Hâi lơ 18/6, Khu xiâm Kŏng an tơkŭm po leh diâp kơxô̆ liăn veăng kum pro hngêi ăm mâu rơpŏng kơtiê, rơpŏng kuăn ngo Khmer a kong pơlê Sóc Trăng. A rôh leh mâu khu veăng kum pơcháu kơxô̆ liăn mơjiâng pro 1.200 toăng hngêi ăm mâu rơpŏng kơtiê  xơpá ‘na hngêi ối tung kong pơlê Sóc Trăng, rêm toăng hngêi veăng kum 50 rơtuh liăn mơjiâng pro châ hngêi ƀă kuâ lêm hngêi.

Khu xiâm Kŏng an xuân pơcháu ăm Khu xiâm ngăn ‘na kring tơniăn cheăng kâ rơtế ƀă Kŏng an kong pơlê Sóc Trăng pơkuâ, tơrŭm cheăng krá khât ƀă mâu kăn a pơlê cheăm, tơring vâ pro klêi 1.200 toăng hngêi  hdrối hâi lơ 2/9/2023. Drêng troh tơbâ 78 hơnăm hâi lơ 2/9 kô hôp mơgêi, pơcháu hngêi hiăng pro ăm mâu rơpŏng kuăn pơlê ki xơpá tung cheăm tơring.

5 hơnăm hdrối, kong pơlê Sóc Trăng hiăng mơhno ƀă pro 5.200 to hngêi ăm mâu ai hnoăng tơnêi têa ki kơtiê, mâu kơtiê ki kal vâ hngêi ối. Laga, lâp tung kong pơlê xuân ai lối 15.000 rơpŏng kơtiê, tung 26.000 rơpŏng kuăn pơlê kơtiê; malối , ai vâ chê 7.000 rơpŏng kơtiê xơpá ‘na hngêi ối.