Ƀă inâi “Sap ing plâi nuih dêi rêm ngế pin tơdjuôm ivá mơjiâng pơlê pơla tŏng kum”, kơxo lơ 15/5, a pơlê kong kơdrâm Kon Tum, Khu lo tŏng veăng kong pơlê Kon Tum tơkŭm po Leh tơbleăng Khế tŏng kum hơnăm 2023, tơbâ 160 hơnăm ai mâ tơdroăng Khu lo tŏng veăng ƀă Trăng lưỡi liềm đỏ kong têa ê. Tung khế tŏng kum hơnăm 2023, Khu lo tŏng veăng kong pơlê Kon Tum mơ-eăm tŏng kum sap ing 2 rơpâu troh 3 rơpâu ngế ai tơdroăng rêh ối xơpá; mơjiâng kế tơmeăm tŏng kum ki kơnía 150 rơtuh liăn; bro 10 toăng hngêi Khu lo tŏng veăng kơnâ sap ing 300 rơtuh liăn tơngi klêng; hnê tối tơdrêng ƀă tiâ mơnhên ăm 1 rơpâu ngế ‘na tơdroăng ki xiâm, tơdroăng ki pơxúa dêi tơdroăng pleăng mơheăm mơhnŏng vâ xêh.

Tơpui a Leh tơbleăng Khế tŏng kum hơnăm 2023, jâ Y Ngọc, Kăn phŏ hnê ngăn Vi ƀan kong pơlê Kon Tum khĕn kơdeăn Khu lo tŏng veăng rêm râ tung Khế tŏng kum hơnăm 2022 hiăng mơhnhôk tơlo châ vâ chê 6 rơtal liăn kum lối 11.800 ngế ki ai tơdroăng rêh ối xơpá.