Mâu hơnăm hiăng hluâ, tơdroăng ‘’Hơngui gâk tíu tơkăng kong – Hơtôu hiâm mơno kuăn pơlê’’ châ khu mô đô̆i gâk tơkăng kong kong pơlê Gia Lai pêi pro tơrêm a mâu cheăm tơkăng kong Ia Grai, Đức Cơ, Chư Prông, dêi kong pơlê Gia Lai. A rêm tơdroăng pêi pro, mâu mô đô̆i gâk tơkăng kong rơtế kuăn pơlê kơxuô kơƀăn tơxông, tôu chêng koăng, rơtế dêi pó hơdruê xuăng vâ tơdjêp tuăn pâ khu lêng – kuăn pơlê.

Rơtế ƀă mê, mâu ngế ki tŏng kum mơngế pá puât tơkŭm po mâu tíu tê tơmeăm 0 liăn, diâp ăm kuăn pơlê hrĭng kơxuô tơmeăm cho pơkhom, kơmung, phái ƀă kơxop mơ-éa, tơmeăm xúa hriâm tâp ăm hok tro. Đăi tă Nguyễn Văn Nghị - Kăn phŏ pơkuâ hnê ngăn cheăng Đảng Khu pơkuâ Mô đô̆i gâk tơkăng kong kong pơlê Gia Lai tối:

“Kuăn pơlê phiu ro ‘nâng, loi tơngah a khu mô đô̆i tối tơdjuôm, ƀă mô đô̆i gak tơkăng kong tối krê, tơdrêng amê thăm krá tơdroăng rŭm môi tuăn pơla khu lêng kuăn pơlê, rơtế dêi pó drêng sôk suâ, kum dêi pó drêng pá puât; Kố xuân cho xiâm kối vâ kuăn pơlê rơtế dêi pó pơla mâu pơlê, pêi pro lĕm tro tâ troăng hơlâ dêi Đảng ƀă Tơnêi têa tung mơjiâng tơdroăng rêh ối khôi túa lĕm tro kơpong kuăn pơlê rêh ối’’.

            Tung mâu hâi apoăng hơnăm nếo 2024, mâu tơdroăng pêi ki kơnâ, kơdrâm phiu ro xua mâu đông mô đô̆i gâk tơkăng kong mơhnhôk, hiăng kum kuăn pơlê thăm phiu ro, sôk xua. Jâ Nguyễn Thị Lành – Kăn phŏ hnê mơhno má môi tơdroăng cheăng Đảng tơring Ia Grai, kong pơlê Gia Lai tối ăm ‘nâi:

            ‘’Thế mơnhên cho drăng lâi ai mơngiơk ngiât dêi khu mô đô̆i gâk tơkăng kong, mê a mê ai mơngiơk ngiât dêi tơdroăng rêh ối phâi hơtô, hơniâp lĕm dêi kuăn pơlê. Mô đô̆i gâk tơkăng kong hiăng hnê mơhno kuăn pơlê mơnhông cheăng kâ, pêt mơjiâng loăng plâi, mơnăn păn, mơjiâng tơdroăng rêh ối khôi túa lĕm tro kơpong kuăn pơlê rêh ối; ki rơhêng vâ tối hnê mơhno kuăn pơlê tung tơdroăng mơ’no hrê liăn, kơdĭng liăn, pro pơhlêh troăng tơmiât troăng pêi vâ mơ-eăm hluăn ing kơtiê krá tơniăn’’.

            A cheăm tơkăng kong Krông Na, tơring Ƀuôn Đôn, kong pơlê Dak Lak, Mô đô̆i gâk tơkăng kong Dak Lak tơrŭm ƀă râ kơvâ cheăng kong pơlê tơkŭm po Tơdroăng pêi ‘’Hơngui gâk tơkăng kong hơtô hiâm mơno kuăn pơlê – Têt Giáp Thìn 2024. Sap ing kơxo má, hrĭng kuăn pơlê a cheăm Krông Na ƀă kơpong ki achê mê hiăng tơkŭm a Hngêi pơkeăng cheăm Krông Na, tíu pêi cheăng Vi ƀan cheăm veăng hâi tơkŭm kơdrâm phiu ro. Kuăn pơlê châ veăng mâu tơdroăng ki kơnâ, kal khât păng ‘nâng môi tiah khăm pơlât, xing xoăng pơkeăng tê kơtê; tiô rơkong kơ-êng, rơkâu Têt, kơƀăn tơxông, kơxuô tơmeăm Têt, hnoăng liăn hriâm rơkê ăm hok tro ing khu mô đô̆i gâk tơkăng kong ƀă mâu ngế ki tŏng kum mơngế pá puât...

Rơtế ƀă mê, kuăn pơlê châ pơtâng tối, hnê mơhno rơtế tơrŭm ƀă khu mô đô̆i gâk tơkăng kong veăng gâk kring tơniăn, troăng tơkăng kong ƀă gâk kring tơkăng kong tơnêi têa. Ngoh Y Quyết Êban, hdroâng kuăn ngo M’Nông, kuăn pơlê a ƀuôn Trí A, cheăm Krông Na, tơring Ƀuôn Đôn tối ăm ‘nâi, mâu kơxuô tơmeăm ƀă mâu tơdroăng pêi dêi kăn ƀô̆ mô đô̆i gâk tơkăng kong Dak Lak hiăng pro hơtô hiâm mơno kuăn pơlê tung pơlê roh Têt troh hơngui vêh:

“Troh ƀă hâi tơkŭm kơdrâm phiu ro ‘’Hơngui gâk tơkăng kong hơtôu hiâm mơno kuăn pơlê a pơlê’’ kuăn pơlê phiu ro. Peăng khu tơkŭm po hiăng tơkŭm po mâu tơdroăng xah hêi tiô khôi vâi krâ nah, khăm pơlât ƀă xing xoăng pơkeăng tê kơtê, tơdah kơxuô kơƀăng tơxông, kơƀăn Têt... Ing hâi tơkŭm kơdrâm phiu ro, kuăn pơlê châ trâm mâ, hriâm a dêi pó, rŭm môi tuăn pơla khu lêng – kuăn pơlê, ai tơdroăng phiu ro rêm roh Têt troh hơngui vêh’’.

Tơdroăng ‘’Hơngui gâk tơkăng kong – Hơtôu hiâm mơno kuăn pơlê a pơlê’’ cho tơdroăng pêi tiah hmâ rêm hơnăm dêi Khu pơkuâ Mô đô̆i gâk tơkăng kong kong pơlê, vâ kum kuăn pơlê mâu cheăm tơkăng kong ai Têt hơtôu, tŭm, phiu ro; tơdrêng amê thăm krá tơniăn tâ nếo tuăn pâ khu lêng kuăn pơlê trâu hơngế tâ mê tíu tơkăng kong; mơhnhôk kuăn pơlê mâu hdroâng kuăn ngo, kăn ƀô̆, mâu lêng kơpong tơkăng kong pơtối rŭm môi tuăn, tơdjuôm ivá môi hiâm mơno pêi pro hnoăng cheăng gâk kring hnoăng pơkuâ tơkăng kong dêi pơlê xiâm.

Tơdroăng pêi ‘’Hơngui tơkăng kong hơtôu hiâm mơno kuăn pơlê a pơlê roh Têt Giáp Thìn 2024” châ Khu xiâm pơkuâ Mô đô̆i gâk tơkăng kong Dak Lak pêi pro sap ing hâi lơ 13/1 troh hâi lơ 4/2, a 4 cheăm mê cho Krông Na ối tung tơring Ƀuôn Đôn, mâu cheăm Ea Bung, Ia R’vê ƀă Ia Lốp dêi tơring Ea Súp. Tung roh kố, kô ai rơpâu kơxuô tơmeăm kơnâ 752 rơtuh liăn diâp ăm mâu rơpŏng a kơpong tơkăng kong dêi kong pơlê Dak Lak. Đăi tă Đỗ Quang Thấm – Kăn pơkuâ hnê ngăn cheăng Đảng Khu xiâm pơkuâ Mô đô̆i gâk tơkăng kong kong pơlê Dak Lak tối ăm ‘nâi:

“Hơnăm 2024 mê ngin kô tơkŭm po tơdroăng ‘’Hơngui gâk tơkăng kong hơtô hiâm mơno kuăn pơlê a pơlê’’ a tâi tâng mâu cheăm tơkăng kong dêi kong pơlê Dak Lak. Troăng hơlâ dêi ngin cho hơnăm kố kô tơkŭm po pêi pro rĕng, ƀă pơkâ pêi plâh ôh ai kơbố a kơpong tơkăng kong tro lôi pa rŏng, ôh tá ai tơmeăm vâ kâ Têt. Ing mê, tŏng kum ƀă kuăn pơlê a kơpong tơkăng kong kơdroh pá puât, tơniăn tơdroăng rêh ối hmâ rêh ối hmâ ƀă a tơkăng kong, rơtế khu mô đô̆i gâk tơkăng kong krá tơniăn hnoăng pơkuâ gâk kring tíu tơkăng kong tơnêi têa’’.