Cheăm Ea Tiêu, tơring Čư̆ Kuiñ, kong pơlê Dak Lak nôkố ai vâ chê 5.400 rơpŏng ối tung 18 hdroâng kuăn ngo rêh ối a 21 to thôn, pơlê. Tung mê, hdroâng kuăn ngo châ vâ chê 40%. Tung mâu hâi hdrối nah, mâu ngế kơtiê a cheăm châ kum bro 175 toăng hngêi tiô Pơkâ 167 dêi Chin phuh ƀă tâi tâng kơxô̆ liăn châ 6,9 rơtal liăn; 72 to ro hdrê; pro 4 toăng hngêi tơrŭm.

Mơdêk hiâm mơno tơrŭm, kuăn pơlê tung cheăm kơhnâ pêi cheăng kâ, tơdjuôm ivá mơjiâng thôn pơlê nếo. Kơnôm mê, troh nôkố ngiâ méa thôn pơlê hiăng hơ’lêh hên, lối 98,6% kơxô̆ rơpŏng tung cheăm ai hngêi lĕm, 98% kơxô̆ rơpŏng ai rơxế hon đa, lối 90% kơxô̆ rơpŏng châ xúa têa ôu kâ hum roh krúa, tâi tâng kơxô̆ rơpŏng pơrá châ xúa on tơhrik đi đo tơniăn.

Cheăm ai lối 4 rơpâu rơpŏng châ mơnhên tŭm tơdroăng mơhno túa lĕm tro rơkê plĕng, 18 thôn, pơlê châ mơnhên thôn, pơlê hlê plĕng. Mâu khôi hmâ mơhno túa lĕm tro tung pơlê pơla châ rak vế, môi tiah: mơhno túa lĕm tro, rak ‘măn, tŏn mơđah chêng koăng, teăn ếo pơtâk.

A hâi mơdĭng, tung idrâp chêng koăng ki hơniâp ro ƀă tơdroăng hơdruê xuăng, rơngê ting ting ki hên mơngiơk mơhno túa lĕm tro, mâu kăn hiăng rơtế hơ’muăn khôi hmâ dêi măt trâ̆n tơnêi têa Việt Nam, châ ôu drôu xiâm ƀă veăng ro tung mâu tơdroăng cheăng dêi hâi po mơdĭng, môi tiah: tơ’noăng pêi báu, klŭp mâ tŏn chêng, tơdúa kơxâk ƀă trut loăng. Ai mâ sap ing kơxo má a kơpong tơkŭm vâ veăng tung hâi mơdĭng, jâ H’Bel Knul, a ƀuôn Kram, cheăm Ea Tiêu tối: hâi mơdĭng cho rôh vâ kuăn pơlê a mâu thôn pơlê tung cheăm trâm mâ, tơ’noăng mâu môn tơ’noăng khôi hmâ, bro ăm tơdroăng rế hơniâp ro tâ.

“Tơdroăng ki hơniâp ro hâi mơdĭng tâi tâng vâi krâ nhŏng o pơrá veăng hơniâp ro. Mâu tơdroăng cheăng khôi hmâ dêi hdroâng kuăn ngo tơná môi tiah hơdruê hdroâng, chêng koăng, trut loăng, tơdúa kơxâk, pêi báu mê pin veăng ai mâ tŭm”.

Tiô pôa Chu Thanh Tấn, Kăn hnê ngăn Vi ƀan Măt trâ̆n tơnêi têa Việt Nam tơring Čư̆ Kuiñ, Hâi mơdĭng tơrŭm tâi tâng hdroâng kuăn ngo hiăng chiâng tơdroăng cheăng ki tiah hmâ châ tơkŭm po a khế 11 rêm hơnăm a cheăm. Ing mê, veăng kum ‘mâi mơnhông tro tâ tơrŭm cheăng tơniăn lĕm pơla mâu cheăm tung kuăn pơlê rêh ối. Tung hâi po mơdĭng, mâu thôn pơlê pơrá tơkŭm po mâu tơdroăng cheăng pơlê pơla ƀă mơhnhôk tơlo liăn sap ing pơlê pơla vâ kum ăm mâu ngế ki xơpá.

“Tâng pơchông ƀă rêm hơnăm mê tơdroăng ki tơkŭm po hâi mơdĭng rế hơniâp ro tâ, hên thôn tơkŭm hên tâ, túa tơkŭm po tro tâ. Vâi krâ nhŏng o troh veăng a hâi mơdĭng hên, tơrŭm drêng mâu hdroâng kuăn ngo rêh ối ƀă pêi cheăng a tơring Čư̆ Kuiñ veăng ai mâ tŭm, kơxô̆ ngế veăng hên ƀă mâu tơdroăng cheăng tŏng kum pơlê pơla xuân châ rêm râ tơmâng ngăn hên tâ”.

Veăng a hâi mơdĭng, pôa Bùi Văn Cường, ngế chêh tôm xo rơkong, kăn ngăn Ƀơrô mơhno túa lĕm tro Kuô̆k hô̆i mơnhên tối khât mâu tơdroăng ki hiăng pêi pro klêi ki khu kăn pơkuâ ƀă kuăn pơlê cheăm Ea Tiêu hiăng pro tung pơla hdrối kố. Tối tơdroăng tơngah ƀă rơhêng vâ kuăn pơlê pơtối tơrŭm, tơngah tung tơdroăng pơkuâ dêi Đảng ƀă Tơnêi têa, mơdêk khât hiâm mơno hbrâ kơchăng, tơplâ mơdât mâu tơdroăng tơmiât bro ôh tá tro vâ bro tơklâ khô̆i tơrŭm tâi tâng hdroâng kuăn ngo. Kố cho tơdroăng ki tối nhên ƀă tơdjâk hiâm mơno dêi hâi mơdĭng tơrŭm tâi tâng hdroâng kuăn ngo tung pơlê pơla.

“Ƀă tơdroăng ki hơniâp ro dêi hên hĭn mâu hdroâng kuăn ngo dêi Việt Nam pin, ƀă môi hiâm mơno tơrŭm, malối cho tung pơla tơring Čư̆ Kuiñ cho môi tơring ki nếo pơla hdrối kố nah ai tơdroăng ki ôh tá tơniăn a hâi lơ 11/6. Xua mê, tơdroăng ki hâk vâ, túa tơkŭm po ƀă tơdroăng ki phiu ro dêi hdroâng kuăn ngo mê rế cho môi tơdroăng ki pơxúa, ing mê, rế pro tơrŭm krá pơla mâu hdroâng kuăn ngo”.

Drêng kố, pôa Bùi Văn Cường prế pôa Y Thanh Hà Niê Kdăm hiăng diâp kơxô̆ liăn bro hô̆i trương ăm thôn 10 cheăm Ea Tiêu ƀă thôn 2 cheăm Čư̆ Êwi, rêm toăng kơnâ 300 rơtuh liăn; diâp tơmeăm ăm mâu thôn pơlê, rơpŏng ai hnoăng tơnêi têa, ngế ki châ kuăn pơlê loi a tơring Čư̆ Kuiñ. Vi ƀan Măt trâ̆n Tơnêi têa Việt Nam tơring Čư̆ Kuiñ xuân diâp liăn bro 9 toăng hngêi tơrŭm ăm mâu rơpŏng kơtiê a mâu cheăm.

Tơdroăng ki tơkŭm po Hâi mơdĭng tơrŭm tâi tâng hdroâng kuăn ngo a mâu kơpong kuăn pơlê rêh ối hiăng chiâng tơdroăng ki lĕm tiô khôi hmâ, ăm hnoăng cheăng Măt trâ̆n vêh ƀă pơlê pơla, tơmiât troh rêm rơpŏng rêm ngế kuăn pơlê. Ki xiâm dêi hâi mơdĭng  cho vâ mơjiâng, ‘mâi mơnhông ƀă mơdêk hnoăng bro ngế ki pơkuâ dêi kuăn pơlê; thăm mơdêk ivá rơdêi dêi khi tơrŭm hdroâng kuăn ngo ƀă mơdêk hnoăng cheăng dêi Măt trâ̆n Tơnêi têa Việt Nam tung chal nếo.