Phá tơ-ê ƀă tơdroăng tiah hmâ, a hneăng hôp rôh kố, Kuô̆k hô̆i kơ-êng tiô khu kơvâ cheăng teăng mâu khu tơdroăng. Tiah mê, mâu ngế cheăng tung Chin phuh ki kal xuân hbrâ rơnáu rơkong tiâ mơnhên mâu tơdroăng ki châ kơ-êng ai tơdjâk troh hnoăng cheăng pơkuâ ngăn, pơkuâ; hvái ngăn mâu tơdroăng ki tơná hiăng tơhrâ hiăng pêi pro klêi troh dâng lâi. Tạ Văn Hạ, ngế ki lo ing Quảng Nam mơnhên tối khât rôh kơ-êng dêi ngế xiâm pơkuâ ƀă mâu kăn cheăng dêi Chin phuh, peăng rôh tiâ mê hlo pêi pro châ tiô tơdroăng ki châ mâu kăn Kuô̆k hô̆i hiăng pơkâ mơ’no.

Tơdroăng ki hơ’lêh nếo kố pro mâu ngế cheăng dêi Chin phuh, kăn pơkuâ ngăn dêi mâu kơvâ cheăng kal ‘nâi nhên, séa ngăn tro tung tơdroăng. Kố xuân cho môi rôh tơ’lêi vâ mâu kăn Kuô̆k hô̆i séa ngăn mâu ngế xiâm pơkuâ ƀă mâu ngế cheăng tung Chin phuh tung tơdroăng pêi pro tơhrâ dêi tơná a mâu rôh hôp kơ-êng.

“Mâu kăn Kuô̆k hô̆i pơkâ mơ’no mâu tơdroăng, séa ngăn tung mâu tơdroăng pơkâ, hiăng hriăn ngăn nhên mâu tơdroăng pơkâ séa ngăn kơ-êng dêi Kuô̆k hô̆i. Mâu ngế xiâm pơkuâ tơdah xo rơkong kơ-êng ƀă tiâ mơnhên xuân tơdrăng, tro tiô mâu tơdroăng ki mâu kăn kal vâ ‘nâi plĕng. Mâu kăn xuân tí tăng troh tui, tơpui tơno troh tơdroăng ki tro tơdrăng troh mơ’nui.

Pakĭng tơdroăng kơ-êng la tơdrêng amê xuân mơ’no tối hên rơkong tơpui, pâ thế hên troăng hơlâ vâ kum ăm Chin phuh kum ăm mâu ngế xiâm pơkuâ mâu kơvâ cheăng tung hnoăng cheăng pơkuâ gá tro tâ”.

Jâ Tô Thị Bích Châu, ngế ki lo ing Pơlê kong kân Hồ Chí Minh tối tiah kố, rôh kơ-êng ƀă tiâ kố hlo hơniâp ro, rơkong kơ-êng dêi mâu kăn mơ’no a hngêi hôp kân cho mâu tơdroăng ki kuăn pơlê kal châ ‘nâi. Laga, ƀă mâu kơvâ cheăng môi tiah khăm pơlât, hnê hriâm, mơhno túa lĕm tro ƀă hên ki ê chôu mơdoh ăm mâu kăn kơ-êng gá iâ luâ râ, chôu pơkâ ăm mâu ngế pơkuâ kơvâ cheăng tiâ tá hâi tŭm vâ tiâ mơnhên tâi mâu tơdroăng ki kuăn pơlê kal vâ ‘nâi.

“Pin tơkŭm kơ-êng hên tơdroăng luâ râ, tâi tâng mâu tơdroăng cheăng kâ, mơhno túa lĕm tro, kal kí, gâk kring, tơniăn dêi tơnêi têa mê 2,5 hâi ôh ti bê. Xua mê, mâu rơkong kơ-êng dêi mâu ngế xiâm pơkuâ, ngế pơkuâ mâu kơvâ cheăng xuân bu iâ, bu a kơlo ki ôh tá hên ôh tá iâ tê. Xua mâu kăn rơhêng vâ hlê trâu, hlê nhên ăm tơdroăng tơpui tơno hên hdroh. Xua mê, tâng ai kơ-êng a mâu rôh hôp la ngiâ, tiô á tơmiât mơni kô rah xo mâu tơdroăng ki kal tê”.

Séa ngăn rôh hôp kơ-êng ƀă tiâ a hneăng hôp má 6, Kuô̆k hô̆i hneăng má 15, pôa Lê Hữu Chỉnh, ối a bêng Thắng Lợi, pơlê kong kơdrâm Ƀuôn Ma Thuột, kong pơlê Dak Lak tối tiah kố hnoăng cheăng kơ-êng a hneăng hôp má 6 hiăng mơhno tơdroăng ki tơdrăng, nhên. Ngế kơ-êng ƀă ngế tiâ hbrâ rơnáu nhên, ‘nâi nhên mâu tơdroăng.

“Péa hâi tơdế kơ-êng ƀă tiâ, á mơnhên tối mâu kăn pơkuâ kơvâ cheăng tiâ gá tro khât, Ngế pro xiâm hnê ngăn ƀă kăn xiâm hnê ngăn Kuô̆k hô̆i xuân tiah mê há. Á tối tiah kố ai hên tơdroăng ki hơ’lêh. Tơdroăng pơkâ kân má môi ki châ rơhéa sap ing gâk kring kal kí troh cheăng kâ rêh ối pơlê pơla ƀă malối cho Kuô̆k hô̆i ƀă Chin phuh hiăng pơchân ‘na kuăn mơngế, pơtih tối ‘na ki hơ’lêh liăn khế; pơtih kơvâ hnê hriâm, khăm pơlât, mơhno túa lĕm tro châ mơdêk khât; rơtế ƀă tơdroăng ki xiâm troăng prôk, kơno tuk, tơraih tơƀai mê nếo mơ-eăm vâ ai troh 3 rơpâu km troăng kân tung hneăng ki kố á tơmiât cho tơdroăng ki kân khât. Cho môi ngế kuăn pơlê á phiu ro khât ƀă tơngah Kuô̆k hô̆i kô pêi klêi mâu tơdroăng cheăng”.

Mơnhên tối ‘na rôh tiâ dêi pôa Trần Lưu Quang, Ngế pro xiâm phŏ hnê ngăn tơnêi têa, Nguyễn Thị Sửu, ngế ki lo ing Thừa Thiên Huế ăm ‘nâi:

“Á hlo tơdroăng ki tơdrăng, khên tơnôu xo dêi âu tơdroăng cheăng ki ôh tá tro, hiăng khên tơnôu xo mâu tơdroăng ki mê mê kô ‘mâi rơnêu mâu tơdroăng ôh tá tro ƀă tăng hlo tơdroăng châ pơkâ tơleăng, troăng prôk ăm mâu tơdroăng ki xơpá, tơvâ. Ôh ti xê mâu kăn ki lâi rơhêng vâ kơ-êng mâu tơdroăng ki mê hlo gá xơpá, kal athế châ pơkâ tơleăng, kal ai tíu hgiên ki Chin phuh cho môi tung mâu tíu hơgiân tơniăn chiâng vâ tŏng kum ‘na troăng hơlâ ‘na hiâm mơno tơmiât, tơdroăng púi rơhêng vâ dêi kuăn pơlê”.