Veăng a rôh tơpui tơno kố ai kăn pơkuâ Vi ƀan hnê ngăn kong pơlê, kăn pơkuâ mâu khu râ kơvâ cheăng ƀă 250 ngế đoân viên droh rơtăm teăng mâ ăm lối 90 rơpâu ngế droh rơtăm tung kong pơlê. Rôh hôp po tung tơdroăng ki hiâm mơno tơpui tơdrăng,kăn pơkuâ mâu tíu pêi cheăng ki ai tơdjêk troh tiâ mơnhên tơdrêng mâu rơkong kơ-êng dêi mâu droh rơtăm.

Mâu đoân viên droh rơtăm tung kong pơlê hiăng kơ-êng mâu rơkong kơ-êng ki ai tơdjâk troh mâu tơdroăng môi tiah: hnoăng cheăng dêi droh rơtăm ‘na hơ’lêh kơxô̆; troăng hơlâ tŏng kum, hnê cheăng pêi, hnê hriâm, tơdroăng cheăng ăm droh rơtăm ‘na hơ’lêh kơxô̆, cheăng kâ kơxô̆. Pôa Nguyễn Tuấn Hà, kăn phŏ hnê ngăn Vi ƀan kong pơlê Dak Lak mơnhên tối: mâu rơkong tơpui dêi droh rơtăm ki tối a rôh hôp gá tơtro khât ƀă ai pơxúa, mơhno tơdroăng ki tơmâng ngăn dêi droh rơtăm ƀă mâu tơdroăng ki kal tơdjâk troh mơnhông mơdêk cheăng kâ kơxô̆, hơ’lêh kơxô̆ a kong pơlê.