Veăng Hôp ai lối 500 ngế cheăng tung khu kăn hnê ngăn, tôh chêh tôm xo rơkong, Ngế pơkuâ khu ki rơkê cheăng dêi Tíu xiâm, Ƀơrô Khu hnê mơhno cheăng; Kăn teăng mâ dêi khu hnê mơhno cheăng kơxô̆ 35, khu kăn Đảng, Đảng đoân, Đảng ủy dêi Tíu xiâm tơnêi têa, mâu kăn dêi Khu hnê mơhno cheăng kơxô̆ 35 mâu kăn Đảng kong pơlê, mâu kăn Đảng pơlê kong kân dêi râ xiâm tơnêi têa.

Ƀă tơdroăng môi tuăn dêi rơpó, pêi cheăng tro hnoăng, tơdrăng, Hneăng hôp hiăng mơdoh hên chôu tơmâng mâu kăn tơpui, tối mơnhên ‘na mâu  tơdroăng ki kal châ tơpui tung Hlá mơ-éa chêh tơbleăng mơgêi 5 hơnăm hnê pêi pro tiô pơkâ kơxô̆ 35 - NQ/TW, tơkŭm tối tro ƀă nhên mâu tơdroăng hiăng châ pêi pro, mâu tơdroăng ki hâi pêi pro ối pá, tơvâ tơvân, tối ki xiâm, ing mê tối ăm râ kơpêng, pâ hên troăng rơhlâ tá tơdroăng tơpui ƀă ki ai khât vâ mơdêk tơƀrê, pêi ai pơxúa mâu tơdroăng cheăng tung la ngiâ.

Mâu kăn tối hên túa pêi pro ki tro, túa pêi cheăng hriăn plĕng ki nếo, ƀai hriâm tung tơdroăng  cheăng kring vế xiâm troăng rơhlâ dêi Đảng; tơplâ, mơdât, tah mâu tơdroăng ki ‘mêi, mâu tơdroăng ki ôh tá tro, ki kơneăm, hêng hôu ƀă hía hé.

Tối tơbleăng hnê mơhno a hneăng Hôp, Kăn hnê ngăn tơnêi têa Võ Văn Thưởng khĕn kơdeăn, kơ’nâi 5 hơnăm tơbleăng pêi tơdroăng Pơkâ kơxô̆ 35 - NQ/TW, ki hlê dêi râ ủy, khu tơrŭm cheăng Đảng, kăn bô̆, đảng viên ‘na hnoăng cheăng, tơdroăng cheăng pêi, ki kal dêi tơdroăng kring vế xiâm tuăn mơno troăng rơhlâ dêi Đảng, tơplâ, mơdât, tah lôi mâu tơdroăng ki ôh tá tro,   hên pơ’lêh, ki hlo nhên, ki tro; mơhnhôk tăng ivá rơdêi tâi tâng tá khu cheăng kal kí, veăng tơmâng a râ ủy, khu tơrŭm cheăng Đảng, Măt trâ̆n, mâu khu tơrŭm cheăng kal kí pơlê pơla ƀă pro xiâm ivá rơdêi tơkŭm tâi tâng, pro xiâm ki vâ pêi pro tro tuăn kuăn pơlê tung kring vế troăng rơhlâ dêi Đảng.

Tơdroăng cheăng tối ăm ‘nâi mâu tơdroăng kal, hnê tối ai hên ki pơ’lêh hriăn plĕng nếo tá tơdroăng kal, tá tơdroăng pêi pro, troăng rơhlâ pêi, pơtối rak vế pêi pro tro hnoăng  tối mâu tơdroăng dêi mâu kơ koan chêh hlá tơbeăng, rơ’jíu, malối cho tung internet ƀă măng xah hô̆i, tơbleăng troh lâp lu teăm tơdrêng troăng rơhlâ dêi Đảng, luât tơnêi têa têa, mâu tơdroăng ki tro ‘ló, mâu hnoăng hiăng châ pêi pro tung tơdroăng pơ’lêh nếo dêi tơnêi têa tung tâi tâng mâu kơvâ cheăng; hnê tối mâu tơdroăng ki tro ‘ló, mơhno ngế ki djâ troăng lĕm ahdrối troh hên kăn bô̆, đảng viên ƀă kuăn pơlê. 

Mâu tơdroăng hiăng pêi pro klêi kơ’nâi 5 hơnăm pêi pro tiô Pơkâ kơxô̆ 35 - NQ/TW hiăng veăng ‘no hnoăng  kí kal rak tơniăn tơdroăng kal kí, kring vế tơniăn pơlê pơla, mơnhông kuăn pơlê loi kơ Đảng, Tơnêi.

Kăn xiâm hnê ngăn tơnêi têa pơkâ thế rêm râ ủy Đảng pơtối hnê, pêi tro tâ nêo tơdroăng cheăng kring vế xiâm tuăn mơno troăng rơhlâ dêi Đảng, tơplâ tah mâu tơdroăng ôh tá tro, ki kơneăm hêng hôu, malối tung tơdroăng nôkố; nâi nhên hnoăng pêi pro dêi mơngế ki pơkuâ xiâm ƀă rêm ngế kăn ƀô̆, đảng viên tung tơdroăng cheăng mê.

Tơdrêng amê, pơtối rak troh tâ nếo hnoăng cheăng pêi dêi mâu kơ koan kring vế xiâm tuăn mơno troăng rơhlâ dêi Đảng; mơnhông pơxúa tơƀrê tơdroăng nếo ai, hnê mơhno, tơbleăng mâu tơdroăng ki troh, mơ-eăm plâ tah mâu tơdroăng ki ôh tá tro, ki kơneăm hêng hôu.

A hneăng Hôp, mâu kăn hiăng lăm ngăn tíu mơđah tơbleăng um tơmeăm tí tăng ‘nâi plĕng khoa hok, hlá mơ-éa tí tăng ngăn, hmâ séa ngăn, um xup a mâu rôh hôp tơpui ‘na khoa hok, tơmeăm khoa hok - kŏng ngê̆ ki xúa tung kring vế xiâm tuăn mơno dêi Đảng; séa ngăn phim xup ton nah ‘na tơdroăng cheăng pêi 5 hơnăm  tơbleăng pêi tiô pơkâ kơxô̆ 35 -NQ/TW dêi khu xiâm Kal kí hneăng 12.

Khu hnê mơhno kơxô̆ 35 Tíu xiâm xuân hiăng diâp Ƀâng kơdeăn khĕn ăm mâu khu pú hên, mâu ngế hiăng ai hnoăng pêi cheăng rơkê kơhnâ tung 5 hơnăm tơbleăng pêi tiô tơdroăng cheăng kring vế xiâm tuăn mơno troăng rơhlâ dêi Đảng, tơplâ tơtrâ mâu tơdroăng ôh tá tro, ki kơneăm hêng hôp.