A rôh lăm pôu, jâ Trương Thị Mai hiăng khên kơdeăn hnoăng cheăng mơ-eăm tơkâ luâ xơpá dêi khu pú hên kăn ƀô̆, kŏng nhân, mơngế pêi cheăng kơpong hngêi kơmăi Phú Hội tung pêi pro tơmeăm uâ pơliê tơmeăm pê lo ing chiâk deăng.

Veăng djâ kơlo tâk kơvâ chiâk deăng dêi kong pơlê tối krê, lâp tơnêi têa tối tơdjuôm hên má môi tung 10 hơnăm hdrối. Tơmeăm pê lo kơchâi, plâi pôm dêi Lâm Đồng nôkố hiăng châ tê ăm hên kong têa tung lâp plâi tơnêi. Pakĭng mê, Jâ Trương Thị Mai xuân pơkâ thế mâu kơpong hngêi kơmăi, mâu kăn kong pơlê Lâm Đồng pơtối tơmâng tŏng kum, tơdroăng rêh ối ăm mơngế pêi cheăng a kơpong hngêi kơmăi, malối thâ pê klêi mâu tơdroăng tơkêa bro ‘na hngêi ối pơlê pơla ăm kŏng nhân.

Rôh kố, jâ Trương Thị Mai hiăng diâp tơmeăm Têt ăm kơpong hngêi kơmăi Phú Hội, diâp 200 kơxu tơmeăm ăm kŏng nhân mơngế pêi cheăng dêi kơpong hngêi kơmăi, rêm kơxu tơmeăm kơnâ 1,3 rơtuh liăn.