Mơnhông tơrŭm cheăng kâ-tê mơdró tung “kơpong” cho ki xiâm, pêi pro đi đo, môi troăng hơlâ pơkâ dêi Đảng ƀă kuăn pơlê pin cho vâ pêi pro, pơtối mơdêk ki ó rơdêi má môi tơmeăm khoăng ki ai hlâu, ki tơ’lêi chiâng dêi “kơpong” ƀă mâu kong pơlê tung lâp tơnêi têa vâ mơnhông pêi cheăng kâ-rêh ối pơlê pơla, mơdêk hnoăng cheăng lêng, kring vế, gak ngăn tơniăn vâ ing mê thăm mơdêk tơdroăng pêi lo kế tơmeăm, mơnhông hiâm tuăn ki rơkê hloh hlê dêi kuăn pơlê.

Tơdroăng pơkâ dêi Hneăng hôp kân Đảng má 13 hiăng mơnhên: Mơnhông tơdrêng ƀă mơjiâng tơrŭm pêi cheăng kâ tung kơpong, pơla mâu kơpong; Tơdrêng amê, po troăng mơnhông mâu ‘’kơpong’’ ‘na mơjiâng hngêi trăng, troăng klông, tơ-uân xo tơdroăng ki ai tơ’lêi hlâu, tơnêi tíu ki vâ mơdêk pêi cheăng kâ-pơkuâ ngăn cheăng kal kí, tơdroăng rêh ối kuăn pơlê, ƀă thăm mơdêk tơrŭm cheăng ‘’tung kơpong’’ ƀă ‘’tâ tá tung kơpong’’ vâ veăng pêi pro mâu hnoăng cheăng ki kơnía git dêi lâp plâi tơnêi, mơjiâng tơdroăng ki mơnhông tiô chal nếo… Kal athế pro ki klâi vâ kâi chiâng pêi pro ai khât mâu tơdroăng cheăng ki xiâm mê?

Vâ ai tơdjâk troh tơdroăng tơrŭm kơpong mê tơdroăng ki xiâm mê athế ai hngêi trăng, troăng klông ƀă tơdjêp tơdroăng hngêi trăng, troăng klông. Tiô pôa Trần Văn Hảo, Kăn pơkuâ ngăn tê mơdró, cheăng kơmăi kơmok dêi kong pơlê Hải Dương, tung mâu hngêi trăng, troăng klông, ki kal mê cho troăng prôk tơ’lêi hlâu, ki tơdjâk pơla mâu kong pơlê, pơlê kong kân, mê cho ki xiâm vâ todjêp tung kơpong ƀă tơrŭm pơla mâu khu kơpong tâ tá, xuân môi tiah mơjiâng pro mâu hngêi trăng, troăng klông ki ê:

‘’Pâ thế mâu khu râ, kơvâ cheăng Đảng tơnêi têa, Vi ƀan hnê ngăn mâu kong pơlê, pơlê kong kân rĕng tơkŭm thăm mơdêk mơjiâng mâu tơdroăng tơkêa bro troăng prôk tơdjêp tŭm pơla mâu kong pơlê, pơlê kong kân tung kơpong cho vâ tơrŭm tơdjêp pơla mâu kơpong tâ tá, tơrŭm ‘na kơvâ cheăng ƀă tơdroăng ki pêi cheăng kơmăi komok, tê mơdró kâ; Ngăn khât, tŏng kum mơ’no liăn mơjiâng nếo lơ po rơdâ mâu tíu xiâm Logistics ki kân a Hải Phòng, Quảng Ninh, Hà Nội, Hải Dương ƀă mâu kong pơlê ki tơ’lêi ai tơmeăm khoăng vâ mơnhông tíu xiâm Logistics ki pơto cho vâ mơnhông ƀă pơtối mơdêk ki ó rơdêi dêi hnoăng cheăng tơrŭm tê mơdró, tŏng kum dê pó, ki tơƀrê vâ kơdroh mơ’no liăn ăm khu mơdró kâ thăm mơdêk ivá cheăng tơbriât tung tê mơdró kâ ăm kơpong ki vâ mơnhông tung lâp kơpong ƀă hía hé…’’

Ki păng ‘nâng dêi kơpong tơbăng kroăng Hồng - kơpong ki kal xiâm ‘na pơkuâ cheăng kal kí, pêi cheăng kâ, mơhno túa lĕm tro, pơlê pơla, cheăng lêng, kring vế ƀă tơpui kâ xiâm dêi tơnêi têa. Ƀă hnoăng cheăng cho Pơlê kong xiâm Hà Nội - cho 1 tung 2 kơpong ki djâ troăng ahdrối ‘na pêi cheăng kâ ivá ki mơnhông má môi dêi tơnêi têa, mâu hơnăm hdrối mê hía nah, kơnôm ai tơrŭm cheăng, tơrŭm pêi cheăng, pêi lo kế tơmeăm ƀă mâu kong pơlê ối kơpong Tơbăng kroăng Hồng hiăng ai tơdroăng ki mơnhông luâ tâ kơlo ki pơkâ ‘na mơjiâng pro troăng prôk, logistics ƀă hên hĕng mâu tơdroăng ki ê.

Maluâ ti mê, tiô jâ Lê Việt Nga-Kăn phŏ ngăn ‘na tê mơdró kâ a kơchơ tung tơnêi têa, ối tung Khu xiâm ngăn ‘na tê mơdró, cheăng kơmăi kơmok tối, xuân u ối hên tơdroăng ki khu kăn pơkuâ mâu kong pơlê, pơlê kong kân kal athế tơrŭm cheăng dêi pó tung pơkâ pêi pro hnoăng cheăng ki nếo, ing mê ‘nôi nếo kâi hơ’lêh ngiâ méa dêi kơvâ tê mơdró tung kơpong ƀă tung lâp tơnêi têa:

‘’Ai mâu kơvâ cheăng ki ngin châ hlo mê cho tơdroăng ki tơrŭm pơla mâu kơpong xuân tá hâi teăm châ pêi pro kêi tŭm. Pơtih ƀă tơdroăng ki mơjiâng xiâm Logistics mê Kơpong tơbăng kroăng Hồng châ Ngế pro xiâm hnê ngăn Chin phuh kĭ ăm phep tiô tơdroăng pơkâ kơxô̆ 1012 hơnăm 2015 ăm Kơpong tơbăng kroăng Hồng ai hlối 1 tíu xiâm Logistic má môi, ối a kơpong peăng Kơnhŏng Hà Nội; Tíu xiâm Logistioc má 2 ối Peăng Hdroh Hà Nội; ƀă troh a hơnăm 2030 ối ai tá mâu tíu xiâm Ligistic ki ai tơnêi tíu pêi cheăng rơdâ troh 50 ha châ tơdjêp ƀă mâu kơno tuk troh a tơraih tơƀai tung kơpong, laga troh nôkố pin xuân tá hâi teăm châ mơjiâng pro.

Xua mê, tơdroăng ki tí tăng tơ’mot khu mơdró kâ mơ’no liăn ăm tơdroăng cheăng kal kal athế ai tơdjêp hên tơdroăng ki tơrŭm pơla mâu kong pơlê dêi pó…’’.

Xuân tơpui tối tiah tơdroăng ki mê, jâ Trần Thị Phương Lan - Pôu râng hnoăng Kăn pơkuâ ngăn tê mơdró kâ - cheăng kơmăi Pơlê kong kân Hà Nội tối nhên hnoăng cheăng dêi Khu xiâm ngăn ‘na mơdró kâ - cheăng kơmăi kơmok tung mơnhông hngêi trăng, tíu pêi cheăng Logistisc tơdjêp tung kơpong ƀă mâu kơpong tâ tá:

“Tiô tơdroăng tơmiât mê hên kong pơlê tung kơpong ai tơ’lêi vâ mơnhông Logistic tung kơvâ troăng prôk a’nâi, troăng tơƀai, troăng têa kơxĭ, troăng têa kroăng ƀă hên hĕng tơmeăm ki ê, xua mê, á rơhêng vâ kơvâ ki kố mê Khu xiâm ngăn ‘na mơdró kâ-cheăng kơmăi kơmok ki pro xiâm vâ tơdjâ troăng, mơhno túa pêi pro ăm mâu kong pơlê, ƀă pin athế ‘nâi nhên mâu tíu ki vâ mơnhông vâ ga mâ tá ai tơdroăng ki pêi pro môi tiah dêi pó, ƀă pơtối mơdêk ki châ tơƀrê, châ pêi pro dêi hên mâu troăng hơlâ ki pin ai tơ’lêi hlâu tung pêi cheăng kâ tung kơpong….’’.

Tơdroăng ki thăm mơdêk tơrŭm cheăng, mơnhông pơla mâu kong pơlê tung kơpong vâ mơjiâng mâu hngêi trăng, troăng klông ki kal, môi tiah troăng prôk, pơto chơ kế tơmeăm, Logistisc, khu ki mơdró kâ ƀă hía hé kô kum tơ’lêi hlâu ăm tơdroăng ki pơto, chơ, pơtroh kế tơmeăm hên tíu tung kơpong.

Pôa Triệu Đăng Khoa - Kăn ngăn ‘na Khu pêi cheăng tơrŭm Trạm Bạc Đồng Xâm (ối tung Khu pêi cheăng tơrŭm Pêi cheăng tiô khôi hmâ Trạm bạc Đồng Xâm, tơring Kiến Xuơng, kong pơlê Thái Bình) tối tiah kố:

‘’Drêng hiăng mơjiâng tơrŭm mê xuân tơ’lêi hlâu ăm kế tơmeăm dêi pơlê ki pêi tơdroăng cheăng tiô khôi hmâ roh vâi krâ nah Trạm bạc Đồng Xâm xua rêm ngế pơrá châ ‘nâi troh, klêi mê, tâi tâng mâu tơdroăng tơrŭm tê mơdró kâ châ po rơdâ, mê kế tơmeăm dêi Trạm bạc Đồng Xâm mơni kô châ tê mơ’no pơtroh hên tíu ki ê tâ’’.

Tiô Phŏ Yăo sư Trần Đình Thiên, Ngế ki hriăn plĕng ‘na pêi cheăng kâ tối, klêi kơ’nâi hiăng ai mâu hngêi trăng, troăng klông ki vâ tơrŭm cheăng, vâ khoh châ ai tơdroăng ki tơrŭm cheăng kâ ki păng ‘nâng mê kal ai tơrŭm krá khâp pơla mâu khu mơdró a mâu kong pơlê tung kơpong, ƀă tâ tá tung kơpong:

‘’Tơdroăng ki apoăng mê cho tơrŭm tung kơpong cho athế ai troăng prôk ki rơkê khât tung pêi cheăng kâ, pro ti lâi mâu khu râ, kơvâ cheăng, mâu kong pơlê chiâng vâ tơrŭm, tơdjêp dêi pó. Ki kal mê cho ai troăng prôk ki hơngế vâ pơkâ hdró kơpong ƀă mơjiâng chiâng mâu kơpong ki mơnhông môi kơvâ cheăng, ƀă tiah mê nếo khoh chiâng tơrŭm tơ’lêi hlâu dêi pó.

Ing túa pêi cheăng ga kô chiâng ai khu mơdró kâ mơ’no liăn cheăng, tơrŭm dêi pó. Ki má péa cho luât, hdrối mê hía nah, pin ai kơpong mê kơpong ki mê cho tiô tơnêi tíu tê, la kơpong ki vâ tơrŭm mơnhông ki vâ pêi cheăng păng ‘nâng mê pin tá hâi teăm ai. Kal athế ai mâu tơdroăng tơkêa bro ki tơrŭm pơla mâu kơpong vâ krịng vế tơniăn ăm tơdroăng tơkêa bro xua mê cho ki tơdjêp pơla kơpong ƀă dêi pó vâ pôi tá ai tơdroăng ki tro tơklâ ƀă hên mâu tơdroăng ki ê, la hlo nôkố pơla 2 kong pơlê bu kơtăn dêi pó iâ tê la xuân ối xahpá vâ khoh châ tơrŭm ƀă dêi pó….’’.

Pin hiăng hlo nhên, tơdroăng ki kal má môi mê cho mơjiâng, pêi pro tro tiô tơdroăng pơkâ ƀă đi đo hơ’lêh nếo tíu ki mơ’no liăn cheăng a tơrêm kong pơlê tá troh a kơpong bă kơpong tơrŭm tâ tá, ing mê, tŏng kum tơ’mot mơ’no liăn mơjiâng hngêi trăng, troăng klông tro tiô chal nếo, kơvâ cheăng ƀă tơtro tiô tơdroăng pâ thế dêi jâ Nguyễn Thị Bích Ngọc, Ngế xiâm phŏ ngăn ‘na Pơkâ cheăng ƀă Mơ’no liăn cheăng:

‘’Rêm hơnăm, Chin phuh xuân hiăng mơ’no tơdroăng pơkâ dêi Chin phuh ‘na ‘mâi rơnêu tíu mơ’no liăn tê mơdró kâ. Xua mê, ngin xuân pâ thế mâu kong pơlê, pơlê kong kân tung kopong kal tơkŭm pơkâ pêi pro châ tơƀrê mâu tơdroăng Pơkâ kố vâ ‘mâi rơnêu hơ’lêh túa pêi cheăng, tŏng kum tơ’lêi hlâu vâ tơ’mot mơ’no cheăng tung mơdêk pro hngêi trăng, troăng klông.

Mâu kong pơlê, pơlê kong kân tung kơpong mê kal mơdêk tơrŭm cheăng tung kơpong, đi đo athế tơkŭm po mâu roh hôp vâ tơ’mot khu mơdró kâ mơ’no liăn cheăng vâ mơjiâng, pơtroh mâu tơdroăng tơkêa bro tơ’mot khu mơdró kâ tro tiô tơdroăng PPP pơla sap hơnăm 2021-2023 hnối ai tơdjâk troh mâu túa cheăng, troăng hơlâ ki kơjo kum vâ tơ’mot khu mơdró kâ. Ing mê, khu mơdró kâ kal athế hlê plĕng nhên ƀă mơjiâng tơdroăng loi tơngah dêi pó drêng veăng mơ’no liăn mơnhông mơjiâng hngêi trăng, troăng klông’’.