Rêm toăng hngêi kơnâ  60 rơtuh liăn. Kố cho kơxuô tơmeăm diâp mâu rơpŏng ai hnoăng tơnêi têa ai tơdroăng rêh ối pá puât, mơngế kơtiê, kuăn pơlê kơpong hơngế hơngo kal tơdroăng tŏng kum tung hơnăm nếo kố. Hneăng sap ing hơnăm 2019 troh hơnăm 2023, Kŏng ti xiâm On tơhrik peăng tơdế tơnêi têa hiăng tŏng kum mơjiâng 286 toăng hngêi tuăn pâ diâp ăm rơpŏng ai tơdroăng rêh ối pá puât.

Tung hơnăm 2023, tíu cheăng kố ‘măn lối 14 rơtal liăn ăm mâu tơdroăng tŏng kum pơlê pơla. Pôa Ngô Tấn Cư, Kăn xiâm pơkuâ Kŏng ti xiâm on tơhrik peăng tơdế tơnêi têa mơnhên, tơdroăng rêh ối pơlê pơla ôh tá xê to hnoăng cheăng cho tơkêa rêm hơnăm dêi khu tê mơdró ƀă pơlê pơla, tơdjuôm ivá rơtế mâu khu râ kăn pơkuâ  tŏng kum mơngế kơtiê, rơpŏng ai hnoăng tơnêi têa.