A kong pơlê Bạc Liêu, Kăn xiâm hnê ngăn Kuô̆k hô̆i Vương Đình Huệ hiăng troh pôu, hbru tơmeăm ăm lối 360 rơpŏng ki châ tơnêi têa kum, mâu ngế ki ai hnoăng, rơpŏng kơtiê, mâu ngế ki tro trếo ‘mêi dioxin, kŏng nhân, mâu ngế pêi cheăng ai tơdroăng rêh ối xơpá ai mâ a Hngêi mơhno túa lĕm tro kong pơlê Bạc Liêu.

Kăn xiâm hnê ngăn Kuô̆k hô̆i Vương Đình Huệ tối nhên, mơdêk khôi hmâ tŏng kum dêi rơpó tơniăn lĕm dêi hdroâng mơngế đi đo tŏng kum kuăn pơlê, malối cho hdrối rêm rôh Têt troh rơnó Hơngui vêh, Đảng, Tơnêi têa, Vi ƀan xiâm Măt trâ̆n Tơnêi têa Việt Nam ƀă mâu khu kăn pơkuâ đi đo tơmâng ngăn, kơdo mơ-eăm tơlo kum mâu kơxô̆ liăn, tơkŭm po hên tơdroăng pêi pro ai pơxúa, vâ tŏng kum ăm mâu rơpŏng ki châ tơnêi têa tŏng kum, mâu ngế ai hnoăng, rơpŏng kơtiê, mâu ngế ki châ tơnêi tơnêi têa kum, kŏng nhân, ngế pêi cheăng ai tơdroăng rêh ối xơpá ƀă hên ki ê vâ rêm ngế, rêm hngêi pơrá châ hơniâp ro rơnó hơngui, tơdah Têt.

Tung la ngiâ ah, Kăn xiâm hnê ngăn Kuô̆k hô̆i pơkâ thế rêm râ pơkuâ Đảng, kăn pơkuâ, Măt trâ̆n Tơnêi têa ƀă mâu kăn pơkuâ tung tâi tâng kong pơlê séa ngăn, tơbleăng pêi pro tro Pơkâ kơxô̆ 26 dêi Khu pơkuâ ngăn Đảng ‘na tơkŭm po Têt Giáp Thìn hơnăm 2024:

“Hbrâ rơnáu mâu tơdroăng ki tro má môi kum Kuăn pơlê hơniâp  ro rơnó Hơngui, tơdah Têt hơniâp, rơdêi, tơniăn, kơdĭng. Pơtối tơmâng ngăn, tŏng kum ăm mâu rơpŏng ki ai tơnêi têa tŏng kum, ngế ki ai hnoăng, rơpŏng kơtiê, mâu ngế ki tro trếo ‘mêi dioxin, kŏng nhân, ngế pêi cheăng mâu rơkong tơpui tối dêi Kuăn pơlê, ngế pêi cheăng, hriăn ngăn, chêh pro troăng hơlâ tŏng kum, troăng tŏng kum, pro tơ’lêi hlâu vâ rêm rơpŏng, rêm ngế krê mơnhông tơdroăng rêh ối, mơ-eăm hluăn ing kơtiê krá ton. Tâng mâu ngế ki lâi ôh tá kâi hluăn ing kơtiê mê kô hơ’lêh tŏng kum pơlê pơla vâ tŏng kum ăm kuăn pơlê. Đảng, tơnêi têa ƀă tá tơná á kố rơhêng vâ mâu rơpŏng ki châ tơnêi têa kum, rơpŏng kơtiê, vâi krâ nhŏng o ai tơdroăng rêh ối xơpá pơtối mơ-eăm, kơhnâ pêi cheăng, rế hía rế mơjiâng tơdroăng rêh ối phâi hơtô, hơniâp ro tâ. Mâu nhŏng o, kŏng nhân, ngế pêi cheăng veăng tŏng kum mâu ngế ki xơpá cho tơdroăng tơdjuôm dêi tơnêi têa, kong pơlê ƀă khu mơdró kâ; pêi pro kơtăng mâu troăng pơkâ dêi Đảng, luât dêi tơnêi têa, veăng pơkâ tơleăng tơrŭm cheăng hơniâp ro tơniăn lĕm, tơdroăng pơkâ tung khu mơdró kâ, rơtế ƀă khu mơdró kâ ‘mâi mơnhông pêi cheăng kâ”.

Drêng kố, Vi ƀan xiâm Măt trâ̆n Tơnêi têa Việt Nam, Khu xoâm tơrŭm ngăn ‘na Pêi cheăng Việt Nam, Tíu xiâm Khu lo tŏng veăng Việt Nam diâp 600 kơxuô tơmeăm ăm mâu rơpŏng ki châ tơnêi têa tŏng kum, ngế ki ai hnoăng, rơpŏng kơtiê, mâu ngế ki tro trếo ‘mêi dioxin, kŏng nhân, ngế pêi cheăng ai tơdroăng rêh ối xơpá a kong pơlê Bạc Liêu.

Xuân tung măng tĭng hdrối, a Kơpong cheăng ƀă kơmăi kmok Suối Dầu, tơring Cam Lâm, kong pơlê Khánh Hòa, Kăn xiâm phŏ hnê ngăn Kuô̆k hô̆i Nguyễn Khắc Định rơtế ƀă Khu kăn ki pêi dêi hnoăng cheăng troh pôu tíu tơkŭm po “Têt tơrŭm - Hơngui tŏng kum” ƀă hbru tơmeăm ăm mâu ngế pêi cheăng a kong pơlê Khánh Hòa. Xuân tung rôh kố hiăng po Tơdroăng Kơchơ Têt Kŏng đoân 2024 a 5 to tíu tung kong pơlê. A 5 to tíu ki kố, ai 10 kơbong tê tơmeăm 0 liăn, dâng 200 kơbong tê tơmeăm kơdroh yă mâu kế tơmeăm ki xúa ăm đoân viên, ngế pêi cheăng.

Pakĭng mê, Khu tơrŭm ngăn ‘na Pêi cheăng kong pơlê Khánh Hòa ối tơrŭm ƀă mâu tíu pêi cheăng tơkŭm po khăm ivá, tiâ mơnhên luât ‘na ƀaoh hiêm ăm kŏng nhân, mơngế pêi cheăng. Têt Giáp Thìn 2024, Kŏng đoân rêm râ a kong pơlê Khánh Hòa hiăng ‘măn 50 rơtal liăn vâ pôu kơ-êng, tŏng kum Têt ăm mâu ngế pêi cheăng.

A tíu tơkŭm po “Têt tơrŭm – Rơnó Hơngui tŏng kum” ƀă Kơchơ Kŏng đoân dêi Kơpong cheăng ƀă kơmăi kơmok Suối Dầu, Kăn xiâm phŏ hnê ngăn Kuô̆k hô̆i Nguyễn Khắc Định ƀă kăn pơkuâ Khu xiâm tơrŭm ngăn Pêi cheăng Việt Nam, kăn pơkuâ kong pơlê Khánh Hòa diâp 400 kơxuô tơmeăm ăm mâu ngế pêi cheăng. Tơpui ƀă mâu ngế pêi cheăng lo ing mâu khu mơdró kâ a Kơpong cheăng ƀă măi kơmok Suối Dầu, mâu kơpong cheăng ƀă kơmăi a kong pơlê Khánh Hòa, Kăn xiâm phŏ hnê ngăn Kuô̆k hô̆i Nguyễn Khắc Định pơtroh rơkong rơkâu Têt, pôu kơ-êng mâu ngế pêi cheăng, tơdrêng amê hlối rơhêng vâ mâu rơpŏng kố pơtối mơ-eăm pêi cheăng, tơkâ luâ xơpá, ai môi tơdroăng rêh ối tơniăn tâ. Kăn xiâm phŏ hnê ngăn Kuô̆k hô̆i Nguyễn Khắc Định tối nhên:

“Kăn pơkuâ hnê ngăn Đảng, Tơnêi têa, kăn pơkuâ kong pơlê Khánh Hòa đi đo tơmâng, hlê, đi đo tŏng kum troh tơdroăng rêh ối dêi mâu ngế pêi cheăng . Ƀă rơhêng vâ nhŏng o, đi đo tơrŭm, hâk vâ tơdroăng cheăng mơjiâng pro kế tơmeăm Kơpong cheăng ƀă kơmăi kmok, mơjiâng kong pơlê Khánh Hòa ƀă veăng kum tơdroăng pêi pro tơƀrê tơdjuôm dêi lâp tơnêi têa. Pâ rơkâu rêm rơpŏng kŏng nhân pêi cheăng a kong pơlê Khánh Hòa tơdah Têt Lo hơnăm nếo Giáp Thìn hơtôu, tơrŭm, tơkŭm, ai hên tơdroăng hơ-ui pâ dêi rơpó ƀă hơniâp”.