Ăm rơkong tơpui tối tung Tơdroăng pơkâ tơrŭm pơla Vi ƀan pơkuâ Kuô̆k hô̆i ƀă Khu kăn hnê ngăn Vi ƀan xiâm Măt trâ̆n tơnêi têa (khĕn cho pơkâ kơxô̆ 525) ‘na tơdroăng ki trâm mâ kuăn pơlê dêi mâu kăn Kuô̆k hô̆i, mâu kăn mơhno nhên ai tơdroăng “mâu kăn lăm trâm mâ kuăn pơlê la bu ‘nân hmâng xo”. Pôa Dương Thanh Bình, Ngế xiâm pơkuâ ‘na Hnoăng cheăng hnê mơhnhôk kuăn pơlê ăm ‘nâi, luâ 10 hơnăm pêi pro Pơkâ kơxô̆ 525, hên mâu kăn Kuô̆k hô̆i hiăng hbrâ rơnáu, veăng pêi pro tơdroăng ki trâm mâ kuăn pơlê ƀă hên tơdroăng ki phá ra pá dêi rơpó; pêi lo liăn, hriăn ngăn ƀă pơtroh hên rơkong pâ thế dêi kuăn pơlê troh mâu kơ koan, khu tơrŭm ki ai hnoăng pơkuâ pơkâ tơleăng.

Laga, pôa Trần Quang Phương, Kăn xiâm phŏ hnê ngăn Kuô̆k hô̆i tối nhên tơdroăng ki kal rơnêu ‘na tơdroăng ki xiâm, xuân môi tiah ngế ki trâm kuăn pơlê, ki rơhêng vâ tối cho ai tơdroăng “kăn lăm trâm kuăn pơlê la bu ‘nân tơmâng xo”:

“Trâm mâ kuăn pơlê nôkố cho tơdroăng “pơtroh kơbố xuân chiâng” ki hên kuăn pơlê cho pơtroh sap ing kăn ƀô̆, kong chưk rêm râ, pơkuâ cheăng dêi cheăm, ai mâu kăn ki ‘nâ cho kăn ƀô̆ cheăng ki hiăng ton nah, lơ hiăng pơtê cheăng châ kuăn pơlê loi nhuô̆m,bu ai iâ mâu ngế troh trâm mâ kuăn pơlê. Tơdroăng ki ai hên tơdroăng: trâm mâ kuăn pơlê đi đo, trâm mâ ’na tơdroăng, trâm mâ ing troăng hyôh Internet, ƀă tơdroăng ki trâm tơdrêng ƀă hên ki ê mê kal athế hơ’lêh nếo.

Tơdroăng ki chêh tơkŭm mâu rơkong tơpui tối pâ thế dêi kuăn pơlê, pơkâ tơleăng ƀă tiâ mơnhên rơkong pâ thế ƀă séa ngăn tơdroăng ki pơkâ tơleăng tơdroăng ki tiâ mơnhên mê”.

Ƀă pôa Nguyễn Khắc Định, Kăn xiâm phŏ hnê ngăn Kuô̆k hô̆i mê tối mâu tơdroăng ki ai khât ki ê:

“Ai mâu kăn cheăng a kong pơlê veăng tiô khu mâu kăn troh a mâu tíu ki trâm kuăn pơlê ƀă lăm pơtối tung tâi hneăng. Tiah mê, pái ngế kăn ki lo tơbriât a 3 tơring mê vâi hơ’lêh dêi rơpó ai mâ a pái tơring mê. Ai môi ngế kăn xông tâng tơpui tối leăng, môi ngế cho pêi cheăng kŭn tâ, ai drêng ‘nâ bu ‘nân troh tâi chôu.

Ƀă kăn ki ai tíu pêi cheăng tung môi tíu ki lâi ‘lo mê xông tâng tơmâng, tối leăng.  Xua mê ai mâu kăn lăm trâm kuăn pơlê la bu hmâng xo, mê cho tơdroăng ki ai khât”.

Mâu kăn pâ thế ƀă mâu kong pơlê ai hên kăn Kuô̆k hô̆i mê klâ bro hên khu vâ ai kơxô̆ ngế ƀă hdroh ngế trâm mâ kuăn pơlê hên tâ. Tơdrêng amê, tung pơla trâm kuăn pơlê ki hên cho tơkŭm tung mâu tơdroăng môi tiah tơdroăng hriâm tâp, pêi cheăng, tơnêi tơníu ƀă hên ki ê mâu tơdroăng ki ối tung hnoăng pơkuâ kong pơlê, tơring cheăm, tơdjâk troh hnoăng pơkuâ xúa dêi kuăn pơlê. Xua mê, hên ngế kal ai kăn pơkuâ cheăm, tơring veăng hôp a rôh trâm mâ kuăn pơlê vâ tơmâng mâu rơkong tơpui tối, pâ thế, tơdroăng ki ối tung hnoăng pơkuâ.

A rôh hôp, pôa Vương Đình Huệ, Kăn xiâm hnê ngăn Kuô̆k hô̆i tối nhên: Khu kăn Kuô̆k hô̆i cho ngế ki teăng mâ ăm hiâm mơno ki rơhêng vâ dêi kuăn pơlê a tíu pêi cheăng ki pôk xo tơná ƀă dêi kuăn pơlê tung lâp tơnêi têa, chiu pôu râng dêi hnoăng cheăng a ngiâ kuăn pơlê ƀă a ngiâ Kuô̆k hô̆i. Xua mê, tơdroăng ki trâm mâ kuăn pơlê ôh ti xê to tíu pêi cheăng tâ phĭu mê ối a tíu pêi cheăng, tíu ki dế lăm pêi cheăng:

“Tung tơdroăng pơkâ tro dêi kăn Kuô̆k hô̆i xuân tối cho kăn athế đi đo tơrŭm krá tơniăn ƀă kuăn pơlê, tơmâng rơkong tơpui tối dêi kuăn pơlê châ kuăn pơlê tơngah pôk. Luât Tơrŭm Kuô̆k hô̆i ki ‘mâi hơ’lêh 2020, ai tối: Khu kăn Kuô̆k hô̆i athế đi đo trâm kuăn pơlê tí tăng ‘nâi plĕng tơdroăng ki rơhêng vâ dêi kuăn pơlê.

Khu kăn Kuô̆k hô̆i cho trâm mâ kuăn pơlê tiô tơdroăng ki trâm mâ kuăn pơlê dêi khu kăn Kuô̆k hô̆i cho môi túa. Túa má péa cho trâm kuăn pơlê tíu kuăn pơlê rêh ối ƀă tíu pêi cheăng. Tơdroăng pơkâ la ngiâ kố xuân athế tối nhên tơdroăng kố, túa gá tiah lâi mê nếo hnê mơhno nhên”.

Vi ƀan pơkuâ Kuô̆k hô̆i môi tuăn tơdroăng ki ‘mâi rơnêu, ‘mot tơ’nôm tơdroăng Pơkâ kơxô̆ 525, ‘mot tung tơdroăng mơjiâng tơdroăng Pơkâ dêi Vi ƀan pơkuâ Kuô̆k hô̆i, pơcháu ăm Khu ki pêi cheăng ối tung Vi ƀan pơkuâ Kuô̆k hô̆i pơkuâ tơrŭm ƀă mâu kơ koan ki ai tơdjâk troh vâ mơjiâng tơdroăng Pơkâ tro tiô dêi luât pơkâ.

Xuân a rôh hôp rôh kố, Vi ƀan pơkuâ Kuô̆k hô̆i séa ngăn tối tơbleăng hnoăng cheăng hnê mơhnhôk dêi Kuô̆k hô̆i khế 5 ƀă khế 6 pơla hdrối kố nah. Jâ Lê Thị Nga, kăn pơkuâ Vi ƀan Luât tối ki ai khât nôu pâ hok tro pơtăng dêi rơpó plâ măng vâ nôp hồ sơ ăm dêi kuăn mot hriâm lâm 10, mê cho môi tơdroăng ki bro pá ăm hok tro:

“Pro pá ăm hok tro tơ’noăng mot hriâm lâm 10 a Hà Nội, Pơlê kong kân Hồ Chí Minh cho tơdroăng ki ai tung hên hơnăm. Tơ’noăng mot hriâm lâm 10 nôkố ối pá tâ tơ’noăng mot hriâm đăi hok. Hôm cho pin ối kal hên hngêi trung hriâm tơdjuôm râ má pái há ƀă ki khât kố mê pơkâ tơleăng môi tiah lâi? Chin phuh hiăng pơkâ thế Khu xiâm ngăn hnê hriâm ƀă hnê mơjiâng tuăn ngoâ rơkê tối tơbleăng mê ngin pơkâ thế cho ‘mot tơ’nôm tơdroăng kố tung tối tơbleăng ‘na hnoăng cheăng pâ thế dêi kuăn pơlê Kuô̆k hô̆i”.