Tơdroăng tơkêa bro pơkâ pêi xĕn kuăn pơlê rêh ối a cheăm Đăk Long, tơring Đăk Hà, kong pơlê Kon Tum châ pêi pro ing mơ’nui hơnăm 2009 cho vâ rak tơniăn tơdroăng rêh ối ăm dâng 300 rơpŏng kuăn pơlê ƀă 1.500 pơ’leăng mâ mơngế. Laga troh nôkố klêi kơ’nâi vâ chê 14 hơnăm nếo ai 84 rơpŏng troh rêh ối a kơpong xĕn ối ƀă 42 rơpŏng mơhé hiăng tơdah tơnêi ối, tơnêi pêt mơjiâng tơmeăm khoăng laga ôh tá troh rêh ối a kố.

Xiâm kối châ mơnhên cho xua tơdroăng pơkâ pêi, rah tíu ôh tá tơtro; ôh tá bê têa hum roh jiếo, ôh tá bê têa tơnêi pêt mơjiâng tơmeăm khoăng, tơdroăng tŏng kum kuăn pơlê tơniăn tơdroăng rêh ối tá hâi châ tơmâng tro kơlo. Pôa Nguyễn Minh Vương, Kăn phŏ hnê ngăn Vi ƀan tơring Đăk Hà, tối ăm ‘nâi tah lôi mâu tơdroăng ối tơvâ tơvân, pá puât a kơpong kuăn pơlê xĕn ối kố trâm hên pá puât ƀă ai tơdroăng pá puât xua mâu tơdroăng pơhlêh dêi Luât tơnêi tơníu.