Hâi lơ 17/7, Khu kăn séa ngăn ‘na tơdroăng cheăng (Khu kăn pêi cheăng kơxô̆ 2) ai rôh pêi cheăng ƀă Vi ƀan hnê ngăn kong pơlê Sóc Trăng ‘na “Tơdroăng tơbleăng pêi pro mâu tơdroăng pơkâ dêi Kuô̆k hô̆i ‘na mâu Tơdroăng pơkâ tơnêi têa ‘na mơjiâng thôn pơlê nếo, pơla hơnăm 2021 – 2025, kơdroh kơtiê krá ton pơla hơnăm 2021 – 2025, mơnhông cheăng kâ rêh ối pơlê pơla kơpong hdroâng kuăn ngo ƀă kong ngo pơla hơnăm 2021 – 2030”.

Riân troh mơ’nui hơnăm nah, kong pơlê Sóc Trăng hiăng ai 64/80 to cheăm pêi klêi thôn pơlê nếo, 16 to cheăm pêi klêi thôn pơlê mơdêk, ai 3 tíu pêi cheăng râ tơring pêi klêi hnoăng cheăng mơjiâng thôn pơlê nếo. Pêi lo liăn rêm ngế a kơpong thôn pơlê tâk 43,4 rơtuh liăn tung môi ngế (tâk 1,1 xôh tâng pơchông ƀă hơnăm 2020).

Tơpui mơgêi a rôh séa ngăn, khu kăn mơnhên tối khât klêi kơ’nâi tơbleăng mâu tơdroăng pơkâ dêi tơnêi têa ki kong pơlê Sóc Trăng hiăng mơ-eăm ƀă pêi tơƀrê. Tơdrêng amê hlối pơkâ thế Sóc Trăng pơtối chêh bro klêi mâu mơ-éa ki vâ pơchuât pơbleăng, tơmâng xo tŭm mâu rơkong tơpui tối pâ thế dêi khu kăn pêi cheăng, ƀă mâu rơkong tơpui tối ki ôh tá châ tơmâng xo kal ai rơkong tơpui tối leăng vâ ‘mot tơ’nôm tung mơéa tối tơbleăng ƀă pơtroh ăm Khu kăn séa ngăn.

Tung mê, chêh inâi mâu tơdroăng ki kal ối xơpá, tơvâ tơvân, mâu rơkong pâ thế ƀă Chin phuh, mâu khu xiâm kơvâ cheăng Tơnêi têa ‘na rêm tơdroăng, mâu tơdroăng tơkêa, tơdroăng tơkêa ki kŭn.