Hâi lơ 7/6, jâ Võ Thị Ánh Xuân, Kăn xiâm phŏ hnê ngăn tơnêi têa trâm mâ Khu râ kăn teăng mâ veăng Tíu xah hêi rơnó pơtê hriâm ‘’Reăng mâ hâi’’ hơnăm 2023. Kố cho khu nôu kuăn ki kơhnâ rơkê ing 39 kong pơlê, pơlê kong kơdrâm veăng tung tơdroăng ‘’Nôu râng ko’’ xua Khu xiâm pơkuâ Khu vâi kơdrâi Việt Nam mơhnhôk pêi pro.

Klêi kơ’nâi vâ chê 2 hơnăm pêi pro, Tơdroăng ai lối 32 rơpâu ngế nôu râng ko; mơhnhôk châ lối 115 rơtal liăn vâ tŏng kum rak ngăn ăm 19 rơpâu 760 ngế kuăn tê, tung mê, ai lối 3 rơpâu ngế vâi hdrêng kuăn tê xua pơreăng COVID-19. Kăn xiâm phŏ hnê ngăn tơnêi têa tối nhên, tơdroăng hiăng chiâng tíu hgiên vâ troh lâp lu tuăn pâ ăm vâi hdrêng kuăn tê lâp lu kơpong tơnêi têa. Kăn xiâm phŏ hnê ngăn tơnêi têa pơkâ Khu pơkuâ vâi kơdrâi Việt Nam pơtối rak tơdroăng pêi cheăng, ki krá tơniăn dêi rêm troăng pêi “Nôu râng ko’’.

Tung la ngiâ, Khu pơkuâ vâi kơdrâi Việt Nam hriăn plĕng ƀă troh lâp lu tơ’nôm mâu troăng pêi tơtro ƀă kơvâ cheăng, hnoăng cheăng châ pơcháu vâ tŏng kum tơ’nôm hên vâi kơdrâi, vâi hdrêng ai tơdroăng rêh ối pá puât châ mơnhông mơdêk lĕm tro.