Kăn xiâm phŏ hnê ngăn Kuô̆k hô̆i Nguyễn Đức Hải hiăng diâp 12 hnoăng tơmeăm ăm mâu rơpŏng kơtiê, rơpŏng ai hnoăng tơnêi têa veăng tơdroăng “Têt hơ-ui kum’’. Kăn xiâm phŏ hnê ngăn  Kuô̆k hô̆i Nguyễn Đức Hải tối, kố cho Tơdroăng ai pơxúa khât ƀă lĕm ‘nâng, vâ tơrŭm tung kuăn pơlê, rơtế kum dêi rơpó ƀă hiâm mơno hơ-ui pâ, djâ ăm rêm ngế kuăn pơlê châ xah hêi ro Têt tơtô, tro tiô túa hmâ pêi pro sap nah dêi hdroâng mơngế.

Kăn xiâm phŏ hnê ngăn Kuô̆k hô̆i pơkâ thế râ ủy đảng, mâu kăn kong pơlê Lạng Sơn pakĭng tơkŭm hnê mơhno mơnhông cheăng kâ-rêh ối kal pơtối tơmâng troh tơdroăng rêh ối kuăn pơlê; tơmâng hnê mơhno, tơrŭm ƀă vâ Tơdroăng “ Têt hơ-ui pâ” pơtối pêi pro, tơbleăng pêi tơƀrê ƀă rế ton rế pro pơxúa ăm hên ngế châ tơdah Têt hơniâp ro, tơtô tâ.

Xuân tung hâi lơ 26/1, Kăn xiâm phŏ hnê ngăn Kuô̆k hô̆i Nguyễn Đức Hải hiăng lăm pôu, hbru 200 kơxu tơmeăm ăm mâu kŏng nhân, mơngế pêi cheăng kơtiê xơpá a Tơdroăng “Têt tơkŭm tơrŭm - rơnó Hơngui kum dêi rơpó” hơnăm 2024 dêi kong pơlê Lạng Sơn.