơlê’’.

Tối nhên thế pơ’lêh pro nếo tung tơdroăng rak vế pêi pro tiô luât, tơdroăng Pơkâ dêi Kuô̆k hô̆i, Kăn xiâm hnê ngăn Kuô̆k hô̆i pơkâ thế Hô̆i đong hnê ngăn kuăn pơlê mâu kong pơlê thế xo pêi hlối ing nôkố, tung mê ai Pơkâ ‘na 3 Tơdroăng pơkâ pêi dêi tơnêi têa. La ngiâ, Kuô̆k hô̆i kô tơkŭm po séa ngăn mâu hlá mơ-éa pêi cheăng, xua mê, Hô̆i đong hnê ngăn kuăn pơlê dêi mâu kong pơlê kal séa ngăn mâu hlá mơ-éa chêh xua kong pơlê pơkâ, tah mâu hlá mơ-é ki pro pá, hên hĭn tơvâ tơvân hlá mơ-éa ki ôh tá ka; hlối tăng ngăn nếo sap ing apoăng  hlá mơ-éa chêh ‘no liăn pêi cheăng tơmeăm khoăng tơnêi têa.

Kăn xiâm hnê ngăn Kuô̆k hô̆i xuân tối pơchân, Hô̆i đong hnê ngăn kuăn pơlê pơtối pơ’lêh nếo tâi tâng mâu tơdroăng cheăng tá tơdroăng pơ’lêh nếo  rôh hôp dêi Hô̆i đong hnê ngăn kuăn pơlê cho ki xiâm, tơmâng khât Hô̆i đong hnê ngăn kuăn pơlê rêm râ tơring, tơmâng khât troh Hô̆i đong hnê ngăn kuăn pơlê rêm râ cheăm; mơhhôk tơ’noăng pâ nhoăm tơnêi têa; mơhnhôk pêi tơƀrê dêi mâu kăn Hô̆i đong hnê ngăn kuăn pơlê, tơmâng khât a tơdroăng hnê mơjiâng tuăn ngôa rơkê, hriâm tơ’nôm; mơnhông tơdroăng cheăng hnê mơhnhôk kuăn pơlê a kong pơlê, malối cho mâu tơdroăng nếo ‘nâi, xăm phoăng ki hên ngế, ki tơvâ tơvân, pakĭng mê mơdêk hơ’lêh nếo trâm mâ kuăn pơlê./.