Klêi kơ’nâi séa ngăn ăm hlo, tơdroăng hnê hriâm phôh thong hơnăm 2018 châ bro krâu, kơtăng, hiăng hơ’lêh sap ing tơdroăng ki hnê ki rơkê plĕng ngi pơkâ troăng tơmiât mơnhông hiâm mơno, ivá hriâm dêi hok tro. Ki xiâm dêi hlá mơ-éa hriâm gá tro ƀă tơdroăng pơkâ thế kal châ tơƀrê dêi Tơdroăng hnê hriâm phôh thong nếo. Tơdroăng ki chêh bro hlá mơ-éa hriâm hiăng mơhnhôk hên hĭn mâu khu ki rơkê, khu ki hriăn ‘na khoa hok, khu thái cô ki rơkê, châ vâi tơngah, ƀă ki rơkê plĕng veăng.

Laga, klêi kơ’nâi séa ngăn xuân ăm hlo, tơdroăng ki chêh, pêi pro, pơkâ xúa hlá mơ-éa hriâm ối ai hên ki ôh tá tơniăn: Khu xiâm ngăn hnê hriâm ƀă hnê mơjiâng tuăn ngoâ rơkê ôh ti tơkŭm chêh bro mâu ƀô̆ hlá mơ-éa hriâm tiô pơkâ dêi Tơnêi têa, malối cho tơdroăng ki pơkuâ ngăn, po tăng ‘nâi, mơdêk tơdroăng ki kal tung hnê hriâm phôh thong; pơkuâ ngăn, mơ’no yă tê hlá mơéa hriâm. Tơdroăng ki pơkâ ăm xúa hlá mơ-éa hriâm tá hâi châ ngăn nhuô̆m tro kơlo, tơdroăng ki pơkâ, tơmâng xo, ‘mâi rơnêu hlá mơéa hriâm tá hâi krá tơniăn, chiâng tơdjâk troh tơdroăng ki ôh tá tro ‘na ki kal a 18 kơxop hlá mơ-éa hriâm.

Ai tơdroăng ki ôh tá ai hên, ôh tá bê tŭm hlá mơ-éa hriâm ƀă mâu hlá mơéa hriâm hdrối vâ mot tung hơnăm hriâm nếo. Pôa Hoàng Thanh Tùng, ngế pơkuâ Vi ƀan Luât dêi Kuô̆k hô̆i tối tiah kố:

 "Mâu tơdroăng ki tơvâ tơvân nôkố cho ôh tá ai tơdroăng ki hbrâ rơnáu hdrối tung pơla tơbleăng tơdroăng; lơ ai mâu tơdroăng xơpá tung tơdroăng pêi pro troăng hơlâ tŏng kum hok tro kơpong hơngế hơngo; lơ hơ’lêh xúa điê̆n tưh tung hlá mơ-éa hriâm kố vâ mơdêk ki xúa kong ngê̆ thong tin. Mơni kô ôh ti xê hlá mơ-éa, cho khu  mơ-éa hriâm điê̆n tưh. Tơdroăng bản quyền tâng xúa khu hlá mơ-éa hriâm ki châ pơlê pơla hơ’lêh. Mơnhên tối trâu hngế tâ mâu tơdroăng ki ôh tá tơniăn drêng pin ôh tá ai mâu khu hlá mơ-éa hriâm dêi Tơnêi têa, tung tơdroăng mê ai troăng hơlâ ‘mâi rơnêu mâu tơdroăng ki ôh tá tơniăn kố ƀă troăng hơlâ ai hên ôh ti xê ai to môi troăng hơlâ chêh bro hlá mơ-éa hriâm nếo a tíu kố athế mơnhên tối trâu hơngế tâ”.

Tơdroăng ki hơ’lêh nếo hnê hriâm, hlá mơ-éa hriâm cho tơdroăng ki kal, châ xo tơdroăng ki tơmâng ngăn hên dêi kuăn pơlê. Tiô mâu kăn tối, tơdroăng hnê hriâm phôh thong cho tơdroăng luât gá tro, la tơdroăng bu pơkâ túa ki rơkê. Laga tơdroăng ki kal phôh thong xuân kal khât, kal ai tơdroăng ki pơkuâ ngăn krá tơniăn dêi tơnêi têa. Pôa Đỗ Văn Chiến, kăn pơkuâ ngăn tíu xiâm Đảng, Kăn hnê ngăn Vi ƀan xiâm Măt trâ̆n Tơnêi têa pơkâ thế:

"Tơdroăng kal pêi tơdrêng cho kal athế ai troăng hơlâ hbrâ mơdât krá rơdêi sap ing tơdroăng ki chêh bro, in ấn, mơ’no ăm xua mê pin athế kơdroh yă hlá mơ-éa hriâm tơtro ƀă tơdroăng ki pêi lo liăn dêi kuăn pơlê nôkố. Kuăn pơlê ối pơkâ thế cho hlá mơ-éa hriâm kố athế Tơnêi têa pơkuâ ngăn yă. ‘Mâi rơnêu pin athế tơmiât troh. Tâng ăm ki klâi ăm mâu ngế ki xơpá mê á ăm vâi chư cho pơxúa khât ƀă ton xŏn. Pâ thế dêi Khu kăn séa ngăn cho ai tơdroăng pêi pro lơ ôh mê athế ai hriăn trâu hơngế tơpui tối leăng tơxâng”.

A rôh hôp Vi ƀan pơkuâ Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i mơhno nhên tung tơdroăng ki ai khât dêi tơdroăng hlá mơ-éa hriâm phôh thong nếo pơkâ hrá 30 khế tâng pơchông ƀă tơdroăng ki pơkâ thế. Kăn xiâm hnê ngăn Kuô̆k hô̆i tối tiah kố kal séa ngăn hnoăng cheăng pôu râng dêi mâu ngế pêi pro hơ’lêh nếo tơdroăng, hlá mơ-éa hriâm phôh thong. Ki rơhêng vâ tối, tơdroăng pơkâ mơnhên, tơmâng xo, ‘mâi rơnêu hlá mơ-éa hriâm tá hâi krá tơniăn, chiâng tơdjâk troh ối ai tơdroăng ki ôh tá tro ‘na tơdroăng ki xiâm a 18 kơxop hlá mơ-éa hriâm, malối cho hlá mơ-éa hriâm Tiếng Việt lâm 1, Khoa học tự nhiên lâm 6, Lịch sử lâm 11.

Kăn xiâm hnê ngăn Kuô̆k hô̆i pơkâ thế rĕng pơkâ hlá mơ-éa hnê mơhno ‘na túa pơkâ yă tê hlá mơ-éa hriâm, pơkâ ki tro ‘na yă hlá mơ-éa hriâm, rak tơniăn hbrâ mơdât kơxô̆ liăn ‘no chêh bro, kơdroh liăn ki ‘no hrê, vâ kơdroh yă hlá mơ-éa hriâm. Kăn xiâm hnê ngăn Kuô̆k hô̆i pơkâ thế pêi pro kơtăng tiô tơdroăng Pơkâ 88 Kuô̆k hô̆i hơ’lêh nếo tơdroăng hlá mơéa hriâm phôh thong.

"Tơdroăng pơkâ 88 tối: Khu xiâm ngăn hnê hriâm ƀă hnê mơjiâng tuăn ngoâ rơkê athế tơkŭm chêh bro cho môi khu kơxop mơ-éa hriâm ai tŭm lâm 1 troh lâm 12 tung mê ai 137 tơdroăng kal dêi mơéa. Mâu khu tơrŭm, mâu ngế krê châ mơhnhôk veăng chêh bro hlá mơ-éa hriâm môi lơ ai ko mơ-éa tiô ivá, ôh ti kal athế chêh bro tŭm mâu ƀô̆ hlá mơ-éa hriâm. Tung tơdroăng pơkâ 88 cho tiah mê. Tơdroăng dế trâm nôkố khu kăn séa ngăn mơhno tối á hlo xuân kal tơtrŏng, pin hriăn ngăn tơ’nôm”.

Kăn xiâm hnê ngăn Kuô̆k hô̆i tối nhên kal pơtối kơjo kum, pêi pro kơtăng tơdroăng ki xing xoăng tŭm liăn ngân ăm kơvâ hnê hriâm ƀă hnê mơjiâng tuăn ngo, malối cho kơxô̆ liăn tơbleăng Tơdroăng hnê hriâm phôh thong hơnăm 2018. Malối, kal mơdêk hnê tối, pơkâ trâu rơdâ tâ nếo troh kăn ƀô̆, thái cô, mâu kuăn pơlê vâ ‘nâi nhên, ing mê, ai tơdroăng ki môi tuăn drêng tơbleăng tơdroăng hnê hriâm phôh thong hơnăm 2018 châ pơkâ mơ’no.