A Gia Lai, Kăn xiâm hnê ngăn Kuô̆k hô̆i Vương Đình Huệ mơnhên tối khât tơdroăng rêh ối kong pơlê hiăng mơ-eăm mơnhông cheăng kâ rêh ối pơlê pơla, mơdêk tơdroăng rêh ối hiâm mơno ƀă liăn ngân ăm kuăn pơlê. Malối, tung kơvâ cheăng mơhno túa lĕm tro ai hên tơdroăng ki hiăng hơ’lêh, mơnhông tro mâu kơnía ‘na túa lĕm tro dêi mâu hdroâng kuăn ngo kong pơlê Gia Lai; ki rơkê tung hnê hriâm, khăm pơlât châ mơdêk.

Mâu tơdroăng tŏng kum rêh ối pơlê pơla, xut tah hrâ mơnguâ kơtiê xơpá, tăng cheăng pêi châ tơmâng ngăn tơbleăng tơdâng tơ’mô; kơxô̆ rơpŏng kơtiê kơdroh ối 8,11%. Tơkŭm hnê mơhno rêm râ, mâu kơvâ cheăng, mâu cheăm tơring pêi pro tro mâu troăng hơlâ tŏng kum rêh ối pơlê pơla, tŏng kum kuăn pơlê tung rôh Têt, rak tơniăn rêm hngêi, rêm ngế pơrá châ ro Hơngui, tơdah Têt. Kố cho ivá mơ-eăm khât dêi kong pơlê.

Kăn xiâm hnê ngăn Kuô̆k hô̆i xuân tối tiah kố, xua tơdjâk dêi pơreăng COVID-19, nôkố xuân ối ai hên rơpŏng ối trâm pá, kŏng nhân pêi cheăng ai tíu ôh tá ai cheăng pêi. Hlo tơdroăng kố, Đảng, Tơnêi têa pin xuân hiăng tơmâng ngăn troh kuăn pơlê ƀă túa ki pơkâ mâu troăng hơlâ vâ pro tơ’lêi hlâu má môi. Malối cho Khu pơkuâ ngăn Đảng hiăng pơkâ kơxô̆ 26 ‘na tŏng kum Têt ăm mâu kơtiê.

“Veăng tơdroăng kŭn chiâng tơdroăng kân, hiâm mơno “hơ-ui ngế ki ê môi tiah hơ-ui dêi tơná” dêi hdroâng mơngế Việt Nam cho tơtro khât tung kong têa ê ƀă cho tơdroăng cheăng pêi ki đi đo, malối cho tung rôh Têt troh Hơngui vêh. Xua Têt cho má môi, ôh tá ai klâi tơxâng ƀă Têt. Mâu kăn pơkuâ Đảng, Tơnêi têa pơrá rơhêng vâ ai tơdroăng rêh ối tro má môi vâ rêm ngế, rêm hngêi, bô bố xuân châ ro Hơngui, tơdah Têt. Ngin mơnhên tối khât ƀă malối khĕn kơdeăn Đảng ƀô̆ khu kăn pơkuâ, tá khu pơkuâ tơdroăng kal kí dêi kong pơlê Gia Lai maluâ xơpá ‘na liăn ngân, cho kong pơlê kơtiê, la hiăng đi đo tơmâng ngăn tŏng kum ƀă xuân ngăn nhuô̆m khât hnoăng cheăng kố. Ngin pơkâ thế, khu pơkuâ tơdroăng kal kí pin hiăng tơmâng ngăn mê nếo pơtối tơmâng ngăn ta nếo, rơtế ƀă khu mơdró kâ mâu khu ki ai hiâm mơno hơ-ui tŏng kum kuăn pơlê ƀă túa ki tro má môi cho mơnhông bro tê mơdró pro tiah lâi vâ vâi krâ nhŏng o châ hluăn ing kơtiê. Tơmâng ngăn tơ’nôm ‘na kơxô̆ rơpŏng ki roê ƀaoh hiêm pơlê pơla, ƀaoh hiêm khăm pơlât”.

Drêng kố, Kăn xiâm hnê ngăn Kuô̆k hô̆i Vương Đình Huệ ƀă khu kăn ki pêi dêi hnoăng cheăng hiăng diâp 400 kơxuô tơmeăm ăm mâu rơpŏng châ tơnêi têa kum, ngế ki ai hnoăng, kăn ƀô̆, lêng kring vế tơniăn, rơpŏng kơtiê, mâu ngế ki tro trếo ‘mêi dioxin, kŏng nhân, ngế pêi cheăng ai tơdroăng rêh xơpá a kong pơlê; mơhnhôk veăng tơlo kum diâp 200 toăng hngêi tơrŭm, kơnâ 10 rơtal liăn xua Măt trâ̆n Tơnêi kong pơlê Gia Lai.

Xuân tung rôh lăm pôu ƀă pêi cheăng a Gia Lai, Kăn xiâm hnê ngăn Kuô̆k hô̆i Vương Đình Huệ hiăng châ hlo Hngêi rak liăn TMCP Công thương Việt Nam (Vietinbank) diâp 10 rơtal liăn ăm kong pơlê Gia Lai vâ kum mơjiâng bro tíu pêi cheăng Kŏng an cheăm tơkăng kong.

Xuân tung rôh pêi dêi hnoăng cheăng a kơpong Tây Nguyên, Kăn xiâm hnê ngăn Kuô̆k hô̆i Vương Đình Huệ hiăng pơkâ hnoăng ăm pôa Bùi Văn Cường, Ngế xiâm chêh tôm xo rơkong, Kăn pơkuâ Ƀơrô cheăng Kuô̆k hô̆i, pơtroh 300 kơxuô tơmeăm Têt ăm kong pơlê Dak Lak. Tiô tơdroăng hnê mơhno dêi Khu pơkuâ ngăn Tíu xiâm Đảng ƀă pêi pro tơdroăng ki xing xoăng dêi Khu xiâm pơkuâ tơdroăng kal kí, Kăn xiâm hnê ngăn Kuô̆k hô̆i hiăng pôu hbru tơmeăm ƀă rơkâu Têt 3 to kong pơlê mê cho: Bạc Liêu, Gia Lai, Yên Bái.

Laga, ƀă hiâm mơno dêi tơná, Kăn xiâm hnê ngăn Kuô̆k hô̆i hiăng mơhnhôk tơ’nôm mâu kơxuô tơmeăm vâ hbru ăm mâu rơpŏng ki châ tơnêi têa, kuăn pơlê ki xơpá a mâu cheăm tơring. Krê kong pơlê Dak Lak, Kăn xiâm hnê ngăn Kuô̆k hô̆i pơtroh 300 kơxuô tơmeăm (rêm kơxuô kơnâ 1 rơtuh 300 rơpâu liăn) kơnôm kăn pơkuâ kong pơlê diâp ăm kuăn pơlê hdroâng kuăn ngo rôh Têt Giáp Thìn hiăng vâ chê troh.

Kăn xiâm hnê ngăn Kuô̆k hô̆i Vương Đình Huệ pơtroh rơkong tơniăn lĕm má môi troh Đảng ƀô̆, khu kăn pơkuâ, kuăn pơlê mâu hdroâng kuăn ngo a kong pơlê Dak Lak drêng rôh apoăng hơngui hơnăm nếo. Pôa Bùi Văn Cường ăm ‘nâi:

“Pôa Vương Đình Huệ, Ngế cheăng tung Khu xiâm kal kí, Kăn xiâm hnê ngăn Kuô̆k hô̆i pơcháu ăm á ƀă pơtroh rơkong rơkâu tơniăn lĕm má môi troh đảng ƀô̆, khu kăn pơkuâ kuăn pơlê kong pơlê Dak Lak. Rơkâu hơnăm nếo ai hên ivá, hơniâp ƀă ƀlêi chiâng mâu tơdroăng. Rơkâu kong pơlê pơtối mơ-eăm ai mơnhông tung cheăng kâ rêh ối pơlê pơla, rak vế tơniăn tơdroăng pơkuâ ngăn pơlê pơla cheăm bêng – gak kring, mơjiâng Đảng mơjiâng khu pơkuâ tơdroăng kal kí châ hên tơdroăng tơƀrê”.

Tiô pôa Nguyễn Đình Trung, Ngế cheăng tung tíu xiâm Đảng, Kăn pơkuâ ngăn Đảng Dak Lak: Têt hơnăm kố, kong pơlê Dak Lak hiăng mơhnhôk tơlo châ lối 80 rơtal liăn vâ tŏng kum Têt ăm rơpŏng ki châ tơnêi têa kum, kuăn pơlê ki xơpá. Tung mâu hâi hdrối nah, mâu khu kăn ki pêi dêi hnoăng cheăng dêi kong pơlê xuân hiăng troh a mâu kơpong hngế, hngo vâ hbru tơmeăm Têt ƀă rơhêng vâ ôh tá ai kơbố ki lâi kơklêa, ôh tá lôi kơbố ki lâi pa rŏng.