Kơxê lơ 27/6, Khu hnê mơhno, hbrâ, mơdât kâ kơhveăm liăn ngân, tơdroăng ki ôh tá lĕm tro kong pơlê Kon Tum tơkŭm po Hneăng hôp tơbleăng, hlê plĕng pêi pro tơdroăng hbrâ, mơdât kâ kơhveăm liăn ngân, tơdroăng ki ôh tá lĕm tro tung kong pơlê.

Xông tơpui a Hneăng hôp, pôa Dương Văn Trang, Kăn cheăng tung Tíu xiâm Đảng, Kăn pơkuâ hnê ngăn cheăng Đảng kong pơlê, Kăn hnê ngăn Hô̆i đông kong pơlê, Kăn pơkuâ hnê mơhno hbrâ, mơdât kâ kơhveăm liăn ngân, tơdroăng ki ôh tá lĕm tro kong pơlê Kon Tum tối ăm ‘nâi, tung pơla kố nah Khu pơkuâ cheăng Đảng kong pơlê Kon Tum hiăng tơkŭm pơkuâ hnê mơhno mâu khu râ kăn pơkuâ hnê ngăn cheăng Đảng, khu tơrŭm Đảng pêi pro kơtăng, tơdâng tơ’mô troăng pơkâ pêi dêi Đảng, troăng hơlâ luât dêi Tơnêi têa ‘na tơdroăng hbrâ, mơdât kâ kơhveăm liăn ngân, mâu tơdroăng ki ôh tá lĕm tro.

Klêi mê, pêi teăm tơdrêng tung mơjiâng Khu hnê mơhno hbrâ, mơdât kâ kơhveăm liăn ngân, tơdroăng ki ôh tá lĕm tung kong pơlê; đi đo tơkŭm séa ngăn ‘na tơdroăng hbrâ, mơdât kâ kơhveăm liăn ngân, tơdroăng ki ôh tá lĕm tro; hnê mơhno pêi pro rĕng tơdroăng séa ngăn, pơtrui rup, tơleăng mâu roh tơdroăng, roh tơdroăng kâ kơhveăm liăn ngân, tơdroăng ki ôh tá lĕm tro; mâu troăng hbrâ mơdât kâ kơhveăm liăn ngân châ pêi pro tơdâng tơ’mô; mâu roh tơdroăng, tơdroăng kâ kơhveăm liăn ngân, tơdroăng ki ôh tá lĕm tro châ rĕng hlo teăm tơdrêng, pơxâu phâk kơtăng.