Pôa Vương Đình Huệ - Kăn xiâm hnê ngăn Kuô̆k hô̆i ai tối tiah kố, tối troh vâi kơdrâi, kong têa ê xuân môi tiah Việt Nam pơrá tối mâu rơkong ki tơpui lĕm má môi. Pôa Hồ Chí Minh - Kăn xiâm hnê ngăn xuân tối nhên, “Tơnêi têa Việt Nam tung mê ai vâi kơdrâi pin, vâi hơnăm ối nếo xuân môi tiah hiăng krâ, veăng bro lĕm ƀă bâ eăng ăm tơnêi têa’’. Ing ton tĭn nah troh nôkố, vâi kơdrâi xuân đi đo cho ngế ki kal tung veăng kum pơlê pơla mơnhông ƀă mơjiâng rơpŏng hngêi hơniâp ro; tung mâu tơdroăng ki lâi, ối a tíu lâi, vâi kơdrâi Việt Nam đi đo mơdêk hiâm mơno ki lĕm “Ngế ki khên tơnôu – Ôh tá la lâi hía – Têm rơpiât – Rơkê tung mâu tơdroăng’’ môi tiah 8 chư mêa Pôa Hồ hiăng diâp.

Rơtế ƀă hnoăng mơnhông dêi tơdroăng rêh ối rơkê plĕng nôkố, mâu hiâm mơno ki lĕm mê pơtối châ mơnhông, mơdêk chiâng mâu tơdroăng ki pơkâ lĕm tung chal nếo nôkố cho: Khên tơnôu – Loi ngah – Tơdrăng – Rơkê.

Kăn xiiâm hnê ngăn Kuô̆k hô̆i tối nhên, mâu hneăng cheăng Kuô̆k hô̆i ƀă ing apoăng hneăng cheăng Kuô̆k hô̆i hneăng 15 troh nôkố, Kuô̆k hô̆i đi đo tí tăng, hơ’lêh nếo pêi tơƀrê tŭm têk. Tung tơdroăng mê, pơrá ai hnoăng dêi mâu vâi kơdrâi cheăng tung Kuô̆k hô̆i, mâu vâi nâ o tung kơ koan dêi Kuô̆k hô̆i.

Malối, hneăng cheăng Kuô̆k hô̆i hneăng 15 ai kơxô̆ kăn Kuô̆k hô̆i hên má môi tung 10 hneăng cheăng a chê kố, châ 30,26%, tung kơxô̆ ki kố châ Kuô̆k hô̆i mâu kong têa mơnhên tối khât. Tung mê, ai 03 ngế kơdrâi cheăng tung Tíu xiâm Đảng, cheăng tung khu pơkuâ Kuô̆k hô̆i, 32 ngế cho kăn xiâm phŏ hnê ngăn/Kăn phŏ pơkuâ, Ngế cheăng tung khu pơkuâ, Ngế cheăng ki pơkuâ a Hô̆i đong hdroâng kuăn ngo, mâu Vi ƀan, pơkuâ Ƀơrô cheăng Kuô̆k hô̆i, kăn pơkuâ mâu kơ koan ối tung Vi ƀan pơkuâ Kuô̆k hô̆i.

Mâu kăn Kuô̆k hô̆i hiăng hriăn ngăn mâu hlá mơ-éa, hlo rơkê khât, rơkong veăng tơpui tối tro, rơkê a mâu rôh hôp, veăng tơpui tối hên ăm Kuô̆k hô̆i, kơ koan dêi Kuô̆k hô̆i, kơ koan ối tung Vi ƀan pơkuâ Kuô̆k hô̆i; mơnhông tro ki pơxúa vâ pêi pro tro tâ troăng hơlâ tơdâng tơ’mô pơla kơnốu ƀă vâi kơdrâi. Khu kăn Kuô̆k hô̆i hiăng tơkŭm po hên roh trâm mâ, tơpui tơno, tối ăm dêi ropó mâu tơdroăng ki rơkê plĕng ‘na tơdroăng cheăng dêi mâu kăn xuân môi tiah hriâm ƀối ki rơkê dêi mâu khu kăn kơdrâi Kuô̆k hô̆i kong têa ê a mâu roh hôp hên kơvâ ƀă rôh hôp pơla péa pâ.

Teăng mâ hâi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i mơnhên tối khât mâu ivá mơ-eăm, pêi pro rơkê dêi mâu kăn Kuô̆k hô̆i kơdrâi ki pêi cheăng a Tơnêi têa ƀă kăn pơkuâ, pơkuâ ngăn râ cheăng dêi Ƀơrô cheăng Kuô̆k hô̆i, Viê̆n hriăn ngăn mơjiâng luât; tối nhên, Kuô̆k hô̆i đi đo pơkâ kơtăng troăng hơlâ dêi Đảng ‘na hnoăng cheăng vâi kơdrâi:

“Pơkâ thế pơkâ kơtăng Pơkâ kơxô̆ 11 dêi Khu xiâm pơkuâ tơdroăng kal kí ‘na hnoăng cheăng vâi kơdrâi tung chal mơdêk hơ’lêh cheăng ƀă kơmăi kơmok, rơkê plĕng dêi tơnêi têa, Tơdroăng pơkâ kơxô̆ 21 dêi Khu pơkuâ ngăn Đảng ‘na pơtối mơdêk rơdêi hnoăng cheăng vâi kơdrâi tung tơdroăng nếo; tơbleăng pêi pro tro hnoăng cheăng troăng hơlâ ‘na pêi pro tơdroăng pơkâ pro tơdâng tơ’mô pơla kơnốu ƀă kơdrâi, veăng kum pêi châ hên mâu tơdroăng mơnhông krá tơniăn troh hơnăm 2023, pêi pro tơƀrê tơdroăng cheăng tung la ngiâ tơnêi têa ‘na tơdâng tơ’mô pơla kơnốu ƀă kơdrâi pơla hơnăm 2021 – 2030. Maluâ tơdroăng ki pro tơdâng tơ’mô pơla kơnốu ƀă kơdrâi troh nôkố pêi pro gá hiăng tro, la u lâi mê ‘lo pin xuân athế pơtối pơkâ kơtăng. Ngin pơkâ thế rêm râ mâu tíu pêi cheăng mâu vâi pú đi đo pơkâ kơtăng ing tơdroăng ki hlê ‘na tuăn tơmiât troh pêi, tung tơdroăng tơpui tung pơcháu hnoăng cheăng”.

Kăn xiâm hnê ngăn Kuô̆k hô̆i ăm ‘nâi, la ngiâ Đảng đoân Kuô̆k hô̆i  hnê mơhno pro tơdroăng pơkâ, chêh inâi mâu ngế ki vâ pêi cheăng, pơtối mơdêk kơxô̆ ngế kơdrâi, malối cho ngế kơdrâi cheăng Kuô̆k hô̆i. Troh nôkố, Kuô̆k hô̆i hiăng pêi rơkê hnoăng cheăng pơkâ khu kăn Kuô̆k hô̆i vâ thăm mơdêk tơkŭm po tơ’nôm mâu tơdroăng lăm hriăn ngăn, séa ngăn ƀă  hên tơdroăng ki ê. Pakĭng mê, Đảng đoân Kuô̆k hô̆i xuân kal tơmâng ngăn troh hnoăng cheăng kăn ƀô̆ kơdrâi, tŏng kum tơdroăng rêh ối hiâm mơno ăm vâi kơdrâi, tung mê ai liăn khế; ai túa pơkâ mơdêk ki rơkê, tơƀrê dêi Khu kăn Kuô̆k hô̆i vâi kơdrâi.

Kăn xiâm hnê ngăn Kuô̆k hô̆i tối loi tơngah tiah kố, mâu kăn cho khu vâi kơdrâi cheăng tung Kuô̆k hô̆i kô pơtối mơdêk mâu tơdroăng ki hiăng pêi pro klêi, ai mâu ivá veăng kum hên tâ nếo tung tơdroăng cheăng dêi Kuô̆k hô̆i, rơtế pêi chiâng hên tơdroăng ki ƀlêi chiâng kân kĭn vâ pro lĕm tơ’nôm khôi hmâ khên tơnôu ƀă tơmiât troh tơbâ 80 hơnăm Kuô̆k hô̆i Việt Nam.