Cheang tơdah kuăn pơlê, tơleăng mâu tơdroăng ki pơsăm tối,  pơsăm tơkêng hơnăm 2023 pơtối châ hơ’lêh nếo, hlo pêi pro tơƀrê, pơkâ tơleăng teăm tơdrêng tiô pơkâ dêi luât ƀă 81,7% kơxô̆ rôh ngế pơsăm tối, 86,3% kơxô̆ rôh pơsăm tơkêng ối tung hnoăng pơkuâ. Laga, tơdroăng ki kuăn pơlê lăm troh tơdrêng a mâu Khu xiâm, kơ koan pêi cheăng vâ pơsăm tối, pơsăm tơkêng, pâ thế, tối tơbleăng tâk hên, ki rơhêng vâ tối tơdroăng ki kuăn pơlê lăm troh tơdrêng a râ cheăm bu châ 60% tiô pơkâ.

Tơpui a hngêi hôp kân, mâu kăn Kuô̆k hô̆i ăm ‘nâi, hnoăng cheăng tơdah kuăn pơlê, maluâ hiăng hlo tơniăn tâ tâng pơchông ƀă hneăng hdrối la tơdroăng ki pêi pro tơdah kuăn pơlê tiô rêm khế dêi ngế pơkuâ kơ koan cheăng tá hâi pêi pro tro tâng pơchông ƀă pơkâ dêi luât. Điểu Huỳnh Sang, ngế lo ing Bình Phước tối tiah kố, hơnăm 2023 kơxô̆ kuăn pơlê troh a mâu kơ koan cheăng tơnêi têa pơsăm tối, pơsăm tơkêng, pâ thế tâk 37,7%, xua mê, Chin phuh kal mơnhên tối, pêi pro nhên tơdroăng ki tơdah kuăn pơlê, pơkâ tơleăng mâu tơdroăng ki pơsăm tối, pơsăm tơkêng hơnăm 2023:

“Kal thế pêi pro nhên xiâm kối dêi tơdroăng tâk hên kơxô̆ rôh, kơxô̆ ngế ƀă ai hên kuăn pơlê troh a kơ koan cheăng Tơnêi têa pơsăm tối, pơsăm tơkêng, pâ thế. Tơdrêng amê hlối mơnhên tối tơdroăng ki mê ƀă xiâm kối dêi tung pơla pơsăm tối, pơsăm tơkêng tâk hên ‘na mâu đơn nâp ƀă kơxô̆ tơdroăng ki vâi pơsăm tối, pơsăm tơkêng, klâ xoăng pêi pro nhên tâ mâu tơdroăng ki pơsăm tối, pơsăm tơkêng nếo ai ƀă mâu tơdroăng ki sap ing ton tĭn nah tá hâi pơkâ tơleăng klêi, mâu rôh tơdroăng ki ối pro ton tung hên hơnăm vâ ai troăng hơlâ pơkâ tơleăng nhên”.

Jâ Đàng Thị Mỹ Hương, ngế ki lo ing Bình Thuận tối tiah kố, pơkâ tơleăng mâu tơdroăng tá hâi kơhnâ khât, xơpá tung hnoăng cheăng tơdah kuăn pơlê, pơkâ tơleăng pơsăm tối, pơsăm tơkêng tối tơbleăng nếo pơtê a tơdroăng ki pâ thế ƀă pơkâ mơ’no:

“Tung tối tơbleăng séa ngăn ‘na tơdroăng kố mơnhên tối mâu tơdroăng ki tá hâi kơhnâ, ôh tá tơtro ƀă xiâm kối cho mâu tơdroăng ki u ối tá hâi teăm tơleăngklêi sap ing hên hơnăm hiăng tối tung pơchuât tơbleăng dêi Chin phuh a mâu hơnăm hdrối, la troh nôkố xuân tá hâi châ ‘mâi rơnêu khât. Á rơhêng vâ Kuô̆k hô̆i pơkâ tơdroăng ki pơcháu hnoăng cheăng nhên vâ rĕng pơkâ tơleăng klêi mâu tơdroăng ki tá hâi tơleăng klêi”.

Tơdroăng tối tơbleăng klêi kơ’nâi tơdah xo, pơkâ tơleăng mâu tơdroăng ki pơsăm tối, pơsăm tơkêng ăm mâu kơ koan dêi Kuô̆k hô̆i, tá hâi teăm pơtroh; ai mâu tơdroăng tá hâi châ mơnhên, pêi pro klêi tung tơdah kuăn pơlê pơtối ai tơdroăng hêng hôu; ai mâu tơdroăng pêi pro nhên hiăng ai rơkong pâ thế la hrá châ pêi pro, tơdroăng pơkâ tơleăng ối lôi ton, ôh tá ‘nâi nhên troăng hơlâ pơkâ tơleăng ƀă hên ki ê. Jâ Phạm Thị Kiều, ngế ki lo ing Dak Nông tối rơkong tơpui dêi tơná:

“Tá hâi ai troăng ki rơkê tŭm rơdêi ăm tơdroăng ki tối mâu kơ koan, khu tơrŭm, tíu pêi cheăng ôh tá tiâ mơnhên đơn ăm Khu kăn Kuô̆k hŏi chiu pôu râng hnoăng cheăng pơkâ tơleăng bro xôi ki lâi mê mâu kơ koan, khu tơrŭm, tíu pêi cheăng luâ hâi khế tiâ mơnhên athế séa ngăn kơtăng hên rôh. Ing mê nếo, tơdjâk troh tơdroăng séa ngăn, pơkâ kơtăng, mơnhên tối klêi kơ’nâi pơkâ tơleăng tiâ mơnhên dêi mâu kơ koan ai hnoăng pơkuâ tá hâi châ pêi pro đi đo mê chiâng bro tơdroăng tí tăng ‘nâi plĕng, pơkâ mơ’no, séa ngăn tơdroăng pơkâ tơleăng ƀă mâu tơdroăng hiăng pơtroh đơn pâ thế tá hâi pêi pro châ hên môi tiah tối tơbleăng ki tơpui tối troh”.

Tơpui tối leăng mâu tơdroăng ki ối tô tuăn ki mâu kăn lo ing kong pơlê tối, Ngế xiâm Séa ngăn Chin phuh Đoàn Hồng Phong ăm ‘nâi: mâu đơn pơtroh tung hơnăm 2023 tâk hên; kơxô̆ hlá đơn ai tŭm tơdroăng ki châ pơkâ tơleăng rế hên mê rế kơdroh; tơdroăng ki pơtroh đơn ƀă pơkâ tơleăng đơn ối hên tơdroăng ki ôh tá tro. ‘Na klêi kơ’nâi séa ngăn, mâu rôh tơdroăng ki pơsăm tối tá hâi châ tơleăng, ối ton, pêi pro Pơkâ 623, Chin phuh, Ngế pro xiâm hnê ngăn Chin phuh hiăng hnê mơhno mâu tơdroăng ki pơsăm tối, pơsăm tơkêng ki tá hâi tơleăng, pro ton.

Khu séa ngăn Chin phuh hiăng tơrŭm ƀă Khu xiâm ngăn Kŏng an, mâu khu xiâm kơvâ cheăng ki ai tơdjâk, kong pơlê pêi pro séa ngăn, klâ xoăng, pơkâ tơleăng nhên 1.003 rôh tơdroăng. Mâu kong pơlê séa ngăn, klâ xoăng, pơkâ tơleăng 856 rôh tơdroăng châ 85,3%.

“Tung la ngiâ ah, Khu séa ngăn Chin phuh pơtối tí tăng ‘nâi plĕng ăm Chin phuh, Ngế pro xiâm hnê ngăn Chin phuh hnê mơhno mâu kong pơlê pơkâ tơleăng tơdroăng ki pơsăm tối, pơsăm tơkêng tơrŭm krá tơniăn ƀă mâu khu xiâm, kơvâ cheăng Tơnêi têa tơkŭm pơkâ tơleăng klêi mâu tơdroăng ki tá hâi tơleăng klêi ôh tá tơniăn pro ton ƀă mâu tơdroăng ki ôh tá tơniăn ki pro ton hiăng pơkâ mơgêi pơkâ tơleăng tro pơkâ luât Chin phuh, Ngế pro xiâm hnê ngăn Chin phuh pơkâ thế Vi ƀan hnê ngăn râ kong pơlê pơkâ tối tơbleăng klêi, séa ngăn, pơkâ tơleăng tiô hnoăng pơkuâ pro tíu vâ mâu kơ koan Tơnêi têa drêng tơdah xo mâu đơn ôh tá pơtroh vêh ăm kong pơlê xếo”.