Lối 70 hơnăm, laga krâ pơlê Ma An, ƀuôn Trí A, cheăm Krông Na, tơring Ƀuôn Đôn, kong pơlê Dak Lak xuân ƀeăn ƀĕng ƀă kéa prăng môi tiah ‘’loăng hnôh’’ ối tung dế loăng pơlái kong kế Tây Nguyên. Hơnăm 2002, Tây Nguyên chiâng môi tíu ki ôh tá tơniăn ‘na cheăng kal kí ƀă tơdroăng mơnhông dêi mâu khu ki tơtrâ tơnêi têa, pôa Ma An chiâng tíu hgiân ‘na hiâm mơno dêi kuăn pơlê lâp pơlê.

Plâ môi pơla chía ton, achê rêm rơpŏng, pôa mơ-eăm pơtâng tối, mơhnhôk, hnê tối kuăn pơlê kơnó nhên ngiâ méa ki khât dêi mâu ngế tơtrâ tơnêi têa vâ rêm ngế kuăn pơlê mơdêk hiâm mơno kơchăng, ôh tá tơmâng rơkong mơhnhôk dêi ngế ki ‘mêi.

‘’Pin a kố pôi tá tơmâng, pin thế đi đo ‘nâi nhên tơdroăng hnê mơhno dêi Đảng, troăng hơlâ dêi tơnêi têa, đi đo rêh ối tiô troăng hơlâ dêi Đảng vâ pro ti lâi lĕm ăm pơlê pin’’.

Drêng ki ôh tá tơniăn hiăng tơniăn lĕm, krâ pơlê, ngế ki kuăn pơlê loi tơngah pơtối cho um méa tung pêi pro troăng pơkâ pêi, troăng hơlâ dêi Đảng, luât dêi Tơnêi têa. 54 hơnăm ối tung Đảng, pôa Y Thương K’Măn ối a cheăm Bông Krang, tơring Lăk, kong pơlê Dak Lak đi đo veăng mâu tơdroăng xah hêi pơlê pơla a pơlê, mơhnhôk kuăn pơlê mâu hdroâng kuăn ngo pêi pro lĕm tro troăng hơlâ, luât dêi Tơnêi têa, thăm mơjiâng Khu tơrŭm môi tuăn tâi tâng hdroâng mơngế.

Pôa Y Thương tối ăm ‘nâi, mơhé tơnêi têa rế hía rế mơnhông mơdêk laga tơdroăng rêh ối dêi kuăn pơlê mâu hdroâng kuăn ngo xuân ối hên pá puât, mâu ngế ki hêng hôu tơnêi têa xuân pro pơxúa a tơdroăng ki kố vâ pơlông kuăn pơlê ‘nhê tơdroăng ki châ tơƀrê dêi kăch măng. Xua mê, mâu đảng viên môi tiah pôa thế loăng trăng, cho tíu hgiên ki kal vâ kuăn pơlê loi tơngah tiô.

“Đảng ƀă Tơnêi têa tơmâng hên troh tơdroăng rêh ối kuăn pơlê hdroâng kuăn ngo hên tơdroăng, má môi cho on tơhrik hngêi ki lâi xuân hiăng ai, má péa nếo cho khăm pơlât châi tamo cho ôh tá tâi liăn. Mâu tơdroăng ki mê cho tơdroăng tơmâng tŏng kum dêi Đảng, troăng hơlâ Tơnêi têa hiăng tơmâng troh kuăn pơlê hdroâng kuăn ngo pin’’.

Ƀă tơdroăng ki loi tơngah dêi tơná, hên krâ pơlê ối mơhnhôk kuăn pơlê tơrŭm mơnhông mơdêk ôm hyô pơlê pơla ƀă rak vế khôi túa lĕm tro. Tiô krâ pơlê Y Nuel Niê, ƀuôn Akŏ Dhông, pơlê kong kơdrâm Ƀuôn Ma Thuột, kong pơlê Dak Lak, tơdroăng pêi kố rế kum kuăn pơlê thăm hâk vâ, nhuô̆m khôi túa lĕm vâi krâ nah dêi hdroâng kuăn ngo, rế kum vâi ai tơ’nôm pêi lo liăn vâ ai tơdroăng rêh ối tơniăn, krá tơniăn:

‘’Rak vế khôi túa lĕm kô ai liăn vâ mơ’no liăn ăm kuăn cháu hriâm tâp xuân môi tiah mơjiâng cheăng pêi ăm kuăn ‘nĕng tung pơlê. Vêh pro, tơbleăng khôi túa lĕm tro mơngế Rơđế ngin ôh tá xê ăm tơmối tung tơnêi têa mê ối ăm tơmối kong têa ê. Mơnhông khôi túa lĕm tro hlối pêi ôm hyô vâ pêi lo liăn ăm kuăn pơlê’’.

Tây Nguyên nôkố ai lối 3.700 ngế krâ pơlê, ngế ki kuăn pơlê loi tơngah, vâi ôh tá xê to mơngế mơhno khôi túa lĕm tro tung pơlê mê ối cho kŏng tơdjêp xŏn dêi khu râ kăn pơkuâ tung pơtâng tối troăng hơlâ, luât, prôk hdrối tung pêi pro mâu troăng hơlâ, kum tơniăn tơdroăng rêh ối ƀă gâk kring vế pơlê.