Kuân đoân 3 châ mơjiâng a hâi lơ 26/3/1975 tiô tơdroăng pro chiâng môi tâi tâng khu mô đô̆i ki xiâm a kơpong tơplâ Tây Nguyên nah chiâng Kuân đoân ki xiâm troh lâp lu. Kuân đoân 3 hiăng mơhno hnoăng cho tíu ki xiâm, kum kân kĭn tung tơplâ pro tơleăng lĕm Tây Nguyên ƀă la ngiâ tơleăng lĕm tâi tâng peăng Hdroh tơnêi têa, môi tuăn tơnêi têa a hâi lơ 30/4/1975. Tơdrêng amê, Kuân đoân xuân tơplâ gâk kring krá tơniăn tơkăng kong Peăng mâ hâi luô pa hdroh, peăng mâ hâi luô pa kơnhŏng ƀă veăng hnoăng cheăng lâp plâi tơnêi kum kuăn pơlê kong têa Kul hluăn ing hlâ long ing lêng ‘mêi Pol Pot.

Tung tơdroăng kal khât ƀă mơjiâng, gâk kring Tơnêi têa, Kuân đoân 3 hiăng rêh ối hmâ, krá ƀă khu râ kăn pơkuâ hnê ngăn cheăng Đảng, khu râ kăn pơkuâ ƀă kuăn pơlê mâu hdroâng kuăn ngo tíu pro đông; veăng kum kal khât ăm tơdroăng mơnhông cheăng kâ, gâk kring cheăng lêng dêi Gia Lai tối krê, mâu kong pơlê a Tây Nguyên tối tơdjuôm.

Ƀă mâu tơdroăng ƀlêi trâng ƀă châ tơƀrê hôm má môi tung tơplâ xâ ƀă tung roh mơjiâng ƀă gâk kring Tơnêi têa, Kuân đoân 3 hâk tơngăm châ Đảng ƀă Tơnêi têa diâp inâi Ngế khên tơnôu Khu lêng kuăn pơlê a hâi lơ 20/12/1979; châ diâp ăm 3 Mê dái Hồ Chí Minh, 57 Huân chương Quân Công, 242 Mê dái Ƀlêi trâng mâu râ rơtế hên pri ki kơnía ki ê; châ kong têa Kul diâp Mê dái Angkor; 81 khu pú hên ƀă 47 ngế krê châ Đảng, Tơnêi têa diâp inâi Ngế khên tơnôu khu lêng kuăn pơlê.

Tung mê, ai 9 khu pú hên châ kheăn kơdeăn inâi Ngế khên tơnôu roh má péa; Lưh đoân CB7 ƀă Trung đoân BB66 châ kheăn kơdeăn inâi Ngế khên tơnôu roh má pái tung hneăng pơhlêh nếo.

Mơnhông khôi túa ƀlêi trâng hluâ 49 hơnăm mơjiâng, tơplâ ƀă xông kân, kăn ƀô̆, mô đô̆i Kuân đoân 3 đi đo môi hiâm mơno ƀă Đảng, ƀă Tơnêi têa ƀă Kuăn pơlê, mơnhông mâu tơdroăng ki lĕm tro dêi Mô đô̆i Pôa Hồ, chêh pơtối mâu tơdroăng ƀlêi trâng tơbêng tơ’nôm 12 chư mêa: ‘’Khŏm ƀlêi trâng, tơmiât pêi rơkê, tơrŭm môi tuăn, môi tuăn sap apoăng troh tá tui lui, kơtăng, mơ-eăm xêh’’ dêi Kuân đoân ngế khên tơnôu mơjiâng Kuân đoân krá tơniăn ó rơdêi tâi tâng.

Xông tơpui a roh trâm mâ, Trung tươ̆ng Nguyễn Doãn Anh rơkâu mâu ƀlêi trâng, mâu tơdroăng châ tơƀrê dêi Kuân đoân 3, tơdrêng amê pơkâ mâu tíu cheăng tung la ngiâ, pơtối hlê plĕng trâu hơngế mâu troăng tơmiât pêi, troăng prôk, troăng pơkâ pêi, troăng hơlâ dêi Đảng, Tơnêi têa ‘na cheăng lêng, gâk kring tơnêi têa. Tơtrŏng pêi tơtro tơdroăng hnê hriâm kal kí troăng tơmiât pêi, mơdriu khôi túa ƀlêi trâng dêi Kuân đoân tung hneăng nếo, djâ troăng ahdrối, prôk hdrối tung pêi pro troăng hơlâ dêi Khu lêng pơkuâ cheăng Đảng Tơnêi têa, Khu xiâm pơkuâ lêng hơnăm 2024. Trung tươ̆ng Nguyễn Doãn Anh - Kăn cheăng tung Tíu xiâm Đảng, Kăn phŏ tơbleăng cheăng lêng kuăn pơlê Việt Nam tối nhên:

“Á loi tơngah khât, kăn ƀô̆, mâu lêng Kuân đoân 3 kô mơ-eăm, châ tơƀrê hên tâ mê nếo tung rêm kơvâ cheăng, rơtế ƀă khu râ kăn pơkuâ hnê ngăn cheăng Đảng, khu râ kăn pơkuâ ƀă Kuăn pơlê tung kong pơlê mơjiâng kong pơlê pêi cheăng ton xŏn Tây Nguyên ƀă Kuân khu 5 kro mơdrŏng ‘na cheăng kâ, krá rơdêi ‘na kal kí, rak krá tơniăn gâk kring tơnêi têa – gâk kring pơlê pơla; veăng kum rơtế tâi tâng Đảng, tâi tâng kuăn pơlê, tâi tâng khu lêng mơjiâng châ tơƀrê ƀă gâk kring krá tơniăn tơnêi têa Việt Nam xah hô̆i chuh ngiah tung hneăng nếo’’.

Trung tươ̆ng Nguyễn Doãn Anh xuân pơkâ thế Kuân đoân tơtrŏng mơdêk ki dâi lĕm tơniăn tŏng kum pa rŏng, kih thuât mâu hnoăng cheăng; pêi pro lĕm tro troăng pêi ‘’Ôu kâ tŭm mê khu mô đô̆i nếo rơdêi, tơplâ rơkê,’’, mơdêk thăm pêt mơjiâng tơmeăm, pêi pro kơdĭng, tơmâng rak ngăn tơdroăng rêh ối, ai tŭm kế tơmeăm khoăng ƀă hiâm mơno ăm mô đô̆i; pêi pro châ tơƀrê tơdroăng pơtâng tối mơhnhôk kuăn pơlê, ki rơhêng vâ tối a mâu kơpong hơngế, hơngo, kơpong ki pá puât, veăng kum mơjiâng hiâm mơno kuăn pơlê krá kâk.