Kơxê hâi lơ 7/7, Khu xiâm kŏng an tơkŭm po Hôp tơpui tơdroăng ‘na troăng rơhlâ dêi Đảng, luât tơnêi têa ki tơdjâk troh kơpong Tây Nguyên. Hneăng hôp hiăng vâ môi tuăn, Tây Nguyên cho kơpong ki xiâm ‘na tơdroăng cheăng lêng- thế kring tơniăn; đi đo ai tơdroăng rơ-iô pơlê pơla, cho xiâm dêi tơdroăng thế kring vế tơniăn tơnêi têa, tơniăn sap ing pơlê cheăm bêng, kô kring tơniăn tung lâp tơnêi têa.

Mơnhông cheăng kâ, túa lĕm tro, rêh ối pơlê pơla, tơniăn ‘na cheăng lêng, kring gak, tơpui kâ cho troăng rơhlâ ki xiâm má môi vâ rak châ tơniăn a kơpong Tây Nguyên. Tơbleăng hnê mơhno a hneăng hôp, jâ Trương Thị Mai, Kăn hnê ngăn Đảng tối, tơdroăng ki chiâng ai ôh tá tơniăn a hâi lơ 11/6 kố nah  tơdjâk troh tơdroăng rêh ối dêi kuăn pơlê hdroâng kuăn ngo a Dak Lak ƀă mâu kong pơlê kơpong Tây Nguyên. Kăn hnê ngăn Đảng, Tơnêi têa malối tơmâng khât ‘na pơkuâ ngăn, hnê mơhno mơnhông cheăng kâ, rêh ối, vâ ai tơdroăng tơniăn a kơpong Tây Nguyên.