Tiô tơdroăng ăm ‘nâi a rôh diâp, kơxô̆ liăn ‘no vâ bro 1.200 toăng hngêi ăm rơpŏng kơtiê tiô riân dâng 96 rơtal liăn. 4 to hngêi rak liăn Agribank, Vietcombank, Viettinbank ƀă BIDV diâp 60 rơtal liăn, kơxô̆ liăn ki u ối cho khu Kŏng an tŏng kum.

Veăng ai mâ ƀă tơpui a rôh leh, Thươ̆ng tươ̆ng Lương Tam Quang, Ngế xiâm phŏ ngăn Kŏng an, mơnê mâu khu ki tŏng kum hiăng rơtế tŏng kum kơxô̆ liăn tơbleăng bro hngêi diâp ăm mâu rơpŏng kơtiê xơpá ‘na hngêi ối a kong pơlê Dak Lak.

Thươ̆ng tươ̆ng Lương Tam Quang khĕn kơdeăn Kŏng an kong pơlê Dak Lak ƀă khu kăn pơkuâ kong pơlê tung pơla iâ khế hiăng bro klêi 2 toăng hngêi diâp ăm péa rơpŏng kuăn pơlê xơpá ‘na hngêi ối a tơring Čư̆ Mgar ƀă pơkâ thế Kŏng an kong pơlê Dak Lak, mâu tíu pêi cheăng ki bro hngêi mê athế tơbleăng bro1.198 toăng hngêi ki u ối, rak tơniăn dâi lĕm krá ƀă bro klêi hdrối hâi lơ 21/10 hơnăm kố.