Ngế xiâm mơnhên, kơvâ hnê hriâm ƀă hnê mơjiâng tuăn ngôa rơkê Dak Nông hiăng châ tơƀrê hên tung hơnăm hriâm pơla kố nah, veăng kum rế hía rế châ tơƀrê tung mơnhông hnê hriâm dêi kơpong Tây Nguyên ƀă lâp tơnêi têa. Pôa Nguyễn Kim Sơn xuân tối mâu tơdroăng ối pá puât ki kong pơlê Dak Nông kal tơmâng rak tơniăn. Nôkố lâp kong pơlê tá hâi tŭm ối kal 1.021 ngế thái cô mâu râ hriâm tâng pơchông ƀă kơlo pơkâ.

Vâ pêi pro châ tơƀrê hnoăng cheăng hơnăm hriâm nếo 2023 – 2024, pôa Nguyễn Kim Sơn pơkâ thế kong pơlê Dak Nông tơkŭm hnê mơhno ƀă pêi pro lĕm tro mâu troăng pêi môi tiah: tơmâng, mơ’no liăn cheăng tâ ăm hnê hriâm kơpong hơngế hơngo, kơpong hdroâng kuăn ngo; pơtroh thái cô hnê tŭm mơngế, tơdâng; thăm ai tơmeăm khoăng tung hnê hriâm; mơdêk pơ’lêh tung hnê hriâm.