Vi ƀan pơkuâ Kuô̆k hô̆i pơkâ tơkŭm po Rôh hôp khu kăn Kuô̆k hô̆i pêi cheăng rôh má 4, hneăng 14 vâ tơpui tơno, ăm rơkong tơpui tối ‘na 9 kơxop hlá mơ-éa luât pơtroh ăm Kuô̆k hô̆i a Hneăng hôp má 6. Rôh hôp khu kăn Kuô̆k hô̆i pêi cheăng kô châ tơkŭm po tiô tơdroăng hôp tơkŭm a Hngêi hôp kân Diên Hồng, Hngêi Kuô̆k hô̆i sap ing hâi lơ 28 – 30/8/2023.

Ki nhên, mâu kăn Kuô̆k hô̆i kô veăng ăm rơkong tơpui tối mâu kơxop hlá mơ-éa Luât: Tơnêi tơníu ki ‘mâi hơ’lêh; Tê mơdró hngêi trăng tơnêi tơníu ki ‘mâi hơ’lêh; Mâu tơdroăng ki ăm mung liăn ki ‘mâi hơ’lêh; Hngêi ối ki ‘mâi hơ’lêh; kế tơmeăm tung têa ki ‘mâi hơ’lêh; Viễn thông ki ‘mâi hơ’lêh; Căn cước kuăn pơlê ki ‘mâi hơ’lêh; Khu lêng ki veăng gâk kring, tơniăn a tơring cheăm; Pơkuâ ngăn, rak vế kế tơmeăm pơlê pơla ƀă kơpong cheăng lêng.

Kố cho mâu kơxop hlá mơ-éa luât ai mâu tơdroăng ki kân ối ai rơkong tơpui pơrá phá dêi rơpó, hiăng châ Kuô̆k hô̆i ăm rơkong tơpui tối a hneăng hôp má 5 kố nah, tung mê, Kuô̆k hô̆i ăm rơkong tơpui tối rôh má 2 ƀă kơxop hlá mơ-éa Luât Tơnêi tơníu ki ‘mâi hơ’lêh; ƀă ăm rơkong tơpui tối rôh apoăng tung 8 kơxop hlá mơéa luât ki u ối.