A rôh pêi cheăng, klêi kơ’nâi hmâng kăn teăng mâ Chin phuh ƀă Khu kăn séa ngăn pơchuât tơbleăng ‘nâng ‘nâi tơdroăng ki pêi pro ƀă pơchuât ‘nâng ‘nâi tơdroăng ki mơnhên tối rôh ki apoăng dêi khu kăn séa ngăn ‘na Pơkâ kơxô̆ 88 ƀă Pơkâ kơxô̆ 51 dêi Kuô̆k hô̆i ‘na hơ’lêh nếo tơdroăng, hlá mơ-éa hriâm phôh thong, mâu ngế cheăng tung Khu kăn séa ngăn ƀă kăn mâu kăn hiăng tơpui ‘na mâu tơdroăng ki kal tung 2 mơ-éa pơchuât tơbleăng. Tung mê, ai mâu tơdroăng môi tiah: mơnhên tối ‘na tâi tâng tơdroăng ƀă mâu tơdroăng môn hriâm; Tơdroăng hơ’lêh nếo túa hnê, túa mơnhên tối ki rơkê tung hnê hriâm; Tơdroăng ki chêh bro, pơkâ, kĭ, mơ’no tơbleăng ƀă yă tê mơ-éa hriâm. Tơdroăng ki trâm ƀă pơkâ mơ’no, pâ thế ƀă tơdroăng ki mâu thái cô hnê phôh thông; kơƀăng tăng, kế tơmeăm xúa tung hnê hriâm kum ăm tơdroăng tơbleăng tơdroăng hriâm nếo.

Tơpui a rôh pêi cheăng, pôa Trần Thanh Mẫn, Kăn xiâm phŏ hnê ngăn Kuô̆k hô̆i tối rơdêi, mâu rơkong tơpui tối, pâ thế dêi mâu kăn tơdrăng, khŏm mơ-eăm ƀă pôu râng dêi hnoăng khât. Khu kăn séa ngăn tơmâng xo tŭm ƀă kôm hriăn ngăn, pei pro klêi kơxop hlá mơ-éa pơchuât klêi kơ’nâi séa ngăn ƀă kơxop hlá mơéa Pơkâ vâ Vi ƀan pơkuâ Kuô̆k hô̆i tơkŭm po păng ‘nâng tơkŭm séa ngăn ƀă kăn teăng mâ mâu kơ koan, khu xiâm, kơvâ cheăng tơpui a mâu rôh pêi cheăng, pâ thế Chin phuh hriăn ngăn, tơmâng ngăn tŭm vâ chêh bro klêi tối tơbleăng, ‘mot tơ’nôm pơtroh ăm Khu kăn séa ngăn.

Pôa Trần Thanh Mẫn, kăn xiâm phŏ hnê ngăn Kuô̆k hô̆i pơkâ thế Chin phuh kal tơmâng ngăn 5 tơdroăng ki xiâm, hnoăng cheăng ki kal, tung mê, ai tơdroăng ki ‘na mâu thái cô:

“ ‘Na mâu thái cô ki hnê, kố cho tơdroăng ki kal vâ rak tơniăn ăm tơdroăng ki ƀlêi chiâng dêi tơdroăng tơbleăng tơdroăng hnê hriâm phôh thong ki nếo, pơkâ thế Chin phuh hnê mơhno mâu khu xiâm ki ai tơdjâk séa ngăn, mơnhên tối tŭm tâi tâng ‘na tơdroăng ki pơkâ, tơdroăng ki trâm, tơdroăng ki rơhêng vâ hnê mâu thái cô tung la ngiâ ƀă ai troăng hơlâ pơkâ tơtro, teăm tơdrêng vâ ‘mâi rơnêu tơdroăng ki ôh tá bê thái cô hnê ƀă tơdroăng ki rah xo thái cô; thăm mơdêk tơdroăng ki hnê, hnê tơ’nôm ăm thái cô tro tơdroăng ki rơhêng vâ dêi Tơdroăng hnê hriâm phôh thong hơnăm 2018”.

Pôa Trần Thanh Mẫn, Kăn xiâm phŏ hnê ngăn Kuô̆k hô̆i xuân pơkâ thế Chin phuh tơmâng ngăn hnê mơhno séa ngăn, mơnhên tối tơdroăng ki ai khât ƀă tơdroăng ki tối tơbleăng tơdroăng ki rơhêng vâ ‘na mâu kơƀăng tăng ‘nân, kế tơmeăm xúa tung hnê hriâm; ai troăng hơlâ kum mâu kong pơlê pơkâ tơleăng mâu tơdroăng ki xơpá, tơvâ tung tơkŭm tơbleăng pêi pro.

Pơtối kơjo kum, pêi pro kơtăng tơdroăng ki xing xoăng liăn ngân ăm tơdroăng ki hnê hriâm, hnê cheăng pêi tiô pơkâ; Tơdrêng amê hlối mơdêk hnoăng cheăng séa ngăn pêi pro hơ’lêh nếo tơdroăng ki hnê hriâm mơ-éa ki nếo.

Hdrối mê, tung khế 4/2023, Khu kăn séa ngăn dêi Vi ƀan pơkuâ Kuô̆k hô̆i xuân hiăng pêi cheăng ƀă Khu xiâm ngăn hnê hriâm ƀă hnê mơjiâng tuăn ngoâ rơkê ‘na pêi pro Pơkâ kơxô̆ 88 ƀă Pơkâ kơxô̆ 51 dêi Kuô̆k hô̆i ‘na hơ’lêh nếo tơdroăng ki hriâm hlá mơ-éa nếo phôh thong. Khu kăn séa ngăn hlo ối ai mâu tơdroăng ki kal châ pêi pro nhên tung mê ai tơdroăng ki rak tơniăn kơxô̆ liăn hrê ăm tối tơbleăng tơdroăng xuân môi tiah tơdroăng ki ôh tá chiâng dêi pơkâ thế pơlê pơla hơ’lêh hnê hriâm.

Jâ Vũ Thị Lưu Mai, Kăn phŏ pơkuâ Vi ƀan Liăn ngân dêi Kuô̆k hô̆i tối:

“Tung hên kơvâ mê pin kô chiâng vâ mơhnhôk tơlo kơxô̆ liăn sap ing pơlê pơla, la ƀă kơvâ cheăng hnê hriâm ƀă hnê cheăng pêi mê tơdroăng ki mơhnhôk tơlo mâu khu ki cheăng kâ ki ê veăng mê xuân trâm hên tơdroăng xơpá. Xua mê, tâng môi tiah pin pêi pro pơkâ thế mê cho mơhnhôk tơlo kơxô̆ liăn tơ’lêi hlâu lơ xơpá môi tiah lâi mê xuân pâ tế tối tơbleăng dêi Chin phuh xuân athế tiâ mơnhên tơdroăng kơ-êng cho tơdroăng ki ôh tá chiâng tung mơhnhôk tơlo kơxô̆ liăn sap ing pơlê pơla ƀă tơdroăng ki pêi pro 2 tơdroăng pơkâ dêi Kuô̆k hô̆i”.

Tung khế 6 pơla hdrối kố nah, pôa Vương Đình Huệ, Kăn xiâm hnê ngăn Kuô̆k hô̆i hiăng pơkuâ po rôh pêi cheăng dêi kăn pơkuâ Kuô̆k hô̆i ƀă Khu kăn séa ngăn dêi Vi ƀan pơkuâ Kuô̆k hô̆i ‘na “Tơdroăng pêi pro Pơkâ kơxô̆ 88 ƀă Pơkâ kơxô̆ 51 dêi Kuô̆k hô̆i ‘na hơ’lêh nếo tơdroăng, hlá mơ-éa hriâm phôh thong”. Kố cho môi tung 4 tơdroăng séa ngăn dêi Kuô̆k hô̆i, Vi ƀan pơkuâ Kuô̆k hô̆i tung hơnăm 2023. Kăn xiâm hnê ngăn Kuô̆k hô̆i mơnhên tối khât Khu kăn séa ngăn hiăng pêi pro kơtăng mâu tơdroăng pơkâ dêi Kuô̆k hô̆i ƀă dêi Vi ƀan pơkuâ Kuô̆k hô̆i, pêi pro ƀă tơdroăng ki hnê mơhno kơtăng ƀă hlá mơ-éa dêi Ngế pơkuâ khu kăn séa ngăn, Kăn xiâm phŏ hnê ngăn Kuô̆k hô̆i cho pôa Trần Thanh Mẫn.