Tơpui a rôh hôp mơgêi lâp tơnêi têa tơbleăng luât, tơdroăng pơkâ dêi Kuô̆k hô̆i hneăng 15, pôa Vương Đình Huệ, Kăn xiâm hnê ngăn Kuô̆k hô̆i pơkâ thế Chin phuh mơdêk tâ nếo hnoăng cheăng, pôu râng tơkŭm po pêi pro Luât, tơdroăng pơkâ dêi Kuô̆k hô̆i; teăm hnê mơhno, ai troăng hơlâ pơkâ tơleăng tơƀrê mâu tơdroăng dế ai tơdroăng tơvâ, ôh tá tơniăn, rak vế pêi pro châ tiô tơdroăng pơkâ thế pêi pro ki ai khât ƀă tro pơkâ dêi luât, tơdroăng pơkâ.

Mơdêk, hơ’lêh nếo hnoăng cheăng tối tơbleăng, hnê hriâm luât ăm tơtro ƀă rêm ngế, rêm tơdroăng, rêm kong pơlê, malối cho ƀă mâu kơpong hdroâng kuăn ngo ƀă peăng kong ngo.

Kăn xiâm hnê ngăn Kuô̆k hô̆i pơkâ thế tơkŭm pêi klêi mâu tơdroăng pơkâ, rak vế ki rơkê plĕng dêi 83 kơxop hlá mơ-éa pơkâ pêi pro nhên mâu luât, tơdroăng pơkâ luât dêi Kuô̆k hô̆i hneăng 15. Ƀă 08 luât ai tơƀrê pêi pro tung hơnăm 2023, hlá mơ-éa pơkâ nhên tiô tối hdrối pơkâ mơ’no hên, 68 hlá mơ-éa. Xua mê, Kăn xiâm hnê ngăn Kuô̆k hô̆i pơkâ thế:

 “Pơkâ thế Chin phuh ai túa pơkâ nhên, klâ xoăng tơdroăng ki kơjo kum tơtro, hnê cheăng pêi vâ mơjiâng ƀă hâi khế châ tơƀrê dêi luât, tơdroăng pơkâ, malối cho ƀă luât ai xêt khât sap ing lơ 1/1/2024. Teăm châ ‘nâi mâu tơdroăng pơkâ klêi kơ’nâi pêi pro tâng lơ ai tơ’nôm tơdroăng tơvâ tơvân, xơpá, ai tơdroăng ki ôh tá xê khât, ôh tá tơdrăng, ôh tá tơniăn vâ ‘mâi rơnêu, ‘mot tơ’nôm tiô hnoăng pơkuâ lơ tơtrâ Kuô̆k hô̆i klêi kơ’nâi séa ngăn a Hneăng hôp má 6 (khế 10/2023). Pêi klêi troăng hơlâ luât ‘na pơkâ tơleăng hnoăng cheăng pôu râng ƀă pơxâu phâk kơtăng, teăm tơdrêng khu tơrŭm, mâu ngế krê bro ăm ai tơdroăng pro xôi tung mơjiâng, pơkâ hlá mơ-éa pơkâ luât”.

Ƀă mâu kơ koan dêi Kuô̆k hô̆i, Kăn xiâm hnê ngăn Kuô̆k hô̆i pơchân kal pơtối mơdêk tơdroăng ki hbrâ rơnáu, pôu râng dêi hnoăng dêi Vi ƀan pơkuâ Kuô̆k hô̆i, mâu kơ koan dêi Kuô̆k hô̆i tung tơdroăng séa ngăn, pơkâ kơtăng ƀă séa ngăn Chin phuh, mâu kơ koan, khu tơrŭm cheăng tơkŭm tơbleăng mâu luât, tơdroăng pơkâ dêi Kuô̆k hô̆i. Hbrâ rơnáu tơrŭm krá tơniăn ƀă mâu kơ koan ki ai tơdjâk troh tung pơla chêh bro mơ-éa, séa ngăn, ‘mâi rơnêu tơdroăng ki chêh hlá mơ-éa pơkâ nhên athế châ hbrâ ƀă pơtroh tơdrêng ƀă tơdroăng tơkêa luât, luât pơkâ”.

Mâu Khu kăn Kuô̆k hô̆i ƀă mâu kăn Kuô̆k hô̆i pơtối mơdêk rơdêi tơdroăng ki séa ngăn a kong pơlê. Hô̆i đong hnê ngăn ƀă Vi ƀan hnê ngăn rêm râ, malối cho a mâu kong pơlê ki pêi pro tíu pơkâ tiô mâu tơdroăng pơkâ dêi Kuô̆k hô̆i pơtối mơdêk tơdroăng ki hbrâ rơnáu, hnoăng cheăng pôu râng ƀă tơdroăng ki tơchĕng tơmiât rơkê tung tơkŭm pêi pro tơdroăng luât pơkâ a kong pơlê.

Pôa Vương Đình Huệ, Kăn xiâm hnê ngăn Kuô̆k hô̆i tối nhên, tơdroăng ki tơkŭm po Rôh hôp ‘na hnoăng cheăng tơbleăng mâu luât, tơdroăng pơkâ dêi Kuô̆k hô̆i cho môi tơdroăng ki nếo tung hnoăng cheăng dêi Kuô̆k hô̆i hneăng 15. Tung tơdroăng ki klêi kơ’nâi dêi rôh hôp, Chin phuh, mâu kơ koan ki ai tơdjâk, khu kăn pơkuâ a kong pơlê, hriăn ngăn, tơkŭm po mâu rôh hôp lơ tơdroăng pơkâ tơtro vâ pơkâ kơtăng, tơbleăng nhên tơdroăng kal dêi mâu luât, tơdroăng pơkâ xua Kuô̆k hô̆i pơkâ ối tung hnoăng cheăng pôu râng tơbleăng lơ ai tơdjâk tơdrêng troh kơ koan, khu tơrŭm, kong pơlê tơná.

“Pơkâ kơtăng tơdroăng kơxô̆ 27, hnoăng cheăng ki xiâm dêi tơnêi têa cho môi tuăn” châ xing xoăng tơdrăng, tơrŭm krá rơdêi, séa ngăn tơƀrê, á tơngah tiah kố, tơdroăng ki rơtế môi tuăn pôu râng hnoăng cheăng, hbrâ rơnáu, tơƀrê ƀă séa ngăn krá rơdêi dêi Kuô̆k hô̆i, rơtế ƀă ivá cheăng ƀă khŏm mơ-eăm tơkŭm pêi pro luât tiô túa ki kơtăng, rơkê dêi Chin phuh, tơdroăng tơrŭm krá tơniăn dêi mâu kơ koan, môi tiah châ mơhno nhên ing mâu tơdroăng ƀlêi chiâng dêi Rôh hôp rôh kố, kô cho tơdroăng ki kal vâ pêi pro “pơkuâ ngăn tơnêi têa tiô chal nếo, tơƀrê”, veăng kum vâ hnoăng cheăng tơbleăng luât, tơdroăng pơkâ kô ai mâu tơdroăng ki hơ’lêh nhên, châ tơƀrê hên tơdroăng ki tơniăn lĕm tâ tung pơla, pêi pro tơdroăng ki pơkâ thế dêi tơnêi têa, tơdroăng ki loi tơngah dêi Khu kăn Kuô̆k hô̆i ƀă kuăn pơlê.